Jobo 41
41
1“Sena ulakonzya kulobola ciwena akalobyo,
naa kwaanga mulaka wakwe akakole?
2Sena ulakonzya kumutunga lumingwa,
naa kuyasa mweebo wakwe akalobyo?
3Naa wamuca, sena uyookukombelezya kuti umuleke?
Sena uyookanana kulinduwe amajwi mabombe?
4Sena uyoopanga cizuminano anduwe
kuti ukamutole akakubelekele lyoonse?
5Sena ulakonzya kusobana anguwe mbubonya mbuli mbosobanya muyuni,
akuti naa ulakonzya kumubikka mucizangala kuti beebele basimbi?
6Sena basimakwebo balakonzya kumusambala?
Sena ulakonzya kwaabanwa akati kabasambazi?
7Sena ulakonzya kumuyasa atusumo,
naa kukonzya kuyasa mutwe wakwe amyuumba?
8Naa wamujata amaanza ulakulwana,
eelyo tokooyooinduluka kabili pe.
9Masimpe, muntu uumulanga ulabwembwa, ulagonkelwa akuwa.
10Taakwe ulaacamba cakumubusya,
aboobo nguni ooyo uukonzya kukwankwana andime nde Leza?
11Nguni wakandipede cintu kutegwa ndimupilusizye?
Coonse eeco cili kunsi aajulu ncicangu.
12“Lino ndikwaambile makani aazizo zyaciwena,
naa nguzu zyakwe mpati, abubumbe bwakwe.
13Nguni uukonzya kutenda maamba aakwe?
Nguni uukonzya kufunda cikutu cakwe?
14Nguni uukonzya kwaasamuna kameneno kakwe?
Meno aakwe alayoosya.
15Musana wakwe ujisi milongo yamaamba mbuli ntobo, alijatene.
16Kaamba kamwi akamwi kaliswaangene
cakunga luuwo talukonzyi kunjila akati kato.
17Tulijatene kamwi akamwi cakuti tatukonzyi kupambaulwa pe.
18Kweesyemuka kwakwe kulamwesya mulilo,
aalo meso aakwe ali mbuli mitungazuba yakubucedo.
19Kuzwa kumulomo wakwe kulazwa gunzila lyamulilo,
nsasi zyamulilo zilapasauka.
20Mumpemo yakwe mulazwa busi,
mbuli kuti mbusi buzwa mumpoto iibila naaba matete aapya.
21Kuyoya kwakwe kulafulida mukala,
amulilo ulazwa mumulomo wakwe.
22Nguzu zyakwe zili munsingo,
boonse baswaangana anguwe balayoowa.
23Cikanda cakwe cilijisini antoomwe,
nciyumu tacikwe bufunde.
24Camba cakwe nciyumu mbuli bbwe,
muyumu mbuli ziyo libbide muvu.
25Ciindi nakatuka basinguzu balayoowa,
ciindi naandulula, balatuntuma.
26Nikuba kuti panga lyamuyasa talinjili,
niliba sumo, nuuba muumba, nikaba kalembe.
27Muumba nkezu buyo kulinguwe,
sumo lyamukuba ndukuni lubolede kulinguwe.
28Muvwi tuukonzyi kumutanda,
kulinguwe mabwe aankwibba makuba buyo.
29Nkoli nkezu buyo kulinguwe,
walo umweta-mweta buyo bantu bamufusa masumo.
30Maamba aada lyakwe ali mbuli nkaye,
kweenda kwakwe kuli mbuli cilayi cainda muntimba.
31Ulacita maanzi malamfu kuti abile mbuli cibiya,
ulacita lwizi lukwase mbuli nongo yamafuta.
32Mpaainda ulasiya mufundudu uumweka,
inga umwi kayeeya kuti ambweni maanzi atubuluka buyo.
33Munyika kwiina cilenge ceelene anguwe, nkaambo tayoowi.
34Banyama boonse balamuyoowa,
walo ngomwami wazilenge zyoonse zilisumpula.”
Currently Selected:
Jobo 41: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
