Jobo 18
18
Bilidadi
1Mpoonya Bilidadi Musyuwa wakaingula kuti,
2“Ino uyooleka lili kuvuzya majwi?
Liyeeyele kabotu, eelyo tulakanana.
3Nkaambo nzi ncotubalwa mbuli ŋombe mfuba-mfuba kulinduwe?
4Olizazaula mukunyema kwako, sena nyika itakatwe akaambo kako,
naa ndomba ligwisigwe kuzwa mubusena bwalyo?
5Mumuni wabuumi bwamuntu mubi ulazimwa, iiyi, mulilo wakwe tuumweki pe.
6Muŋanda yakwe muli mudima, muzenge wakwe ulazimwa.
7Ntaamo zyakwe zilamfu ziyoofwiinsigwa,
miyeeyo yakwe mwini ilamuwisya.
8Maulu aakwe mwini alamunjizya mukanyandi,
ulawida mudindi livumbilidwe.
9Kkole lisisilidwe nguwe munyika,
cisilazya citeedwe nguwe munzila.
10Kagece kalamuca kasindi, kakole kalamujatisya.
11Ziyoosya zilamukonga koonse-koonse,
zilamutandaanya kufumbwa nkwaaya.
12Nzala ilamugonkezya, mapenzi alaafwiifwi kumusikila.
13Lukanda lwakwe lwaligwa cilwazi, cinsenda calya zizo zyakwe.
14Wazyulwa kuzwa muŋanda mwaali kulikwaya,
wadudilwa kumwami walufu.
15Mutente lyakwe taakwe cilimo cicili cakwe,
mabwe aayaka aasalufu amwailwa mucikkalilo cakwe.
16Miyanda yakwe ilayuma, yali mitabi yapusama.
17Mpuwo yakwe iyooloba munyika, zina lyakwe talikayeeyegwi limbi.
18Wagwisigwa mumumuni waya mumudima, wazimaanyizigwa munyika.
19Tajisi bana nibaba bazyukulu akati kabantu bokwabo,
naba simulyazina ooko nkwaakakkede.
20Aabo bakkede kumbo bayookankama,
bayookankamana baakumvwa ceeco, bazwa kujwe bayoobwembwa.
21Mbombuboobu mbwaabede mamanino aabantu bataluleme,
mbocibede kuli ooyo uutayandi zya Leza.”
Currently Selected:
Jobo 18: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
