Jobo 12
12
Jobo
1Mpoonya Jobo wakaingula wakati,
2“Kakutakwe akuzumbauzya nywebo muli bantu,
abwalo busongo bwanu buyoofwidilizya andinywe.
3Pele ambebo ndijisi maanu mbubonya mbuli ndinywe,
nywebo tamundiindi pe.
Nguni uutezi zintu zili mbuli zeezi nzimwaamba?
4Lino ndabacisesyo kubeenzuma, mebo nindakali kukomba kuli Leza
walo wakali kundiingula, ndimuntu uululeme uutakwe kampenda nikuba kuti ndabacisesyo.
5Bakkede kabotu balabaubaula aabo babulide coolwe.
Muntu nalebwa, mulamuuma.
6Bafumpi baliliibide, abalo basoka Leza balalikwaya,
aabo banga Leza wabo ninguzu zyabo.
7“Pele buzya banyama bamusokwe bayookwiisya,
abalo bayuni bamuluuwo bayookwaambila,
8naa zilenge zyamunyika zilakwiisya,
answi zyamulwizi ziyookulungulwida.
9Ino akati kazeezi zyoonse ncinzi citezi kuti Leza nguwakacilenga?
10Nguujisi buumi bwazintu zyoonse zipona,
amyuuya yabantu boonse.
11Sena kutwi takusoli majwi mbuli mulaka mbuusola cakulya?
12Busongo buli kubacembeede, maanu ali kubantu balaamyaka minji.
13“Pele Leza ulaabusongo anguzu ziindilila,
ulijisi maanu anguzu.
14Kuti naa wamwaya taakwe uukonzya kuyakulula,
kuti naa wajalila muntu muntolongo taakwe uukonzya kujalula.
15Kuti naa wayaanga mvula, nyika ilayuma nta,
kuti naa wayaangununa nyika ilaloba.
16Nguzu abusongo nzizyakwe, bacengwa abacenga bali munguzu zyakwe.
17Basikulaya ulabanyanga maanu aabo,
abalo babetesi ulabacita kuti babe bafuba-fuba.
18Ulagwisya bami mubulelo bwabo, ulabaanga mucibuno.
19Ulabanyanga bapaizi bulelo bwabo, ulafwiinsya basinguzu.
20Ulaumuzya balailili basyomwa,
alimwi ulagwisya busongo bwabapati.
21Ulaubausya balemekwa akutebezya ntambo zyabasinguzu.
22Ulayubununa zisisidwe mumudima,
mudima ulausandula waba mumuni.
23Ulakomezya misyobo akwiinyonyoona,
ulasumpula misyobo akwiilobya.
24Ulagwisya maanu aabami babantu,
akubazelenganya mutakwe nzila pe.
25Balaampaampa mumudima mutakwe mumuni,
alimwi ulabadadalisya mbuli muntu uukoledwe.
Currently Selected:
Jobo 12: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
