Nehemiya 11

Bantu bakkala mu Jelusalemu

1Basololi babantu bakkala mu Jelusalemu, a bantu buyo bakauma cisolo kuti basale mukwasyi omwe kuzwa mumikwasyi iili kkumi kuti ukakkale mumunzi uusalala wa Jelusalemu, kakuli eeyo iili fuka yakeelede kuti ikakkale muminzi yawo. 2Bantu bakalumbaizya baabo bakaliyandila kuyookkala mu Jelusalemu. 3Baisilayeli, bapaizi, Balevi, babelesi bakuŋanda ya Leza abalunyungu lwababelesi ba Solomoni bakakkala muminzi yacisi ca Juda. Umwi aumwi wakakkala mumunzi ooyo wakali wa caabilo cakwe.

Lino ngooyu mundandanda wabasololi bakazwa mucisi ca Juda kuti bakakkale ku Jelusalemu.

4Kuzwa kumusyobo wa Juda kwakali ba Ataya mwana wa Uziya, mwanaa Zekaliya mwana wa Amaliya, mwanaa Syefatiya, mwanaa Mahalaleli, walunyungu lwa Pelezi, mwanaa Juda, 5a Maaseiya mwanaa Baluki, mwanaa Kolihoze. Bamwi basikale bakwe bakali ba Hazaiya, Adaiya, Joiyalibu, Zekaliya walunyungu lwa Syela mwanaa Juda. 6Balunyungu lwa Pelezi bakali kukkala mu Jelusalemu bakali myaanda yone amakumi aali cisambomwe alusele baalumi basicamba.

7Kuzwa kumusyobo wa Benjamini kwakali Salu, mwanaa Mesyulamu, mwanaa Jowedi. Bamwi basikale bakwe bakali ba Pedaiya, Kolaiya, Maaseiya, Itiyeli, Jesyaiya, 8abasazinyina ba Gabayi a Salayi. Antoomwe Babenjamini bakali kukkala mu Jelusalemu bakali myaanda iili fuka amakumi obilo alusele. 9Joweli mwanaa Zikili nguwakali musololi wabo, kumane kwaza Juda mwanaa Hasenuwa.

10Kuzwa kubapaizi kwakali Jedaiya mwanaa Joiyalibu, Jakini, 11Selaiya mwanaa Hilikiya, mwanaa Mesyulamu. Bamwi basikale babo bakali ba Zadoki, Melaiyoti a Ahitubi wakali mupaizi mupati. 12Baciinga eeci bakali kubelekela kuŋanda ya Leza antoomwe bakali myaanda iili lusele amakumi obilo ababili.

Kumane kwakali Adaiya mwanaa Jelohamu, mwanaa Pelaliya. Bamwi basikale bakwe bakali ba Amuzi, Zekaliya, Pasyuu, Malikija. 13Antoomwe baciinga eeci bakali basololi bamikwasyi, bakali myaanda yobilo amakumi one ababili.

Kumane kwakali Amasyisayi mwana wa Azaleli, mwana wa Ahizayi. Bamwi basikale bakwe bakali ba Mesyilemoti mwana wa Ima. 14Muciinga eeci kwakali basilumamba bacibwene, bali myaanda amakumi obilo alusele. Musololi wabo wakali Zabudiyeli umwi wamukwasyi uulaampuwo.

15Kuzwa ku Balevi kwakali Syemaiya mwanaa Hasyubu, mwana wa Azilikamu. Bamwi basikale bakwe bakali ba Hasyabiya a Buni.

16Syabetayi a Jozabadi bapati ba Balevi mbabakali kulanga mulimo waanze lyaŋanda ya Leza.

17Mataniya mwanaa Mika, mwanaa Zabudi, walunyungu lwa Asafu, nguwakali kwiimbya baimbi bakuŋanda ya Leza mukukomba akulumba kwabo.

Bakibukiya nguwakali mugwasyi wakwe. Umwi wakali Abuda mwanaa Syamuwa, mwanaa Galali walunyungu lwa Jedutuni. 18Balevi bakali mumunzi uusalala wa Jelusalemu bakali myaanda yobilo amakumi aali lusele abane.

19Balindizi bakuŋanda ya Leza bakali ba Akubu, Talimoni, anzubo zyabo. Antoomwe bakali mwaanda amakumi aali ciloba ababili.

20Baisilayeli bamwi antoomwe abapaizi a Balevi bakakkede muminzi yacisi ca Juda, umwi aumwi wakakkede mumunzi oomo mwakali caabilo cakwe.

21Babelesi bakuŋanda ya Leza bakali kukkala kukalundu ka Ofeli, bakali bapati babo mbaa Ziha a Gisyipa.

22Wakali mupati wa Balevi mu Jelusalemu ngu Uzi mwanaa Bani, mwanaa Hasyabiya. Bamwi basikale bakwe bakali ba Mataniya, a Mika. Uzi wakali umwi walunyungu lwa Asafu aabo bakali baimbi kuŋanda ya Leza. 23Mwami wakapede malailile aakali kwaamba zya baimbi mbubakeelede kwiimba buzuba abuzuba.

24Petahiya mwanaa Mesyezabeli walunyungu lwa Zela wamusyobo wa Juda nguwakali kwiiminina mwami mumakani oonse aajatikizya bantu ba Isilayeli.

Bantu bakakkede muminzi imwi

25Bantu banji bakali kukkala muminzi eeyo yakali aafwifwi amyuunda yabo. Aabo bakali bamusyobo wa Juda bakali kukkala mu Kiliyatiaba, Diboni a Jekabuzeeli, atunzi twayo. 26Alimwi bakali kukkala amuminzi ya Jesyuwa, Molada, Betipeleti, 27Hazasyuwali, Biiyasyeba atunzi twayo. 28Bakali kukkala amu Zikilagi, Mekona atunzi twayo, 29Ehilimoni, Zola, Jaamuti, 30Zanowa, Adulamu, atunzi twayo. Bakali kukkala mu Lakisyi mumunzi amyuunda amu Azeka atunzi twayo. Nkokwaamba kuti bantu ba Juda bakakkede mucisi citalikila ku Biiyasyeba kuyoosika kukkuti lya Hinomu. 31Babenjamini bakali ku Geba bakali kukkala mu Mikimasyi, Aija, Beteli, atunzi twayo. 32Anatoti, Nobu, Ananiya, 33Hazoo, Lama, Gitaimu, 34Hadidi, Zeboimu, Nebalati, 35Lodi, Ono, amukkuti lyababezi. 36Nkamu zya Balevi zimwi zyamu Juda zyakakkede mucisi ca Benjamini.

Currently Selected:

Nehemiya 11: Tonga96

Highlight

Copy

Compare