Josyuwa 17
17
Nyika yakumbo lya Jolodani
1Lino ndoolu lukono lwamusyobo wa Manase, mwana wakusaanguna wa Josefa. Makii wakali mwana wakusaanguna wa Manase. Makii wakali ngosikale wa Bagiliyadi. Ooyu nguwakatola munzi wa Giliyadi awa Basyani, nkaambo Bamakii bakali basilumamba bayumu. 2Nyika yakali kumbo lyamulonga wa Jolodani yakapegwa Bamanase boonse muziinga zya Abiyeza, Heleki, Asiliyeli, Syekemu, Hefa a Syemida. Mbaaba bamwi balunyungu lwa Manase mwanaa Josefa muziinga zyabo. 3Zelofehadi mwanaa Hefa, mwanaa Giliyadi, mwanaa Makii, mwanaa Manase wakazyala bana basimbi balo, mazina aabo ngaaya: Mala, Nowa, Hogila, Milika a Tiiza. 4Basimbi aaba bakainka kuli Eliyazaa mupaizi akuli Josyuwa mwanaa Nuni, akubasololi bamwi baakuti, “Mwami Leza wakalailila Mozesi kuti, atupe lukono lwesu akati kabakwesu.” Nkaako Josyuwa wakabapa lukono lwabo antoomwe abana bokwabo wisi, mbubonya mbuli Mwami Leza mbwaakalailila. 5Ncenciceeco Manase ncaakatambula zyaabilo zili kkumi kunze aanyika ya Giliyadi a Basyani zili kujwe lyamulonga wa Jolodani. 6Wakazitambula nkaambo kakuti lunyungu lwabana basimbi alwabalombe lwakapegwa nyika. Nyika ya Giliyadi yakapegwa kuli balunyungu lwa Manase bamwi.
7Nyika ya Manase yakali kutalikila ku Asya mane kuyoosika ku Mikimetati kujwe lyaku Syekemu. Kuzwa kooko munyinza wabo wakali kwiinda kumusanza mane waakujatikizya abantu bakali kukkala ku Enitapuwa. 8Manase nguwakali aanyika ya Tapuwa, pele munzi wa Tapuwa wini uuli amunyinza anyika ya Manase wakali wa Baefulemu. 9Kuzwa kooko munyinza wakaindilila wagama kumusanza kukalonga ka Kana. Ooko kwakali minzi ya Baefulemu yakali akati kaminzi ya Manase. Kulubazu oolu munyinza wa Manase wakali kalonga nkokali kunyika nkabela walo wakali kugolela mulwizi. 10Nyika yakumusanza yakali ya Efulemu yakubbazu lyakunyika yakali ya Manase. Nyika ya Manase yakali kugolela kulwizi, kubbazu lyakunyika nkubakali kupana munyinza a Asya, kujwe nkubakali kupana munyinza a Isakaa. 11Muzisi zya Isakaa a Asya, Manase wakajisi minzi ya Betisyani, Ibiliyamu, antoomwe abantu bamumunzi wa Doo, uuli kumbali aankomwe, Endoo, Taanaki, awa Megido antoomwe atunzi twayo. 12Pele nikuba boobo Bamanase tiibakakonzya kutanda bantu bakali kukkala muminzi eeyi pe. Nkaako Bakenani bakacilikkede munyika eeyo. 13Nikuba kuti Baisilayeli bakaba aanguzu, taakwe nibakatanda Bakenani, pele bakabacita bazike.
Baefulemu a bamanase mbubakakumbila nyika iimbi
14Lino balunyungu lwa Josefa bakabuzya Josyuwa kuti, “Ino nkaambo nzi ncookatupa nyika nsyoonto? Bona mazuba aano tuli banji kapati nkaambo Mwami Leza watuleleka.”
15Josyuwa wakaingula kuti, “Kuti naa muli banji alimwi nyika yatulundu-lundu ya Efulemu yamuceela, kamuya munyika ya Bapelezi a Balefa mukaakuteme cisaka, ibe nyika yanu.”
16Mpawo balunyungu lwa Josefa bakaingula kuti, “Nyika yatulundu-lundu yatuceela, alimwi Bakenani boonse bakkala mucibanda bajisi nkalaki zyalubulo. Nkalaki nzyalubulo zyabaabo bakkala mu Betisyani, atunzi twawo abaabo bakkala mukkuti lya Jezuleeli.”
17Pele Josyuwa wakaambila balunyungu lwa Josefa, nkokuti ziinga zya Efulemu a Manase kuti, “Muli bantu banji alimwi muli basinguzu. Tamutibe buyo acaabilo comwe pe. 18Nyika yatulundu-lundu ilaba yanu, nikuba kuti ncisaka muyoocitema mane kuyoosika kumagolelo aaco. Nyika iyooba yanu nikuba kuti Bakenani bajisi nkalaki zyalubulo alimwi mbayumu, muyoobatanda.”
Currently Selected:
Josyuwa 17: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
