Jobo 40
40
1Aboobo Leza wakati kuli Jobo,
2“Sena yebo ulakonzya kukazyanya a Singuzuzyoonse?
Ooyo uukazyanya a Leza aamwiingule.”
3Mpoonya Jobo wakaingula Mwami Leza wakati,
4“Langa mebo ndimuntu buyo,
ino inga ndakwiingula buti? Taakwe ncentaaambe.
5Ndalaambide kale, aboobo nsikooingula kabili pe.”
6Eelyo Leza wakaingula Jobo kuzwa mukambizi wakati,
7“Koba mwaalumi undiingule.
8Sena uyanda kundijanina kampenda?
Sena uyanda kundipa mulandu kutegwa yebo ululamikwe?
9Sena ulijisi nguzu zili mbuli zyangu?
Sena jwi lyako lilazuma mbuli lyangu?
10Naa mbombuboobo lisamike, lisakatizye bulemu ampuwo.
11Kolanga kuli boonse aabo balisumpula, bakalalile, ubabombye.
12Iiyi, balange boonse aaba balisumpula ubafwiinsye.
Ubalyatauke babi aawo mpoonya mpobaimvwi.
13Bazikke antoomwe boonse mucuumbwe,
ubaange kubusena bwabafu.
14Eelyo ambebo ndiya kukulumbaizya,
kuti wazunda anguzu zyako omwini.
15“Kolanga civubwe ngwendakalenga mbubonya
mbuli mbundakakulenga ayebo, ulalya bwizu mbuli musune.
16Kolanga nguzu zyamubili wakwe, anguzu zili mumisisa yakwe.
17Mucila wakwe uluuyumya mbuli mukamba,
alimwi buzingo bwazibelo zyakwe bulaangene antoomwe.
18Zifuwa zyakwe nziyumu mbuli mukuba,
zizo zyakwe zili mbuli mingwala yalubulo.
19Ngomunyama mupati wamilimo yangu,
ooyo wakamupanga alikke nguukonzya kumuzunda.
20Nkaambo kutala nkwajana cakulya,
ooko banyama boonse bamusokwe nkobasobanina.
21Ulalala munsi aampana, amuzisitilizyo zyamabu amubuntolo.
22Nkaambo ulayusa, mpangala zilamuvumbilila,
atwalo tusamu-samu twamumulonga tulamuzinguluka.
23Langa, kuti naa mulonga ulawalauka tauyoowi pe,
talipenzyi nikuba kuti mulonga wa Jolodani wamuvuumukila.
24Sena kuli muntu uukonzya kumuca atulobyo,
naa nguni uunga ulakonzya kumuca kumpemo akakole?
Currently Selected:
Jobo 40: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
