Josyuwa 20

Minzi yakulivunina

1Lino Mwami Leza wakaambila Josyuwa kuti, 2“Ambila Baisilayeli kuti basale minzi yakulivunina eeyo njindakamulailila kwiindila muli Mozesi, 3kutegwa muntu ooyo wajaya muntunyina muntenda kutali caali, kakonzya kutijila nkuko kuti alivune kuzwa kuli simukowanyina mufu. 4Kuti naa watijila kuli umwi waminzi eeyi, weelede kuti aakusika akaime amulyango wamunzi, kwamana akaambile bapati bamunzi mulandu wakwe. Ndendilyo nobakonzya kumuzumizya kunjila mumunzi akumupa busena bwakukkala ambabo. 5Kuti naa simukowa wamufu wamutandila, bapati aabo tabeelede kupa simulandu ooyo kuli simukowa wamufu, nkaambo taakwe naakamujaya acaali alimwi taakwe naakamusulide. 6Uleelede kukkala mumunzi mane kusikila bankuta bakamubeteke. Kwamana unookkede mumunzi ooyo kusikila kulufu lwamupaizi mupati. Ndendilyo nakonzya kupilukila kwakwe kumunzi ngwaakatijide.”

7Aboobo bakasala munzi wa Kedesyi mu Galilii, wakali munyika yatulundu-lundu ya Nafutali, Syekemu munyika yatulundu-lundu ya Efulemu, awa Kiliyatiaaba, uuli ngu Hebuloni wakali munyika yatulundu-lundu ya Juda. 8Mutala lyamulonga wa Jolodani kujwe lya Jeliko wakasala Beza uuli mugundu lyamusyobo wa Lubeni, amunzi wa Lamoti wakali mu Giliyadi munyika yamusyobo wa Gadi, amunzi wa Golani wakali mu Basyani munyika yamusyobo wa Manase. 9Kufumbwa Muisilayeli naba muzwamasi ngobakkala limwi wajaya muntunyina muntenda wakali kukonzya kutijila kuminzi eeyi yakasalwa. Taakwe simukowa wamufu walikunga wamujaya katanabetekwa abankuta.

Currently Selected:

Josyuwa 20: Tonga96

Highlight

Copy