Ciyubunuzyo 1

1Mubbuku eeli momulembedwe zintu Leza nzyaakayubunwida Jesu Kilisito. Leza wakamupa ciyubunuzyo eeci kuti atondezye babelesi bakwe zintu zyali kuyoocitika cakufwambaana. Kilisito wakazibya Joni mubelesi wakwe zintu eezi naakatuma mungelo wakwe kulinguwe. 2Nkabela Joni wakalungulula zintu zyoonse eezyo nzyaakabona. Aaya ngamakani ngaakalungulula alimwi wapa bumboni ku Majwi aa Leza akuli zyoonse Jesu Kilisito nzyaakaamba. 3Ulilelekedwe ooyo uubala bbuku eeli, alimwi balilelekedwe aabo baswiilila mulumbe wabusinsimi oobu akubamba zintu zilembedwe mubbuku eeli! Nkaambo ciindi cili aafwiifwi.

Joni mbwaakajuzya mbungano zili ciloba

4Ndime Joni nendilembela mbungano zili ciloba zili mucisi ca Asiya, Leza amubede aaluse akumupa luumuno, ngo Leza Uuliko, Wakaliko alimwi Uunooliko. Ayalo myuuya iili ciloba iili kumbele lyacuuno cabulemu bwakwe, iimuleleke akumupa luumuno. 5Jesu Kilisito amuleleke akumupa luumuno, ooyu ngokamboni uusyomeka wakasaanguna kubuka kuzwa kubafu, ngonguwe mweendelezi wabami boonse bamunyika.

Ulatuyanda, eelyo kwiindila mubulowa bwakwe wakatwaangununa kuzwa kuzinyonyoono zyesu. 6Walo wakatucita kuti tube bami kuti tubelekele Leza Taata mbuli bapaizi. Akube bulemu anguzu kulinguwe mane kukabe kutamani. Akube boobo.

7Amubone, ulaboola amakumbi! Nkabela bantu boonse bayoomubona, abalo bakamuyasa mbubonya. Misyobo yoonse yamunyika muno iyoolila nkaambo kakwe. Akube boobo!

8“Ndime matalikilo amamanino,” mbwaamba Mwami Leza Singuzuzyoonse, Uuliko, Wakaliko, alimwi Uunooliko.

Joni mbwaakabona Kilisito mucilengaano

9Ndime Joni munyoko, nkabela muli Jesu ndili antoomwe andinywe mukuyumina mapenzi, bwami, amukukakatila. Ndakalaangidwe munsumbu ya Patimosi nkaambo kamajwi aa Leza ngindakakambauka abumboni bwaamba zya Jesu. 10Mubuzuba bwa Mwami, Muuya Uusalala wakandisikila, eelyo ndakamvwa kusule lyangu jwi pati mbuli kulila kwamweembo. 11Lyakati, “Eezyo nzyobona zilembe mubbuku, wamana ulitumine bbuku eelyo kumbungano eezi zili ciloba, ku Efesusi, ku Similina, ku Pelegamumu, ku Tiyatila, ku Saadisi, ku Filadelufiya, alimwi aku Lawodisiya.”

12Lino nindakacebuka kuti mbone ooyo wakali kukanana kulindime, ndakabona zikkalilo zyamalambe zyangolida zili ciloba. 13Lino akati kanzizyo kwakali umwi uuli mbuli Mwanaa Muntu, wakalisamide jansi damfu alimwi acamba wakalyaangide lutambo lwangolida. 14Masusu aakwe akali kutuba mbuli lukobo naa mbuli butonje butuba buu. Meso aakwe akali mbuli kuvwilima kwamulilo. 15Zituta zyakwe zyakali kuŋaima mbuli mukuba wasyobwa amavuba. Jwi lyakwe lyakali mbuli maanzi aavuuma. 16Mujanza lyakwe lyalulyo wakajisi nyenyezi zili ciloba, eelyo mukanwa lyakwe mwakazwa panga likwengedwe koonse-koonse. Busyu bwakwe bwakali kubala mbuli zuba nolisensa. 17Lino nindakamubona, ndakawa munsi lyamaulu aakwe mbuli muntu uufwide. Pele wakabikka janza lyalulyo lwakwe aalindime wati, “Utayoowi! Ndime matalikilo amamanino. 18Ndime ooyo uupona! Ndakalifwide pele lino ndili muumi mane kukabe kutamani. Ndilijisi nguzu zyakuzunda lufu acikkalilo cabafu. 19Aboobo lemba zintu eezyo nzyobona, zintu ziliwo azeezyo ziyoocitika. 20Lino ngaaya maseseke aanyenyezi eezi zili ciloba mujanza lyalulyo alimwi azikkalilo zyamalambe zyangolida. Inyenyezi zili ciloba mbapati bambungano zili ciloba, zikkalilo zyamalambe nimbungano eezyo zili ciloba.

Currently Selected:

Ciyubunuzyo 1: Tonga96

Highlight

Copy

Compare