Judi 1

1Ndime Judi mubelesi wa Jesu Kilisito, alimwi ndimunyina Jemusi.

Ndalemba lugwalo oolu kuli ndinywe nomwakaitwa alimwi nomuyandwa a Leza Taata, aabo babambidwe a Jesu Kilisito.

2Leza amweengelele akumupa luumuno, aluyando lunji.

Zyabamayi babeji

3Nomuyandwa, ndayandisisya kumulembela lugwalo kuti mmupandulwide zyalufutuko lwesu toonse. Pele ndakabona kuti cakali kuyandika kapati kumulembela akumukumbila kuti mulwanine lusyomo oolo Leza ndwaakapa bantu bakwe lomwe buyo. 4Nkaambo bantu bamwi batayandi zya Leza bakanjila cakusisikizya akati kanu. Aaba balapilinganya lwaangunuko ndotujisi kuti lube cicitilo cazisesemya. Bakaka Jesu Kilisito uuli ngo Mwami Simaleleesu alikke. Zyacisubulo cabantu aaba zyakalembwa kale.

5Lino ndiyanda kumwiibalusya zimwi nikuba kuti mulizizi kale. Mwami wakavuna Baisilayeli kuzwa ku Ijipiti, pele naakamana wakanyonyoona boonse batakamusyoma. 6Amuyeeye bangelo batakabamba bulelo bwabo, alimwi bakasiya busena Leza mbwaakabapede. Leza wakabaanga nketani zitamani, alimwi ulibabikkide mubusena bwamudima kusika buzuba bupati oobo nayoobabeteka. 7Amuyeeye alimwi minzi ya Sodomu a Gomola aminzi iibambene aanjiyo. Mbubuli basunu, bantu baminzi eeyo bakali basibwaamu akucitana zitaambiki. Leza wakabacita kuti cibe citondezyo naakabasubula amulilo uutamani.

8Lino bantu basunu balacita mbubonya. Mukutobela mizeezo yabo mibi, balasofwaazya mibili yabo, balakaka bulelo bwa Leza akusampaula balemekwa ba Leza. 9Pele naba Mikayele mungelo mupati ciindi naakali kukazyanya a Saatani, kabakazyanya zyamutumba wa Mozesi, wakayoowa kumubeteka cakusampaula. Wakaamba buyo kuti, “Mwami Leza akusubule!” 10Pele bantu aaba balasampaula kufumbwa ncobatazi, zintu nzyobacita bazicita mukutobela maanu aabunyama. Nzezibanyonyoona. 11Aaba mbaasimalweza! Baleenda munzila ya Kaini. Mbubuli bwakacita Balaamu abalo balaliwaala muzibi nkaambo kakuyanda mpindu. Balanyonyoonwa akaambo kakuzangila Leza mbuli bwakacita Kola. 12Babisya mapobwe aanu aaluyando. Balalya andinywe kabanyina nsoni, batobela zisusi zyabo. Bali mbuli makumbi apepaulwa aluuwo, amana taaleti mvula. Bali mbuli misamu iitazyali micelo nicisika ciindi cayo, ilizyulidwe akuyuma nta. 13Mbubuli mbwaacita ccovu mayuwe makali aalwizi, abalo mbobabonya busofwaazyi bwabo. Bali mbuli nyenyezi zisweekede, alimwi Leza ulibabambilide mudima uutamani uusiya mbi.

14Mbambabo aaba mbaakasinsima Enoki wamusela waciloba kuzwa kuli Adamu naakati, “Ncobeni, Mwami uyooboola abangelo bakwe bali zyuulu-zyuulu. 15Uyoobeteka boonse akubasubula banyansya Leza nkaambo kamilimo yabo yoonse iitaluleme njobacita cakutamuyoowa. Uyoobasubula nkaambo kamajwi oonse aakusampaula ngobamusampaula.” 16Aaba bantu balasyolooka akutoongoka, batobela zisusi zyabo beni, balaamba cakulisampula akuunina bantu mukuti balivubye.

Zyakucenjezya akulailila

17Pele nywebo, nomuyandwa, amuyeeye majwi aakaambwa kale abatumwa ba Mwami Jesu Kilisito. 18Bakamwaambila kuti, “Kuciindi camamanino kuyooba bantu basampaula, baccilila zisusi zyabo.” 19Bantu aabo mbabaandaanya beenzinyina. Batobela zyabuntunsi alimwi banyina Muuya Uusalala. 20Pele nywebo, nomuyandwa, amuliyake mulusyomo lwanu lusalala. Amukombe mukugwasigwa a Muuya Uusalala. 21Amukkale muluyando lwa Leza nomulindila buumi butamani Mwami wesu Jesu Kilisito mbwayoomupa muluse lwakwe. 22Amubeengelele aabo bacidonaika. 23Bamwi mubayokole cakubakwempa kuzwa kumulilo. Pele bamwi mubeengelele cakucenjela akunanama niciba cakusama cabo cabisigwa azisusi zyabo zyabuntunsi.

Kulumba kwamamanino

24Alemekwe ooyo uukonzya kumubamba kuti mutawi alimwi uukonzya kumusisya kakunyina akampenda alimwi kamutangede ooko walo nkwakkede mubulemu bwakwe. 25Kuli Leza walo alikke uuli ngo Mufutuli wesu, muli Jesu Kilisito Mwami wesu, akube bulemu, abupati, anguzu, abwami, kuzwa kumatalikilo, asunu alyoonse mane kukabe kutamani. Akube boobo.

Currently Selected:

Judi 1: Tonga96

Highlight

Copy

Compare