Josyuwa 22
22
Misyobo yakali kujwe mbuyakabweeda
1Lino Josyuwa wakaita Balubeni, Bagadi, acisela ca Manase 2akubaambila kuti, “Mwakacita zyoonse Mozesi mubelesi wa Mwami Leza nzyaakalailila, alimwi ambebo mwakandiswiilila muli zyoonse nzindakamulailila. 3Kuzwa ciindi eeco kusikila sunu, taakwe nimwakalekelezya babunyoko, pele mwakazumanana akucita zyoonse eezyo Mwami Leza nzyaakamulailila. 4Lino akaambo kakuti Mwami Leza wanu wacita kuti babunyoko abalo balikkalile mbubonya mbuli mbwaakasyomezya, amubweede kuminzi yanu munyika eeyo Mozesi mubelesi wa Mwami Leza njaakamupa mutala lya Jolodani. 5Pele muleelede kubamba mulawo amalailile aayo Mozesi mubelesi wa Mwami Leza ngaakamupa aakuti, ‘Mweelede kuyanda Mwami Leza wanu, kweenda munzila zyakwe zyoonse, kubamba malailile aakwe, kumukakatila, akuti mumubelekele amyoyo yanu yoonse alimwi amuuya yanu yoonse.’” 6Amane Josyuwa wakabaleleka akulayana ambabo, eelyo bakabweeda kuminzi yabo. 7Lino cisela cimwi camusyobo wa Manase Mozesi wakacipede kale nyika mucisi ca Basyani, eeci cimwi Josyuwa wakacipa nyika kumbo lyamulonga wa Jolodani antoomwe a Baisilayelinyina. Nibakalayana Josyuwa wakabaleleka amajwi aakuti, 8“Mulabweeda kuminzi yanu alubono lwanu. Mulijisi ŋombe, nsiliva, ngolida, mukuba, lubulo, azisani zinji. Mwaakusika mukaabane lubono oolu ndumwakasaala kuli basinkondonyoko ababunyoko bamwi.”
9Mbombuboobu Balubeni, Bagadi, acisela ca Manase mbubakasiya Baisilayelinyina ku Syilo munyika ya Kenani akupilukila kunyika yabo ku Giliyadi. Nenyika eeyo njibakapegwa mbubonya mbuli Mwami Leza mbwaakalailila kwiindila muli Mozesi.
Mbubakayaka cipaililo kumbo lya Jolodani
10Lino nibakasika ku Geliloti kumbali lyamulonga wa Jolodani munyika ya Kenani, Balubeni, Bagadi acisela camusyobo wa Manase bakayaka cipaililo cipati cibotu.
11Lino Baisilayeli bamwi nibakamvwa kuti bakayaka cipaililo munsi amunyinza wa Kenani ku Geliloti kumbali amulonga wa Jolodani, 12mbungano yoonse ya Baisilayeli yakayoboloka antoomwe ku Syilo kuti bainke bakabalwane.
13Baisilayeli aabo bakatuma Fineyasi mwana wa Eliyazaa mupaizi kumisyobo ya Lubeni, Gadi, acisela ca Manase mucisi ca Giliyadi. 14Kwakainka anguwe baalumi basilutwe bali kkumi kuzwa mumisyobo ya Isilayeli yoonse muziinga zyanzubo zyabo. 15Nibakaakusika ku Giliyadi kwakali Balubeni, Bagadi, abacisela ca Manase, 16bakakananina mbungano ya Mwami Leza yoonse bakati, “Ino nkaambo nzi nimwakabisizya Leza wa Isilayeli boobu? Mwamuzangila Mwami Leza mukuyaka cipaililo canu eeci. 17Eena cibi cakacitwa ku Peyo cakaceya? Tee Mwami Leza wakatusubula acuumo, nikuba boobo asunu tatunalisalazya kuzwa kucibi ciya pe. 18Sena ono muyanda kuleka kutobela Mwami Leza? Kuti naa sunu mwazangila Mwami Leza, juunza mabala uyoonyemena bantu bakwe Baisilayeli boonse. 19Kuti nyika iino njimwakapegwa kiisofweede, kamuza munyika ya Mwami Leza, ooko kuli tente lyakuswaanganina, tuzooabane nyika. Ncibi kuzangila Mwami Leza akutuzangila swebo kwiindila mukuyaka cipaililo canu nobeni citali cipaililo ca Mwami Leza wesu. 20Mulayeeya Akani mwanaa Zela naakabba zintu zyakasinganyizigwa, Mwami Leza wakasubula Baisilayeli boonse. Tali Akani buyo wakafwa akaambo kacibi cakwe.”
