Nehemiya 5
5
Nehemiya mbwaakakwabilila bacete
1Musule aaciindi cili mbocibede bantu banji baalumi abakaintu, bakatalika kutongooka Bajudanyina. 2Bamwi bakali kuti, “Swebo tulijisi mikwasyi mipati, nkaako twabula maila aakulya kuti katupona.” 3Bamwi bakali kuti, “Swebo twakapa myuunda yesu, myuunda yesu yamisaansa, amaanda eesu kuti zibe zijatilizyo kubantu bakatukolotesya maila kuti tutafwi nzala.”
4Bamwi bakali kuti, “Twakakweleta mali aakutelela myuunda yesu, amyuunda yamisaansa kumwami. 5Swebo tweelene buyo a Bajudama. Sena bana besu tabali mbubonya mbuli babo? Pele bana besu twabacita bazike. Mane bamwi bana besu basimbi bakauzigwa kale mubuzike. Tatukwe ambotukonzya kuligwasya pe nkaambo kakuti twakanyangwa myuunda yesu amyuunda yamisaansa.” 6Lino ciindi nindakamvwa matongoosi aabo, ndakanyema kapati. 7Ndakayeeya kuti ndicite cimwi cintu ndakakalalila basololi abalupati-pati babantu akubaambila kuti, “Nywebo mudyaminina bana bokwanu!” Ndakababunganya bantu banji kuti tubambe twaambo ootu. 8Eelyo ndakabaambila kuti, “Twakasola kucita mbuli mbotukonzya kunununa Bajudama bakalisisizye kuli bamasi, pele nywebo mucita Bajudanyoko kuti balisisye kulindinywe no Bajudanyina!” Basololi aabo bakaumuna buyo, taakwe ncibakakonzya kwiingula.
9Eelyo mebo ndakati, “Ncomucita taciluzi pe! Sena tamweelede kulemeka Leza akucita ziluleme kutegwa basinkondoma bamasi, kabatakoonootuseki. 10Mebo ndilakweletesya mali amaila abalo beenzuma mbobacita mbubonya oobo antoomwe abaabo bandibelekela. Pele lino tutakaboozezegwi limbi zikwelete eezi. 11Amubabweedezezye myuunda yabo, amyuunda yamisaansa, yamaoliva, amaanda aabo lino ndilyonya! Amuzilube zyoonse zikwelete nzebamukweletelede, niziba zyamaila, zyawaini alimwi azyamafuta.”
12Lino basololi bakaingula kuti, “Mbombubo, tulacita mbubonya mbuli mbooamba, tulabweedezya lubono akulekelela zikwelete.”
Eelyo ndakaita bapaizi akucita basololi aabo kuti bakonkezye kuti bayoobamba cisyomezyo cabo eeci. 13Mpoonya ndakaangununa lutambo ndondakaangide mucibuno kuludikimuna. Ndakati, “Mbombuboobu awalo Leza mbwayoodikimuna kufumbwa muntu umwi akati kenu uutakooyoobamba cisyomezyo cakwe.” Alimwi ndakati, “Leza uyoomunyanga maanda azintu zyoonse nzemujisi akuyoomusiya buyo cinkwamaanza.”
Lino aaba bakaliwo aawo boonse bakaamba kuti, “Akube boobo!” Bakalumbaizya Mwami Leza. Bamane bakabamba cisyomezyo eeco ncobakakonkezya.
Nehemiya mbwaatakali kuliyanda
14Kwamyaka yoonse eeyi iili kkumi aibili njindakali mweendelezi wacisi ca Juda, kutalikila mumwaka wamakumi obilo wabulelo bwa muleli mupati Aatakisesi kusikila mumwaka wamakumi otatwe aibili yakulela kwakwe, mebo nibaba baluzubo lwangu, tiitwakali kulya zyeelede kulya mweendelezi. 15Beendelezi bakali kulela mebo nketana, bakali kuminya bantu nkaambo bakali kuyanda kupegwa makumi one aamali aansiliva buzuba abuzuba atala lyazilyo awaini. Abalo babelesi babo bakali kudyaminina bantu. Pele mebo nsiindakali kucita oobo pe akaambo kakuti ndakali kulemeka Leza. 16Ndakagama buyo kuyakulula bwaanda, tiindakayanda kutola nyika niiba buti. Abalo babelesi bangu bakali kubeleka ooko. 17Pele buzuba abuzuba ndakalikusanina bantu buyo abalupati-pati mwaanda amakumi osanwe kutabalilizya bantu bamwi bakali kusika kulindime kuzwa muzisi zyakatuzingulukide. 18Buzuba abuzuba ndakali kujaila bantu musune omwe, ambelele zibotu kwiindilila zili cisambomwe ankuku zinji, alimwi kwamana mazuba aali kkumi ndakali kubapa waini uumbi. Nikubaboobo nsiindakayanda kupegwa zyakulya mbuli mweendelezi, nkaambo ndakabona kuti bantu baliminidwe kale.
19Ndakukomba, O Leza wangu koyeeya nzindacitila bantu aaba, undibede aaluzyalo.
Currently Selected:
Nehemiya 5: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
