Josyuwa 19

Nyika yakapegwa musyobo wa Simiyoni

1Nyika yabili yakapegwa kumusyobo wa Simiyoni muziinga zyabo. Nyika yabo yakali akati mucisi camusyobo wa Juda. 2Yakali kujatikizya a Biyasyeba, naa Syeba, Molada, 3Hazasyuwali, Bala, Ezemu, 4Elitoladi, Betuli, Hooma, 5Zikilagi, Betimaakaboti, Hazasusa, 6Betilabaoti, awa Syaluheni. Minzi yoonse eeyi yakali kkumi aitatu kubikkilizya atunzi twayo. 7Kwakali minzi imwi ya Aini, Limoni, Eta, awa Asyani, yakali iine kubikkilizya atunzi twayo. 8Alimwi kwakali atumwi tunzi twakazingulukide minzi eeyi mane kuyoosika ku Baalatibiya, naa Lama ku Negebu. Oolu ndulwakali lukono lwa Basimiyoni muziinga zyabo. 9Lukono lwa Basimiyoni lwakazwa kucaabilo camusyobo wa Juda, wakajisi caabilo cipati kwiinda. Ncenciceeco Basimiyoni ncibakapegwa lukono lwabo kuzwa kucisi cabo.

Nyika yakapegwa musyobo wa Zebuluni

10Watatu kupegwa nyika mmusyobo wa Zebuluni muziinga zyabo. Munyinza wanyika yabo wakali kusika ku Salidi. 11Munyinza wabo wakaindilila mane waakusika kumbo ku Malala, ngooyo waakusika ku Dabbesyeti, mane kuyoosika kukalonga kali kumbali aaku Jokineyamu. 12Kuzwa ku Salidi wakagama kujwe kucisi ca Kisilotitaboo, waindilila waakusika ku Dabelati aku Jafiya. 13Kuzwa kooko wakaciluleme kujwe ku Gatihefa aku Etikazini, mane waakusika ku Limoni, umane ngooyo wakanyonena ku Neya. 14Ooko munyinza wakanyona alimwi wagama lwakunyika ku Hanatoni waakugolela kukkuti lya Iputaeli. 15Wakali kujatikizya aminzi ya Katati, Nahalali, Syimuloni, Idala, awa Betelehemu. Minzi yoonse eeyi yakali kkumi aibili kubikkilizya atunzi twayo. 16Minzi eeyi atunzi twayo njiyakali lukono lwamusyobo wa Zebuluni muziinga zyabo.

Nyika yakapegwa musyobo wa Isakaa

17Wane kupegwa nyika mmusyobo wa Isakaa muziinga zyabo. 18Munyinza wanyika yabo wakali kujatikizya munzi wa Jezuleeli, Kesuloti, Syunemu, 19Hafalaimu, Syioni, Anahalati, 20Labbiti, Kisyiyoni, Ebezi, 21Lemeti, Eniganimu, Enihadaa, awa Betipazezi. 22Munyinza wabo wakali kusika ku Taboo, Syahazuma, aku Betisyemesyi, akuyoogolela kumulonga wa Jolodani. Minzi eeyi yoonse yakali kkumi acisambomwe kubikkilizya atunzi twayo. 23Minzi eeyi atunzi twayo njiyakali lukono lwamusyobo wa Isakaa muziinga zyabo.

Nyika yakapegwa musyobo wa Asya

24Wasanu kupegwa mmusyobo wa Asya muziinga zyabo. 25Munyinza wanyika yabo wakali kujatikizya munzi wa Helikati, Hali, Beteni, Akisyafu, 26Alameleki, Amadi, awa Misyali. Munyinza nkuuli kumbo wakali kusika ku Kaameli aku Syiholibunati. 27Umane ngooyo wakanyonena kujwe ku Betidagoni, waakusika ku Zebuluni akkuti lya Iputaeli wagama kunyika ku Betiemeki a Neiyeli, waakwiinda munzi wa Kabuli nkuuli kulumwensi. 28Kuzwa kooko wakalulama ku Abudoni, Lehobu, Hamoni, a Kana mane kuyoosika ku Sidoni mupati. 29Kuzwa kooko munyinza wakanyonena ku Lama mane waakusika kulukwakwa lwamunzi wa Taya, umane ngooyo wakagama ku Hosa, waakusika kulwizi mucuundu ca Akizibu, 30Uma, Afeki, a Lehobu. Minzi yoonse eeyi yakali makumi obilo kubikkilizya atunzi twayo. 31Minzi eeyi atunzi twayo njiyakali lukono lwamusyobo wa Asya muziinga zyabo.

Nyika yakapegwa musyobo wa Nafutali

32Wacisambomwe kupegwa nyika mmusyobo wa Nafutali muziinga zyabo. 33Munyinza wakali kutalikila ku Helefu kumusamu mupati uuli ku Zaananimu, ngooyo waakwiinda ku Adaminekebu a Jabuneeli, mane kuyoosika ku Lakumu waakugolela kumulonga wa Jolodani. 34Ooko munyinza wakainda kumbo ku Azinotitaboo ngooyo waakusika ku Hukoki. Umane ngooyo waakusika ku Zebuluni kumusanza, Asya waakuubikka lwaambo, mulonga wa Jolodani wakali kujwe. 35Minzi yakali munkwakwa yakali Zidimu, Zee, Hamati, Lakati, Keneleti, 36Adama, Lamahazoo, 37Kedesyi, Edileyi, Enihazoo, 38Iiloni, Migidaleli, Holemu, Betianati, awa Betisyemesyi. Minzi eeyi yoonse yakali kkumi afuka kubikkilizya atunzi twayo. 39Minzi eeyi atunzi twayo njiyakali lukono lwamusyobo wa Nafutali muziinga zyabo.

Nyika yakapegwa musyobo wa Dani

40Waciloba kupegwa nyika mmusyobo wa Dani muziinga zyabo. 41Nyika yabo yakali kujatikizya minzi ya Zola, Esyitaoli, Ilisyemesyi, 42Syaalabini, Aijaloni, Itila, 43Eloni, Timuna, Ekiloni, 44Eliteke, Gibbetoni, Baalati, 45Jehudi, Benebelaki, Gatilimoni, 46Mejakoni, awa Lakoni abusena bulangene a Jopa. 47Pele Badani nibakabona kuti cabayumina kapati kutola nyika yabo, bakainka kuyoolwana munzi wa Lesyemu, bakuuzunda akujaya bantu boonse bamumo. Bakakkala mu Lesyemu akuulika kuti Dani zina lyasikale wabo. 48Minzi eeyi kubikkilizya atunzi twayo njiyakali lukono lwamusyobo wa Dani muziinga zyabo.

Nyika yakapegwa Josyuwa

49Lino nibakamanizya kupambaula nyika muminyinza yabo, Baisilayeli bakapa Josyuwa mwanaa Nuni caabilo cakwe akati kabo, 50mbubonya mbuli Mwami Leza mbwaakalailila. Bakamupa munzi wa Timunatisela. Munzi ooyu ngonguwe ngwaakakumbila, wakali munyika yatulundu-lundu mu Efulemu. Wakayakulula munzi ooyu akukkala mulinguwo.

51Eezi nzezisi eezyo Eliyazaa mupaizi a Josyuwa mwanaa Nuni abapati bamisyobo ya Isilayeli nzibakapa kwiindila mukuuma cisolo ku Syilo kumbele lya Mwami Leza kumanjililo aatente lyakuswaanganina. Mbombuboobu mbubakapambaula nyika.

Currently Selected:

Josyuwa 19: Tonga96

Highlight

Copy