Jona 1
1
Jona mbwaatakaswiilila Mwami Leza
1Majwi aa Mwami Leza akasikila Jona mwana wa Amitayi, aakuti, 2“Koya kumunzi mupati wa Nineva akuukambaukile, nkaambo ndibwene bubi bwawo.” 3Pele Jona wakatija Mwami Leza, wagama ku Taasyisyi. Wakaya ku Jopa, ooko wakaakujana bwato bwakali kuya ku Taasyisyi, aboobo wakabbadela mali aakunjizya, wakanjila akuunka ku Taasyisyi katija Mwami Leza. 4Mpawo Mwami Leza wakacita kuti kuunge guwo pati mulwizi, cakuti guwo eeli lyakacita kuti bantu bayeeye kuti lilajaya bwato. 5Basibwato boonse bakayoowa, umwi aumwi wakali kukomba kuli Leza wakwe. Mpoonya bakasowa mpasya mulwizi kuti bwato buubilwe-ubilwe. Pele Jona wakainkide mutwaanda twaansi twabwato, ooko wakalala cakuti ŋonzi zyakali mutolede kapati.
6Aawo mupati wabwato wakainka kwakalede Jona akuyooti, “Ino mbubuti mboona yebo? Buka ukombe kuli leza wako! Ambweni inga waba natubona, eelyo tatukooloba.”
7Mpoonya basibwato bakati kuli umwi aumwi, “Amuboole tuume cisolo kutegwa tuzibe muntu ooyo watuletela mapenzi aaya.” Nibakauma cisolo, cakawida Jona. 8Nkaako bakamubuzya kuti, “Twaambile ino nguni watuletela mapenzi oonse aaya aali boobu? Ino ucita nzi kuno? Uzwa kuli? Uzwa kucisi nzi? Uli musyobo nzi?”
9Jona wakaingula kuti, “Ndi Muhibulu, ndikomba Mwami Leza wakujulu, ooyo wakalenga lwizi anyika.”
10Bamvwe ceeci bakayoowa akubuzya kuti, “Ino wakacita nzi?” Bakaziba kuti wakali kutija Mwami Leza nkaambo Jona wakalibaambilide kale. 11Lino lwizi lwakali kukapaika kapati. Nkaako bakamubuzya kuti, “Ino kayi tukucite buti kutegwa lwizi lutubatamine?”
12Walo wakaingula kuti, “Amundiwaale mulwizi nolutibatame. Ndizi kuti mulandu wangu nguwacita kuti guwo pati eeli limubbubbwide.”
13Bamvwe boobo baalumi aabo bakasoleka kuti bakwasule bwato buye kunkomwe. Pele tiibakakonzya pe, nkaambo guwo lyakabbubbulisya kwiinda lutaanzi. 14Mpawo bakakomba ku Mwami Leza bakati, “O Mwami Leza, utalekeli kuti tufwe akaambo kabuumi bwamuntu ooyu ngotuyanda kusowa. Utatupi mulandu wakujaya muntu ooyu uutakwe mulandu, nkaambo yebo O Mwami Leza wacita eeco cikubotela.” 15Mpawo bakabweza Jona akumusowela anze lyabwato, aawo lwizi lwakali kukapaika lwakabatama. 16Akaambo kaceeci baalumi aabo bakayoowa kapati, mpawo bakapa cipaizyo ku Mwami Leza akukonkezya muzina lyakwe.
17Lino Mwami Leza wakaleta nswi mpati kuti imene Jona, nkabela Jona wakakkala mwida lyanswi kwamazuba otatwe amasiku aawo.
Currently Selected:
Jona 1: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
