Josyuwa 5
5
1Lino bami ba Baamoli bakali kukkala kumbo lyamulonga wa Jolodani antoomwe abami boonse ba Bakenani bakali kukkala kumbali aalwizi nibakamvwa mbuli Mwami Leza mbwaakaandaanya mulonga wa Jolodani kuti Baisilayeli bainde anyika njumu, bakayoowa kapati, lyakabaleka akaambo ka Baisilayeli.
Mbubakapalulwa ku Giligali
2Lino ciindi eeco nciconya Mwami Leza wakaambila Josyuwa kuti, “Bamba mabwe aabosya, upalule Baisilayeli batana palulwa.” 3Mpoonya Josyuwa wakapanga mabwe aabosya akupalula Baisilayeli ku Gibeyati Haalaloti. 4Lino nceeci cakacita kuti Josyuwa abapalule. Boonse aabo bakazwa mu Ijipiti, nkokuti aabo bakali kukonzya kulwana, bakafwida munkanda kabacili munzila kuzwa ku Ijipiti. 5Bantu boonse bakazwa mu Ijipiti bakalipalwidwe, pele aabo bakazyalilwa munkanda tiibakana pe. 6Baisilayeli bakakkala munkanda kwamyaka iili makumi one mane kusikila baalumi boonse bakali kukonzya kulwana bakazwa mu Ijipiti bafwa. Eeci cakacitika akaambo kakuti tiibakali kuswiilila Mwami Leza. Mbubonya mbuli mbwaakakonkezede, Mwami Leza taakabazumizya kuti babone nyika eeyi njaakasyomezya kuli basikale besu kuti uzootupa, nyika iikunka mukupa abuci. 7Nkaako bana babo bakazyalilwa mulweendo mbambabo Josyuwa mbaakapalula, nkaambo tiibakanapalulwa pe. 8Nibakamana kupalulwa, bantu boonse bakakkala aawo mane kusikila bapona.
9Lino Mwami Leza wakaambila Josyuwa kuti, “Sunu ndamugwisya masampu aalya ngomwakajisi mu Ijipiti.” Ncenciceeco busena oobu ncobuciitwa kuti Giligali asunu.
10Lino Baisilayeli kabacili ku Giligali mucibanda ca Jeliko, bakalya Pobwe lya Kwiindilila mubuzuba bwakkumi aane bwamwezi ciindi cakumangolezya. 11Pobwe lya Kwiindilila nilyakamana, buce buyo bakalya zilimwa zyanyika eeyo, Bakayoka maila akulya zinkwa zitakwe mimena. 12Bucica kabalide kale zilimwa eezi, mana taakaloka limbi pe. Kuzwa leelyo Baisilayeli tiibakalya limbi mana, bakalya buyo zyakaliminwe mwaka ooyo.
Josyuwa mbwaakabona muntu wakajisi panga
13Lino Josyuwa naakasika aafwiifwi amunzi wa Jeliko, wakabona muntu wakaimvwi kumbele lyakwe kajisi apanga. Josyuwa wakainka kwakaimvwi muntu ooyo akumubuzya kuti, “Sena uli umwi wesu, naa uli wabasinkondoma?” 14Muntu ooyu wakaingula kuti, “Peepe, mebo ndiwaano nkaambo ndendime mupati wabasilumamba ba Mwami Leza.” Mpoonya Josyuwa wakavuntama ansi wati, “Simalelo wangu, ino ncinzi ncoyanda kuti ndicite?”
15Mupati wabasilumamba ba Mwami Leza wakati, “Samununa ndyasyo zyako, nkaambo aawa mpoimvwi alasalala.” Josyuwa wakacita oobo.
Currently Selected:
Josyuwa 5: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
