Josyuwa 21
21
Minzi yakapegwa baLevi
1Lino bapati baziinga zyamusyobo wa Levi bakasika kuli Eliyazaa mupaizi, kuli Josyuwa mwanaa Nuni, akubapati baziinga zyamisyobo imwi ya Isilayeli. 2Ciindi eeci bakali ku Syilo mu Kenani bakabaambila kuti, “Mwami Leza kwiindila muli Mozesi wakalailila kuti muleelede kutupa minzi iijisi macelelo.” 3Mbubonya mbuli Mwami Leza mbwaakalailila, Baisilayeli bakapa Balevi minzi eeyi amacelelo aayo mukati kalukono lwabo.
4Mukowa wa Kohati nguwakasaanguna kupegwa minzi muziinga zyabo. Balevi balunyungu lwa Aloni mupaizi bakapegwa minzi iili kkumi aitatu kuzwa kumisyobo ya Juda, Simiyoni a Benjamini. 5Bamwi balunyungu lwa Kohati bakapegwa minzi iili kkumi kuzwa kuziinga zyamisyobo ya Efulemu, Dani acisela ca Manase.
6Lunyungu lwa Gesyoni lwakapegwa minzi iili kkumi kuzwa kuziinga zyamisyobo ya Isakaa, Asya, Nafutali, acisela ca Manase munyika ya Basyani.
7Lunyungu lwa Melali muziinga lwazyo lwakapegwa minzi iili kkumi aibili kuzwa kumisyobo ya Lubeni, Gadi, a Zebuluni. 8Mbombuboobu Baisilayeli mbubakapa Balevi minzi eeyi amacelelo aayo mbubonya mbuli Mwami Leza mbwaakalailila kwiindila muli Mozesi.
9Lino ngaaya mazina aminzi eeyo misyobo ya Juda a Simiyoni njibakapa 10kuli balunyungu lwa Aloni baciinga ca Kohati nkaambo mbibakawidwa cisolo cakusaanguna. 11Bakabapa Kiliyatiaaba, uuli ngu Hebuloni, amacelelo aawo aauzingulukide, munzi ooyu uli munyika yatulundu-lundu ya Juda. Aaba ngosikale wa Baanaki. 12Pele myuunda atunzi twakazingulukide munzi ooyu zyakapegwa kuli Kalebi mwanaa Jefune kuti zibe lukono lwakwe.
13Lunyungu lwa Aloni mupaizi lwakapegwa munzi wa Hebuloni, uuli munzi wakulivunina kuli yooyo wapegwa mulandu wakujaya. Bakapegwa aminzi ya Libuna, 14Gatii, Esyitemowa, 15Holoni, Debii, 16Aini, Juta, Betisyemesyi, antoomwe amacelelo aayo. Bakapegwa minzi iili fuka kuzwa kumisyobo yobilo eeyi.
17Kuzwa kumusyobo wa Benjamini bakapegwa minzi ya Gibiyoni, Geba, 18Anatoti, Alimoni, antoomwe amacelelo aayo. Bakapegwa minzi yone. 19Minzi yabapaizi balunyungu lwa Aloni antoomwe yakali kkumi aitatu kubikkilizya amacelelo aayo.
20Balevi baziinga zya Kohati bamwi bakapegwa minzi kuzwa kumusyobo wa Efulemu. 21Munyika yatulundu-lundu ya Efulemu, bakapegwa minzi yone, munzi wa Syekemu, uuli munzi wakulivunina kuli yooyo wapegwa mulandu wakujaya, Geza, 22Kibuzaimu, Betiholoni antoomwe amacelelo aayo. 23Kuzwa kumusyobo wa Dani bakapegwa minzi yone ya Eliteke, Gibbetoni, 24Aijaloni, Gatilimoni antoomwe amacelelo aayo. 25Kuzwa kucisela camusyobo wa Manase bakapegwa minzi yobilo ya Taanaki, Gatilimoni antoomwe amacelelo aayo. 26Minzi yoonse eeyi iili kkumi yakapegwa kuziinga zimwi zya Kohati.
27Balevi aabo baziinga zya Gesyoni bakapegwa minzi yobilo kuzwa kucisela ca Manase, minzi ya Golani mucisi ca Basyani, uuli munzi wakulivunina kuli yooyo wapegwa mulandu wakujaya, Beesyitala antoomwe amacelelo aayo. 28Kuzwa kumusyobo wa Isakaa bakapegwa minzi yone ya Kisyiyoni, Dabelati, 29Jaamuti, Eniganimu antoomwe amacelelo aayo. 30Kuzwa kumusyobo wa Asya bakapegwa minzi yone ya Misyali, Abudoni, 31Helikati, Lehobu antoomwe amacelelo aayo. 32Kuzwa kumusyobo wa Nafutali bakapegwa minzi yotatwe ya Kedesyi mucisi ca Galilii, uuli munzi wakulivunina kuli yooyo wapegwa mulandu wakujaya, Hamotidoo, Kaatani, antoomwe amacelelo aayo.
33Minzi yoonse yakapegwa ziinga zya Gesyoni yakali kkumi aitatu antoomwe amacelelo aayo.
34Balevi baciinga ca Melali bakapegwa minzi yoonse kuzwa kumusyobo wa Zebuluni eeyi, Jokineyamu, Kaata, 35Dimuna, Bahalali antoomwe amacelelo aayo. 36Kuzwa kumusyobo wa Lubeni bakapegwa minzi yone, ya Beza, Gohazi, 37Kedemoti, Mefaati, antoomwe amacelelo aayo. 38Kuzwa kumusyobo wa Gadi bakapegwa minzi yone, ya Lamoti mucisi ca Galilii uuli munzi wakulivunina kuli yooyo wapegwa mulandu wakujaya, Mahanaimu 39Hesyiboni, Jaza, antoomwe amacelelo aayo. 40Minzi yoonse yakapegwa ziinga zya Melali yakali kkumi aibili.
41Minzi yoonse ya Balevi eeyo yakali munyika ya Baisilayelinyina yakali makumi one alusele antoomwe amacelelo aayo. 42Munzi omwe-omwe wakalijisi macelelo aakuzingulukide. Minzi yoonse mbuyakabede oobu.
Nyika ya Baisilayeli
43Mbombuboobu Mwami Leza mbwaakapa Baisilayeli nyika yoonse eeyo njaakakonkezya kupa kuli basikale babo. Bakiitola akukkala mulinjiyo. 44Mwami Leza wakacita kuti kabacinyina nkondo mbubonya mbuli mbwaakakonkezya kuli basikale babo. Taakwe sinkondonyina naba omwe wakabayumina. Mwami Leza wakaaba basinkondonyina kulimbabo. 45Taakwe cisyomezyo comwe Mwami Leza ncaakasyomezya Baisilayeli catakacitika pe, zyoonse zyakacitika.
Currently Selected:
Josyuwa 21: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
