Babetesi 7
7
Gidiyoni mbwaakazunda Bamidiyani
1Lino mbubwangwengwemukila buyo Jelubali uuli ngu Gidiyoni abantu bakwe bakaakuyaka zivuka munsi atusensa twa Halodi. Zivuka zya Bamidiyani zyakali kulubazu lwakunyika munsi aacilundu ca Mole mukkuti.
2Mwami Leza wakati kuli Gidiyoni, “Bantu bako bavulisya. Kuti ndaabe Bamidiyani kulindinywe, inga balaba nobalikankaizya akuti, ‘Ninguzu zyesu tobeni zyapa kuti tuzunde.’ 3Baambile kuti, ‘Kufumbwa uyoowede, ajoke. Aboobo bali zyuulu zili makumi obilo azibili bakapiluka, pele bali zyuulu zili kkumi bakasyaala.’”
4Mwami Leza wakati kuli Gidiyoni alimwi, “Aaba bantu bacili banji. Batole ku maanzi, njoobasunka ooko lwangu ndemwini. Ndaakukwaambila kuti ooyu uleelede kuunka uyooinka anduwe. Kuti ndaamba kuti teelede kuunka, atakainki pe.”
5Gidiyoni wakabatola boonse kumaanzi, mpoonya Mwami Leza wakamwaambila kuti, “Onse uuti nkabbwaile maanzi mbuli mubwa, uleelede kuti agwisigwe kuzwa kuli baabo bati fugame buya akunywa.” 6Aabo bakankabbwaila maanzi amaanza bakali myaanda yotatwe. Bamwi boonse bakafugama buya kuti banywe. 7Mwami Leza wakati kuli Gidiyoni. “Ndiyoomuvuna akumuzundya Bamidiyani abantu aaba bankabbwaila maanzi. Bamwi baambile bapiluke.” 8Aboobo Gidiyoni wakabaambila boonse aabo kuti bapiluke, kwasyaala buyo bali myaanda yotatwe. Aabo bakabweza bulilu amyeembo yabeenzinyina. Zivuka zya Bamidiyani zyakali munselelo lyabo mukkuti.
9Ngoonya masiku aayo Mwami Leza wakaambila Gidiyoni kuti, “Amubuke mubalwane bali muzivuka ziya, ndabaaba kale kulindinywe. 10Naa koyoowede, usaangune kuunka kuzivuka zyabo a Pula mubelesi wako. 11Uyoomvwa ncobakanana, citikakusungilizye kuti ubalwane.” Mpoonyaawo walo amubelesi wakwe bakainka kumbali azivuka zyabasinkondonyina. 12Bamidiyani a Baameleki, amisyobo yabantu bakujwe bakalilundene mukkuti mbuli cikwikwi alimwi bakalijisi nkamela zinji mbuli musenga ulaankomwe ya lwizi.
13Lino Gidiyoni naakasika kumbali aazivuka, wakamvwa muntu kaambila mweenzinyina ciloto cakwe kati, “Ndalota kuti cinkwa ca baali cali kukunkulikila kuzivuka zyesu. Nicasika cagunta civuka mpoonya cabbindamuka cawida aansi.”
14Amvwe boobo mweenzinyina wakaingula kuti, “Ndipanga lya Gidiyoni Muisilayeli mwanaa Jowasyi. Taakwe cimbi ncocaamba eeco! Leza waaba Bamidiyani ampi yesu yoonse kulinguwe!”
15Lino Gidiyoni naakamvwa ciloto abupanduluzi bwaco wakalumbaizya Leza. Amane wakajokela kuzivuka kwakali Baisilayelinyina waakuti, “Amubuke! Mwami Leza waaba Bamidiyani kulindinywe!” 16Wakazandaula bantu bakwe bakali myaanda yotatwe muziga zyotatwe, mpoonya wakapa muntu omwe-omwe mweembo akabiya kalambe. 17Wakabaambila kuti, “Amundilangisye, mucite nceticite ndasika aafwiifwi azivuka. 18Mebo abaabo mbendaabo mbotutikasibile buyo myeembo, anywebo mukacite mbubonya kamuzingulukide zivuka, ooku kamuti, ‘Ndipanga lya Mwami Leza alya Gidiyoni.’”
19Lino Gidiyoni abamwi aabo bantu bali mwaanda mbaakali aabo nibakasika kuzivuka bakajana balindizi bamwi nibakacizwa akusika akati kabusiku. Mpoonyaawo bakasiba myeembo akupwaya tubiya tuya. 20Azyalo nkamu zyobilo zyakacita mbubonya. Bakajata malambe mumaanza alumwensi, myeembo kululyo kabapozomoka akuti, “Ndipanga lya Mwami Leza alya Gidiyoni.” 21Bakaliimvwi kabazingulukide zivuka, eelyo impi yoonse yakazingulukidwe yakasaantikizyanya akoomba. 22Nibakacili kusiba myeembo boonse bali myaanda yotatwe, Mwami Leza wakacitya kuti bantu bakali muzivuka batalike kujayana amapanga aabo. Bakatijila ku Zeletani baakusika ku Betishita, mbaabo mane kuminzi ya Mehola, kufwiifwi aku Tabati.
23Lino bamisyobo ya Nafutali a Asha, aba Manase bakaitwa kuti batandile Bamidiyani aabo. 24Gidiyoni wakatumya nkombe mucisi coonse catulundu-lundu ca Efulemu yakuti, “Amuboole kuno, tuzoolwane Bamidiyani. Mukkalilile muzito zya Jolodani azya tulonga toonse kuyoosikila ku Betibala, kutegwa babule maindo.” Aboobo Baefulemu bakabungana eelyo bakalindilila muzito eezyo. 25Bakajata bami bobilo ba Bamidiyani ba Olebu a Zebu. Bakajaya Olebu kundomba ya Olebu, awalo Zebu wakajailwa ku cikandilo cansaansa ca Zebu. Bakali kuyabubatandaanya Bamidiyani nibakaleta mitwe ya Olebu a Zebu kuli Gidiyoni, walo wakali kujwe lya Jolodani.
Currently Selected:
Babetesi 7: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
