Nehemiya 7

1Lino bwaanda nibwakamana kuyakululwa, azitendele nizyakabikkwa mumasena aazyo, balindizi bakuŋanda ya Leza, baimbi, kubikkilizya Balevi bamwi bakapegwa milimo yabo.

2Mpoonya ndakasala baalumi bobilo bakweendelezya munzi wa Jelusalemu umwi wakali Hanani mukwesu, a Hananiya ooyo wakali mupati wabasinkondo bakuzilikwabilizyo. Hananiya wakali muntu uusyomeka mumilimo yakwe alimwi wakali muntu uulemeka Leza, kwiinda beenzinyina boonse. 3Ndakabaambila kuti kabatajaluli milyango ya Jelusalemu mane kusikila kwakasaala akuti kaipingidwe kusikila likotoka balindizi zuba lyakasaazya. Alimwi ndakabaambila kuti basale balindizi bamwi kuzwa mubantu bakali kukkala mu Jelusalemu akuti bamwi babo bapegwe milimo iimwi iibageme, bamwi kabalanga kumaanda aabo.

Mweelwe wabaabo bakapilukila ku Jelusalemu

(Ezula 2.1-70)

4Munzi wa Jelusalemu wakali mupati uukwakwabukide, pele bantu bakali kukkala mumo bakali bace, alimwi maanda manji taakanayakululwa. 5Mpoonya Leza wakandipa muyeeyo wakuti ndibunganye bantu, basololi alimwi abalupati-pati babantu mukuti tulange-lange mumabbuku aamikwasyi yabo. Ndakajana bbuku mwakalembedwe mikwasyi yabaabo bantu bakasaanguna kuboola kuzwa mubwaange bbuku eeli lyakali kwaamba:

6Zyabantu bakali kukkala mucisi ca Juda, aabo bakaboola kuzwa mubwaange mubakatoledwe a Nebukadineza mwami waku Babuloni. Bantu aaba bakabweeda ku Jelusalemu aku Juda umwi aumwi kumunzi wokwabo. 7Bakasolwedwa a Zelubabeli, Jesyuwa, Nehemiya, Azaliya, Laamiya, Nahamani, Modekayi, Bilisyani, Misipeleti, Bigivayi, Nehumu a Baana.

Lino ngooyu mundandanda wabaalumi Baisilayeli bakapiluka. 8Balunyungu lwa Palosyi bakali zyuulu zyobilo, amwaanda amakumi aali ciloba ababili.

9Lwa Syefatiya bakali myaanda yotatwe amakumi aali ciloba ababili. 10Lwa Ala bakali myaanda iili cisambomwe amakumi osanwe ababili. 11Lwa Pahatimowabu kwiindila muzyalani lya Jesyuwa a Jowabu bakali zyuulu zyobilo amyaanda iili lusele akkumi alusele. 12Lwa Elamu bakali cuulu amyaanda yobilo amakumi osanwe abane. 13Lwa Zatu bakali myaanda iili lusele amakumi one abasanu. 14Lwa Zakayi bakali myaanda iili ciloba amakumi aali cisambomwe. 15Lwa Binuyi bakali myaanda iili cisambomwe amakumi one alusele. 16Lwa Bebayi bakali myaanda iili cisambomwe amakumi obilo alusele. 17Lwa Azigadi bakali zyuulu zyobilo amyaanda yotatwe amakumi obilo ababili. 18Lwa Adonikamu bakali myaanda iili cisambomwe amakumi aali cisambomwe aciloba. 19Lwa Bigivayi bakali zyuulu zyobilo amakumi aali cisambomwe aciloba. 20Lwa Adini bakali myaanda iili cisambomwe amakumi osanwe abasanu. 21Lwa Ata kwiindila muli Hezekiya bakali makumi aali fuka alusele. 22Lwa Hasyumu bakali myaanda yotatwe amakumi obilo alusele. 23Bezayi bakali myaanda yotatwe amakumi obilo abane. 24Lwa Halifu bakali mwaanda akkumi ababili. 25Lwa Gibeyoni bakali makumi aali fuka abasanu.

26Baalumi bakali kuzwa ku Betelehemu aku Netofa bakali mwaanda amakumi aali lusele alusele, 27ku Anatoti bakali mwaanda amakumi obilo alusele, 28ku Betiazimaveti bakali makumi one ababili, 29kuzwa ku Kiliyatijeyalimu, Kefila, a Beeloti bakali myaanda iili ciloba amakumi one abatatu, 30ku Lama a Geba bakali myaanda iili cisambomwe amakumi obilo aumwi, 31ku Mikimasyi bakali mwaanda amakumi obilo ababili, 32ku Beteli aku Ayi bakali mwaanda amakumi obilo abatatu, 33kuzwa kumunzi wa Nebo uumbi bakali makumi osanwe ababili, 34kuzwa kumunzi wa Elamu uumbi bakali cuulu amyaanda yobilo amakumi osanwe abane, 35kuzwa ku Halimu bakali myaanda yotatwe amakumi obilo, 36ku Jeliko bakali myaanda yotatwe amakumi one abasanu, 37ku Lodi, Hadidi a Ono bakali makumi obilo 38Balunyungu lwa Sena bakali zyuulu zyotatwe a myaanda fuka a makumi otatwe azyuulu zyotatwe amyaanda iili fuka amakumi otatwe.

