Nehemiya 1

Nehemiya mbwaakamuyeeya Jelusalemu

1Ngaaya makani aa Nehemiya, mwanaa Hakaliya. Lino mumwezi wa Kisilevu, mumwaka wamakumi obilo, Aatakisesi kali muleli mupati, mebo nde Nehemiya ndakali mumunzi mupati wa Susa. 2Hanani, umwi wabana bokwesu wakaboola abantu bamwi kuzwa kucisi ca Juda, ndakababuzya zya Bajuda azyamunzi wa Jelusalemu. 3Lino bakandiingula kuti, “Bantu bali mumapenzi alimwi baluuside kapati. Bwaanda bwa Jelusalemu bulaandukide nkabela zitendele zyawo tazinabambwa kuzwa nizyakaumpwa. 4Nindakamvwa zintu eezi ndakakkala ansi akulila. Kwamazuba aali mbwaabede ndakali mubuumba akuliimya kulya. Mpawo ndakakomba kuli Leza wakujulu 5ndakati, ‘O Mwami Leza wajulu uli mupati ulayoosya, yebo ulasyomeka alimwi ulabamba cizuminano cako kuli baabo bakuyanda akuswiilila milawo yako.’ 6Kondilanga O Mwami Leza, kondiswiilila nendikomba masiku asikati kukombela babelesi bako bantu Baisilayeli. Ndalyaambilila kuti swebo to Baisilayeli twakubisizya. Swebo abasikale besu twakubisizya. 7Twakubisizya kapati mukutacita nzyolailila. Tiitwabamba milawo njookatupa kwiindila mumubelesi wako Mozesi. 8Twakomba yeeya ceeco ncookaambila Mozesi kuti, ‘Naa kuti nywebo, no Baisilayeli mutakasyomeki kulindime, njoomumwaya akati kamisyobo imwi. 9Pele naa kuti mukapilukile kulindime akucita zeezyo nzendakulailila, njoomupilusya kubusena oobo mbwendakasala kuti zina lyangu linookombelwa nkuko nikuba kuti kamumwaikide buti munyika yoonse.’

10“O Mwami Leza, aaba mbabelesi bako, bantu bako omwini. Wakabavuna ajanza lyako lyanguzu mpati alimwi ajanza lyako jumu.

11“Akaka, Mwami, koswiilila kukomba kwangu ndemubelesi wako, akwababelesi bako bamwi boonse bayanda kukulemeka, cita kuti zintu zindeendele kabotu akuti muleli mupati andifwide luzyalo.” Mumazuba aayo ndakali kweendelezya zyawaini wamuleli mupati.

Currently Selected:

Nehemiya 1: Tonga96

Highlight

Copy

Compare