Jobo 11
11
Zofa
1Mpoonya Zofa Munaamati wakaingula kuti,
2“Sena majwi manji aali boobu abufuba-fuba taaelede kwiingulwa?
Alimwi muntu munkanwe sena inga walulamikwa amajwi manji aakwe?
3Sena bantu tabakonzyi kwiingula majwi aako aabuyo?
Sena olikusabula taakwe uukonzya kukukazya?
4Waamba kuli Leza kuti, majwi aako ngakasimpe,
alimwi ndilondokede kuli nguwe.”
5Akaka, Leza naali kwaambwa limwi sunu naakutapatila.
6Kakwaambila maseseke aabusongo, alo aagambya kwiindilila.
Koziba kuti Leza takusubuli mbuli bweelede milandu yako.
7Sena ulakonzya kuyubununa zigambya zya Leza?
Inga ulaziba aasimpila busongo bwa Singuzuzyoonse?
8Busongo bwiinda bulamfu bwajulu, ani utyani yebo?
Busongo bwakwe mbulamfu kwiinda kucikkalilo cabafu, ncinzi ncozi yebo?
9Bweeleke bwambubo mbulamfu kwiinda nyika,
alimwi buli kwazeme kwiinda lwizi lupati.
10Kuti naa waboola, wakwaanga akukubeteka,
nguni uukonzya kumukasya?
11Walo Leza ulaziba basiluuni,
ulizizi zibi kakutakwe akuvuntauzya.
12Pele muntu mufuba-fuba takonzyi kuba musongo,
mbubonya mbuli mbongolo yamusokwe mbwiitakozyi kuzyalwa kiibombede.
13Kuti naa moyo wako wuupa kulinguwe,
ulakonzya kukombelezya luse kuli Leza.
14Kuti naa ujisi cibi, acizwe mumoyo wako.
Kutabi bubi nibuba buti mubuumi bwako.
15Ndendilyo nonga wanongomana kakunyina akuusa, uyooba muyumu uutayoowi.
16Uyooluba mapenzi aako, uyooayeeya buyo
mbuli maanzi aafwipi-fwipi akwiinda.
17Alimwi buumi bwako buyoobala kwiinda zuba nolitwa mwaaba,
azyalo ziindi zyamudima wamapenzi aako ziyoomana
mbuli bwiinda masiku ciindi cacifumo-fumo.
18Uyooliiba akutangala.
Uyookwabililwa alimwi uyoolyoonena.
19Taakwe uuyookuyoosya, banji bayoolomba kuti ubagwasye.
20Babi bayoolangaula lugwasyo cabuyo,
tabakajani matijilo, aboobo lulangilo lwabo nkufwa buyo.
Currently Selected:
Jobo 11: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
