Josyuwa 6
6
Munzi wa Jeliko mbuwakawa
1Lino munzi wa Jeliko wakapingwa kapati kuti Baisilayeli babule mpobanjilila. Taakwe muntu wakali kukonzya kuzwa nikuba kunjila pe. 2Mpoonya Mwami Leza wakaambila Josyuwa kuti, “Munzi wa Jeliko nduuaba kulinduwe, kubikkilizya amwami antoomwe abasilumamba bakwe. 3Kwamazuba aali cisambomwe yebo abasilumamba bako mweelede kuzinguluka munzi ooyu lomwe abuzuba. 4Bapaizi bali ciloba bakabweze myeembo yameja aabagutu, bamana bakaime kumbele lyabbokesi lyacizuminano. Mubuzuba bwaciloba yebo abasilumamba bako mukazinguluke munzi ziindi zili ciloba bapaizi kabanooyoosiba myeembo. 5Mwaakumvwa buyo kuti bapaizi bamvweemuna myeembo, basilumamba boonse bakapozomoke kapati, nkabela bwaanda bwamunzi buyoowa ansi dilili. Mbobati kanjile oobo.”
6Aawo Josyuwa mwanaa Nuni wakaita bapaizi akubaambila kuti, “Amubweze bbokesi lyacizuminano, kwiime bamwi banu bali ciloba kumbele lyabbokesi lyacizuminano, kabajisi amyeembo.” 7Alimwi wakaambila bantu bakwe kuti batalike kuzinguluka, balindizi bakali kweendela kumbele lyabbokesi lyacizuminano ca Mwami Leza.
8Josyuwa amane buyo kwaamba eezi, bapaizi aabo bali ciloba bakabweza myeembo iili ciloba kumbele lya Mwami Leza beenda. Bakali kuya busiba myeembo kabeendela kumbele lya bbokesi lyacizuminano ca Mwami Leza. 9Kumbele lyabapaizi kwakali balindizi, amwalo musule lyabbokesi mwakali balindizi bamwi. Muciindi eeco coonse bapaizi bakali kusiba myeembo. 10Pele Josyuwa wakacenjezya basilumamba bakwe kuti batanoopozomoki nikuba kwaambaula, mane kusikila akabaambile kuti bacite oobo. 11Mpoonya bapaizi bakabwezede bbokesi bakazinguluka munzi lomwe. Bamane bakaboola kuzivuka zyabo, akuzoona.
12Lino buce buyo, Josyuwa wakabuka bucilikooko, aawo bapaizi baya bakabweza bbokesi lyacizuminano alimwi. 13Abalo bali ciloba bakabweza myeembo iili ciloba bainda kumbele lyabbokesi lyacizuminano ca Mwami Leza kabaya busiba. Balindizi bakasolola, bamwi bakali kweendela musule lyabbokesi lyacizuminano ca Mwami Leza. 14Alwabili bakazinguluka munzi lomwe, bamane bakapiluka kuzivuka. Bakacita oobu kwamazuba aali cisambomwe.
15Lino mubuzuba bwaciloba, aapaswida zuba, bakazinguluka munzi ziindi zili ciloba mbubonya mbuli mbubakali kucita lyoonse, pele buyo kuti mubuzuba oobu bakuuzinguluka ziindi zili ciloba. 16Ciindi caciloba eeci, bapaizi nibakalibambila kusiba myeembo, Josyuwa wakalailila basilumamba bakwe kuti bapozomoke. Wakati, “Mwami Leza waaba munzi ooyu kulindinywe! 17Munzi azyoonse zili mumo zinyonyoonwe kuti zibe mbuli cipaizyo ku Mwami Leza. Pele buyo Lahabu mwaamu antoomwe abaabo bali muŋanda yakwe mbabeelede kulekwa, nkaambo wakasisa basikutwela mbitwakatumide. 18Mutabwezi cintu niciba comwe cazeezyo zyeelede kunyonyoonwa. Naa mucite oobo, mulaleta mapenzi aakuti zivuka zya Baisilayeli zinyonyoonwe. 19Zyoonse zyansiliva, ngolida, mukuba azyalubulo nzya Mwami Leza. Zileelede kubikkwa muciyobwedo ca Mwami Leza.”
20Mpoonya aawo bapaizi bakasiba myeembo. Basilumamba mbubakaimvwida buyo, bakapozomoka kapati, mpawo bwaanda bwakawa dilili! Basilumamba bakanjila cinjile-njile mumunzi akuuzunda. 21Bakanyonyoona munzi woonse mbuli cipaizyo ku Mwami Leza, nkabela bakajaya zyoonse zyakali mulinguwo amapanga, kubikkilizya baalumi abakaintu, baniini abapati, alimwi aŋombe, mbelele ambongolo.
22Lino Josyuwa wakaambila basikutwela baya bobilo kuti, “Kamuya kumukaintu mwaamu ooyo, mukamugwisye antoomwe abaabo boonse mbali aabo, mbubonya mbuli mbumwakamusyomezya.” 23Mbombuboobu basikutwela aabo bobilo mbubakainka kuli Lahabu, baakumuleta walo, wisi, banyina, bana bokwabo antoomwe abamukwasyi wawisi. Bakaleta bamukwasyi wakwe boonse, akubayakila kunze lyazivuka zya Baisilayeli. 24Bamane bakatenta munzi oonse azyoonse zyakali mulinguwo, kuleka buyo nsiliva, ngolida, mukuba azyoonse zyalubulo zyalo nzibakabikka muciyobwedo ca Mwami Leza. 25Josyuwa wakaleka Lahabu mwaamu antoomwe amukwasyi wakwe woonse, mukuti nguwakasiside basikutwela aabo bakatumidwe. Balunyungu lwakwe Lahabu mobacili mu Isilayeli asunu.
26Lino ciindi eeco Josyuwa wakakonkezya wati, “Mwami Leza asinganye kufumbwa muntu uyooyakulula munzi wa Jeliko.
‘Kufumbwa uutisye ntalisyo mwanaakwe mulombe wakusaanguna afwe
Kufumbwa uyoosimpa milyango mipati yawo mwanaakwe musyoonto afwe.’”
27Mbombuboobu Mwami Leza mbwaakali aa Josyuwa, nkabela mpuwo yakwe yakamwaika munyika eeyo.
Currently Selected:
Josyuwa 6: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
