Nehemiya 2
2
Nehemiya mbwaakainka ku Jelusalemu
1Mumwezi wa Nisani mumwaka wamakumi obilo wakulela kwa Aatakisesi, ciindi naakali kulya, ndakamutolela waini. Taakwe buzuba mbwaakandibwene nkeuside boobu. 2Aboobo wakabuzya kuti, “Ino uuside nzi boobu?” Tocisidwe, nkokuti kuli cikupenzezye mumoyo. 3Ndakayoowa, aboobo ndakaingula kuti, “Oolemekwa. Ino inga nsyuusi buti kakuli munzi uulede basikale bangu lyakaba tongo zitendele zyawo zyakanyonyoonwa amulilo?”
4Lino muleli wakabuzya kuti, “Ono uyanda kuti ucite buti? Aawo ndakakomba kuli Leza wakujulu, 5ndimane ndakaambila muleli mupati kuti, ‘Kuti naa omwami simalelo wangu koboteledwe andime akuti koyanda, ndizumizya kuti ngunke kucisi ca Juda kumunzi ooyo uulede basikale besu, kuti ndikauyakulule.’”
6Aawo muleli kakkede abaŋanda yakwe, wakandibuzya kuti ino inga ndiyookkala ciindi cilamfu buti ooko, akuti njoopiluka lili. Cakamubotela mwami kundizumizya aboobo ndakamwaambila ciindi.
7Aawo ndakamukumbila kuti andigwasye kwiindila mukundipa magwalo aakutola kubeendelezi bacisi cili kumbo lyamulonga wa Yufuletisi, kuti bandizumizye kuunka kucisi ca Juda. 8Alimwi ndakakumbila alumbi lugwalo lwakutola kuli Asafu, ooyo wakali mulangi wagundu lyamuleli. Oolu lwakali lwakumwaambila kuti akandipe mapulanga aakuyasya milyango yabwaanda bukwabilide ŋanda ya Leza aya bwaanda bumwi bwamunzi, alimwi aakuyasya ŋanda yangu. Muleli wakandipa zyoonse nzendakamukumbila, nkaambo Leza wakali aandime.
9Muleli mupati wakandipa bamwi bapati babasilumamba ampi yabasimabbiza mbindakainka aabo kucisi cili kumbo lyamulonga wa Yufuletisi. Ooko nkundakaakupa lugwalo kubeendelezi bacisi eeco. 10Pele ba Sanibalati uuzwa kumunzi wa Batiholoni, alimwi a Tobiya umwi mupati wacisi ca Amoni, nibakamvwa kuti kuli waboola kuzoogwasya Baisilayeli bakabijilwa kapati.
11Lino ndakaindilila ndaya ku Jelusalemu, nkwindakakkala mazuba otatwe 12nkentaambili muntu naba omwe kuti nzeezi Leza nzyayanda kuti ndicitile munzi wa Jelusalemu. Lino akati kabusiku ndakabuka ndazwa, ndakatolelezya abeenzuma bamwi bace buyo. Twakatolelezya amunyama omwe, uuli nimbongolo njindakatantide. 13Akali masiku nindakazwa mumunzi kwiindila kumulyango waku kkuti kumbo, ndakagama kumusanza ndaakwiinda kukasensa katosi, ndaakwiinda kumulyango wamankwisila nkeyabulanga bwaanda bwamunzi bwakoolekede alimwi azitendele zyakanyonyoonwa amulilo. 14Kuzwa waawo ndakalanga nkuuli kujwe munzi ndakaya kumulyango wakasensa kuyoosika kuziba lyamwami, pele mbongolo njendakatantide yakabula mpiiinda akaambo kazitantaala. 15Nkaako ndakaselemukila mukkuti lya Kidiloni nkenjabulanga bwaanda, ndimane ndakapilukila mundakaindide ndaakunjila mumunzi kumulyango wakkuti.
16Taakwe naba omwe wabalupati-pati bamunzi wakaziba nkondakabede ancindakali kucita. Kwaciindi coonse eeci taakwe naba omwe wa Bajuda ngwindakaambilide nibaba bapaizi, basololi, balupati-pati, abaabo bamwi bakali kuyootola lubazu mumulimo. 17Kumamanino ndakati kulimbabo, “Mwaabona mapenzi ngetujisi akaambo kakuti Jelusalemu lyakaba tongo azitendele zyawo zyakanyonyoonwa amulilo. Lino atuyakulule bwaanda bwamunzi ooyu kutegwa katutanoocisampukide.” 18Alimwi ndakabaambila mbuli Leza mbwaakali aandime ambwaakandigwasya, azyakandaambila muleli mupati Aatakisesi.
Eelyo boonse bakazumina bati, “Ani atutalike kuyakulula! Mpoonya bakalibambila kuti batalike.”
19Aawo ba Sanibalati, Tobiya a Gesyemu Mualabu nibakamvwa ncotwakali kuyanda kucita, bakatalika kutuseka bati, “Ani muyeeya kuti mucita nzi nywebo? Nkokuti muyanda kuzangila muleli mupati.”
20Mebo ndakabaingula kuti, “Leza wajulu ulapa kuti tuzwidilile tuli babelesi bakwe, nkaako tulatalika kuyaka. Pele nywebo tamujisi caabilo mu Jelusalemu. Alimwi tamukwe alubazu kuno, taakwe nociba comwe cintu ncomunga mwaamba kuti ncicanu.”
Currently Selected:
Nehemiya 2: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