21Mpawo Balubeni, Bagadi, abacisela ca musyobo wa Manase bakaingula basilutwe baziinga zya Baisilayeli kuti, 22“Leza Singuzu, Mwami Leza alikke nguuzi. Ono twati anywebo Nobaisilayeli amuzibe. Kuti naa twakacita cintu eeci kuti tuzange naa tutaswiilili Mwami Leza, mutatweengeleli pe. 23Kuti naa twakayaka cipaililo cesu kuti tuleke Mwami Leza, a kupa zipaizyo zyakutenta azyamaila azituuzyo zyalumvwano, Mwami Leza lwakwe atusubule. 24Peepe, ncitwakacita boobu nkaambo twakayoowa kuti ambweni mumazuba aaza lunyungu lwanu lukaambile lunyungu lwesu kuti, ‘Mujisi lubazu nzi nywebo a Mwami Leza, Leza wa Isilayeli? 25Mwami Leza wakabikka mulonga wa Jolodani kuti ube munyinza akati kesu andinywe, nywebo Nobalubeni, Bagadi acisela ca Manase. Munyina lubazu a Mwami Leza.’ Nkaako lunyungu lwanu luyoocita kuti lwesu lukaleke kukomba Mwami Leza. 26Ncenciceeco ncitwayeeya kuti tuyake cipaililo. Tacili cakutentela naa kutuuzizya pe. 27Twakaciyakila kuti cibe bumboni akati kesu andinywe akumazyalani aayo aayooccilila, kuti tuyookomba Mwami Leza kuŋanda yakwe akuyoopa zipaizyo zyesu, zyakutenta, zituuzyo alimwi azyalumvwano. Aboobo lunyungu lwanu talukooyooambila lunyungu lwesu kuti, ‘tamujisi lubazu a Mwami Leza.’ 28Aboobo twakayeeya kuti, ‘Kuti naa eeci cikacitike kuli ndiswe nikuba kulunyungu lwesu, tuyooingula kuti amulange ciya cili mbubonya mbuli cipaililo ca Mwami Leza, eeco basikale besu ncibakayaka, tacili cakutentela naa kutuuzizya, pele mbumboni akati kesu andinywe.’ 29Tatukonzyi kuzangila Mwami Leza akumukaka kwiindila mukuyaka cipaililo cakutentela akutuuzizya, kunze lyacipaililo ca Mwami Leza wesu eeco cili kumbele lyatente lyakwe.”
30Aawo Fineyasi mupaizi antoomwe abapati abasilutwe baziinga zya Baisilayeli nibakamvwa nzibakaamba Balubeni, Bagadi, a Bamanase bakabotelwa kapati. 31Mpawo Fineyasi mwana wa Eliyazaa mupaizi wakaambila Balubeni, Bagadi, a Bamanase kuti, “Sunu twaziba kuti Mwami Leza ulaandiswe nkaambo taakwe nimwakaleka kusyomeka ku Mwami Leza muli ceeci ncimwakacita. Lino mwavuna Baisilayeli kuzwa kubukali bwa Mwami Leza.”
32Nkaako Fineyasi mwana wa Eliyazaa mupaizi, abasilutwe baya bakapilukila ku Kenani nibakamana muswaangano wabo a Balubeni, Bagadi, acisela Manase bakali kukkala mu Giliyadi baakwaamba makani oonse ku Baisilayeli. 33Baisilayeli bakabotelwa kapati nibakamvwa makani aayo, bakalumbaizya Leza. Lino tiibakacili kukanza limbi kuyoobalwana akuyoonyonyoona nyika eeyo yakali kukkala Balubeni, Bagadi aba Manase.
34Aaawo Balubeni, Bagadi bakaulika alimwi aba Manase cipaililo eeci kuti, “Bumboni,” nkaambo bakati, “Mbumboni akati kesu kuti Mwami Leza ngu Leza.”
Currently Selected:
Josyuwa 22: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