39Bapaizi balunyungu lwa Jedaiya kwiindila muli Jesyuwa bakali myaanda iili fuka amakumi aali ciloba abatatu, 40lwa Ima bakali cuulu amakumi osanwe ababili, 41lwa Pasyuu bakali cuulu amyaanda yobilo amakumi one aciloba, 42lwa Halimu bakali cuulu akkumi aciloba.

43Balevi balunyungu lwa Jesyuwa kwiindila mumazyalani aa Kadimiyeli a Hodaviya bakali makumi aali ciloba abane.

44Baimbi balunyungu lwa Asafu bakali mwaanda amakumi one alusele.

45Balindizi bamilyango balunyungu lwa Syalumu, Ata, Talimoni, Akubu, Hatita a Syobayi bakali mwaanda amakumi otatwe alusele.

46Babelesi bakuŋanda ya Leza bakali balunyungu lwa Ziha, Hasufa, Tabawoti, 47Kelosi, Siya, Padoni, 48Lebana, Hagaba, Syalimayi, 49Hanani, Gideli, Gaha, 50Leyaiya, Lezini, Nekoda, 51Gazamu, Uza, Paseya, 52Besayi, Meyunimu, Nefusyesimu, 53Bakibuki, Hakufa, Haahuu, 54Baziluti, Mehida, Haasya, 55Baakosi, Sisela, Tema, 56Neziya a Hatifa.

57Lunyungu lwababelesi ba Solomoni bakali ba Sotayi, Sofeleti, Pelida, 58Jaala, Daakoni, Gideli, 59Syefatiya, Hatili, Pokeletihazebaimu a Amoni. 60Antoomwe babelesi bakuŋanda ya Leza abalunyungu lwababelesi ba Solomoni bakali myaanda yotatwe amakumi aali fuka ababili.

61Aabo bakazwa kuminzi ya Telimela, Telihaasya, Kelebu, Adoni awa Ima, batakali kukonzya kutondezya kuti bakali Baisilayeli ncobeni, 62mbalunyungu lwa Delaiya, Tobiya a Nekoda, antoomwe bakali myaanda iili cisambomwe amakumi one ababili.

63Kuzwa kubapaizi balunyungu lwa Hobaiya, Hakozi a Baazilayi wakali kwiitwa boobo akaambo kakuti wakakwata mwanaa Baazilayi Mugiliyadi, 64bakasola kulangaula mumabbuku aamikwasyi aakonzya kutondezya kuti mbapaizi ncobeni, pele tiibakaajana, aabo bakagwisigwa muciinga cabupaizi mbuli bantu batasalali. 65Nkaako mweendelezi wakabalailila kuti kabatalyi zipaizyo zyeelede bapaizi ccita kakuli mupaizi uujisi Ulimu a Tumimu.

66Lino mweelwe wabantu bakapiluka kuzwa mubwaange wakali zyuulu zili makumi one azibili amyaanda yotatwe amakumi aali cisambomwe. 67Babelesi babo baalumi abakaintu bakali zyuulu zili ciloba amyaanda yotatwe amakumi otatwe aciloba. Alimwi kwakali abaimbi baalumi abakaintu bali myaanda yobilo. 68Bakaletelezya amabbiza aali myaanda iili ciloba amakumi otatwe acisambomwe, myuulu zyakali myaanda yobilo amakumi one aasanu, 69nkamela zili myaanda yone amakumi otatwe azisanu, ambongolo zili zyuulu zili cisambomwe amyaanda iili ciloba amakumi obilo.

70Bamwi basololi bamikwasyi bakapa zyakugwasilizya kumulimo wakuyakulula. Mweendelezi wakapa kumulimo madilakimu aangolida aali cuulu, mitiba iili makumi osanwe amajansi aabapaizi aali myaanda yosanwe amakumi otatwe. 71Basololi bamikwasyi bamwi bakapa kumulimo ooyu mbuli mbubakali kukonzya cakuti kwakajanika madilakimu aangolida aali zyuulu zili makumi obilo amaminasi aansiliva aali zyuulu zyobilo amyaanda yobilo. 72Bantu buyo bamwi bakapa madilakimu aangolida aali zyuulu zili makumi obilo, amaminasi aansiliva aali zyuulu zyobilo amajansi aabupaizi aali makumi aali cisambomwe aciloba. 73Bapaizi, Balevi, baimbi, balindizi bamilyango ababelesi bakuŋanda ya Leza bakakkala muminzi yabo abantu bamwi. Abalo Baisilayeli bamwi bakakkala muminzi yabo.

Currently Selected:

Nehemiya 7: Tonga96

Highlight

Copy

Compare