Josyuwa 3
3
Baisilayeli mbubakazubuka mulonga wa Jolodani
1Lino buce buyo cifumo-fumo, Josyuwa a Baisilayelinyina boonse bakalonga kuzwa ku Syitimu baakukkalila kumbali aamulonga wa Jolodani kulibambilila kuzubuka. 2Kwiinde buyo mazuba otatwe, basololi bakeendeenda akati kazivuka, 3akulailila bantu kuti, “Mwabona buyo kuti bapaizi, Balevi banyamuna bbokesi lyacizuminano ca Mwami Leza wanu, anywebo mulitalikizye, mubatobele. 4Akaambo kakuti tamunasikide kuno, bayoomutondezya nzila. Pele mutakabi nimweendela afwiifwi abbokesi lyacizuminano, mweelede kuti kamutantamukide kwatukokola tuli zyuulu zyobilo kuzwa kuli ndilyo.”
5Mpawo Josyuwa wakaambila bantu kuti, “Amulisalazye, nkaambo juunza mabala Mwami Leza uyoocita maleele.” 6Lino Josyuwa wakazooambila bapaizi kuti, “Amubweze bbokesi lyacizuminano, muzubuke bantu boonse kabatana.” Abalo bakacita mbubonya mbubakaambilwa.
7Lino Mwami Leza wakaambila Josyuwa kuti, “Nceticite sunu cilapa kuti Baisilayeli boonse bakulemeke, balaziba kuti ndilaanduwe mbubonya mbuli mbundakali aa Mozesi. 8Ambila bapaizi aabo babweza bbokesi lyacizuminano kuti basika buyo ankomwe yamulonga wa Jolodani, banjile-njile maanzi, akwiima.”
9Kumane Josyuwa wakaambila Baisilayeli kuti, “Amuboole kuno muswiilile majwi aa Mwami Leza wanu. 10Ndendilyo nomutizibe kuti Leza muumi ulaandinywe, alimwi nomutizibe kuti uyootanda ncobeni Bakenani, Bahiti, Bahivi, Bapelezi, Bageegasyi, Baamoli a Bajebusi. 11Amubone, bbokesi lyacizuminano ca Mwami wanyika yoonse mbwiibede lilazubusigwa mulonga wa Jolodani nywebo kamutana. 12Amusale baalumi bali kkumi ababili omwe-omwe kuzwa kumisyobo yoonse ya Baisilayeli. 13Nkabela bapaizi aabo bayumuna bbokesi lyacizuminano ca Mwami Leza, Mwami wanyika yoonse mbwiibede, mbobatikaalyatile buyo maanzi aamulonga, maanzi aayo ayooandaana akati akulundana lubazu lumwi alumwi.”
14Lino bantu nibakalonga aawo kuti bazubuke mulonga wa Jolodani, bapaizi aabo babweza bbokesi lyacizuminano bakeendela kumbele. 15Lyoonse litebulwa, mulonga wa Jolodani ulazula kapati. Pele bapaizi aabo bakali kunyamuna bbokesi lyacizuminano mbubakaalyatila buyo maanzi, 16mulonga nkuuli kutala wakaima. Maanzi akalundana mane kusikila kumunzi wa Adamu kumbali a Zaletani. Maanzi aakali kukunkila kulwizi lwa Alaba, nkokuti Lwizi lwa munyo akaandaana. Nkaako Baisilayeli bakazubuka mulonga aawo kulangana amunzi wa Jeliko. 17Bapaizi bakabwezede bbokesi lyacizuminano ca Mwami Leza, bakaima anyika njumu akati kamulonga wa Jolodani mane kusikila Baisilayeli boonse nibakamaninina kuzubuka anyika njumu.
Currently Selected:
Josyuwa 3: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
