Jobo 19
19
Jobo
1Mpawo Jobo wakati,
2“Mulandipenzya ciindi cilamfu cili buti,
akundizazaula amajwi aanu?
3Kwaziindi eezi zili kkumi mwali kundisinsa,
sena tamufwi nsoni kundoombya?
4Ncobeni naa cili kasimpe kuti ndakabisya,
kubisya nkukwangu ndemwini.
5Kuti kamundilwana mukulisumpula kwanu,
akusola kutondezya kuti ndimubi nkaambo kamapenzi aangu,
6amuyeeye kuti Leza nguwandibikka mububi akundica mukanyandi.
7Nikuba kuti ndoompolola kuti, ‘Ndafwa!’ taakwe uundiingula pe,
ndoompololesya pele taakwe uundilulamikila mulandu.
8Leza wakasinka nzila yangu, kutegwa nditaindi,
nzila zyangu zyoonse wazisisa mumudima.
9Wandisamununa bulemu bwangu,
wagwisya musini kumutwe wangu.
10Wanduuma koonse-koonse, ndamana,
lulangilo lwangu waluzyula mbuli musamu.
11Wandinyemena kapati, wandilanga mbuli sinkondonyina.
12Basilumamba bakwe balalibunganya antoomwe,
bakabamba zibelesyo zyakundilwanya bazinguluka ŋanda yangu kuti bandisaale.
13Abalo banabokwesu Leza wabatantamuna kuzwa kulindime,
abalo beenzuma balindiyaamukide.
14Bamukowa wangu bandisiya, beenzuma bandiluba.
15Beenzu bandiluba, ababelesi bangu basimbi
bandilanga mbuli mweenda nzila, ndaba wamasi kulimbabo.
16Ndaita mubelesi wangu, tandiinguli pe,
ndileelede kumukombelezya kuti andibelekele.
17Ndanunka kumukaintu wangu, ndasesemya akubana bokwesu.
18Mane abana basyoonto balandisampaula, bandibona balandinonga.
19Beenzuma boonse mbotuzibene kapati balandisesemwa,
aabo mbendakali kuyanda balandilwana.
20Ndasyaala mafuwa aalaalo, ndafutukila kumpela aalwala.
21Amundibede aaluse, akaka amundibede aaluse,
nywebo nobeenzuma nkaambo janza lya Leza lyanduuma!
22Nkaambo nzi ncomundiccilila mbuli Leza mbwacita?
Sena kunditundulula kwanu takugoli?
23Nicabota majwi aangu naalembwa! Kuti kaalembwa mubbuku!
24Naalembwa acilembyo calubulo, kaasimbwa abbwe kuti akale kutamani.
25Nkaambo ndizi kuti Muvuni wangu mmuumi,
akuti kumamanino uyooima anyika.
26Lino lukanda lwangu lwaakumana kunyonyoonwa,
amubili ooyu njoomubona Leza.
27Njoomubona ameso aangu eeni,
mebo lwangu kutali uumbi, moyo wangu wanetuka.
28Pele nywebo muti, ‘Tulamupenzya buti?’
Alimwi mwaamba kuti, ‘Tulajana bubi nzi mulinguwe?’
29Amuyoowe panga lya Leza, nkaambo bukali bwakwe buleta
cisubulo kuli basizinyonyoono, kuti muzibe kuti kuli uubeteka.”
Currently Selected:
Jobo 19: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
