Babetesi 6
6
Gidiyoni
1Alimwi Baisilayeli bakabisizya Mwami Leza, nkaako Mwami Leza wakabalekela kuti balelwe a Bamidiyani kwamyaka iili ciloba. 2Bamidiyani bakabadyaminina kapati, Baisilayeli bakali kuyuba mumpangala musitilide muzilundu. 3Baisilayeli bakali kunga basyanga, Bamidiyani, Baameleki abantu bakujwe bakali kubavumpa. 4Bakayaka zivuka mu Isilayeli kabanyonyoona zisyango zyoonse kuyoosikila ku Gaza. Tiibakali kusiila Baisilayeli zilyo niziba mbelele, ŋombe naa mbongolo pe. 5Bakaletelezya ŋombe amatente aabo. Abalo lwabo bakali banji mbuli cikwikwi, tiibakali kubalika. Bakasaala nyika yoonse ya Baisilayeli. 6Baisilayeli bakapenga akaambo ka Bamidiyani, nkaako Baisilayeli bakalilila Mwami Leza kuti abagwasye.
7Lino Baisilayeli nibakalilila Mwami Leza, 8wakabatumina musinsimi wakaamba kuti, “Mboobu mbwaamba Mwami Leza wa Isilayeli, ‘Ndakamugwisya kuzwa mu Ijipiti nyika yabuzike,’ 9alimwi ndakamuvuna ku Baijipiti akuli baabo bakali kumudyaminina. Ndakabatanda akumupa nyika yakali yabo. 10Ndakamwaambila kuti, ‘Ndime Mwami Leza wanu, mutakombi baleza ba Baamoli bali aanyika njomukkede. Pele taakwe nimwakandiswiilila pe.’”
11Lino mungelo wa Mwami Leza wakasika akukkala munsi aamubanga uulya ku Ofula. Munzi ooyo wakali wa Jowasyi waciinga ca Abiyeza. Mwanaakwe Gidiyoni wakali kuuma maila mucikandilo cansaansa kayubide Bamidiyani. 12Aawo mungelo ooyo wakalibonya kulinguwe akumwaambila kuti, “Mwami Leza ulaanduwe, yebo o mwaalumi singuzu, sicamba.”
13Gidiyoni wakati kulinguwe, “Simalelo wangu nkoombuzye, kuti naa Mwami Leza kalaandiswe, ino nkaambo nzi mapenzi aaya oonse naatusikila? Ili kuli milimo iigambya eeyo basikale besu njibakatwaambila kuti Mwami Leza wakatugwisya mu Ijipiti? Ino mbuti mbwaatulekelezya akutwaaba ku Bamidiyani.”
14Mpoonya Mwami Leza wakamulailila akumwaambila kuti, “Koya anguzu zyako zyoonse nzyopedwe ukavune Baisilayeli kuzwa ku Bamidiyani, Tee kayi ndime ndakutuma.”
15Gidiyoni wakaingula kuti, “O simalelo wangu, ani inga ndabavuna buti Baisilayeli kuzwa ku Bamidiyani? Bona ciinga cangu ncecinyina nguzu mumusyobo wa Manase, alimwi mebo ndimuniini mumukwasyi wataata.”
16Mwami Leza wakati kulinguwe, “Ede njooba aayebo, uyoobajaya Bamidiyani mbuli kuti wali muntu omwe buyo.”
17Gidiyoni wakati, “Kuti naa wandifwida luzyalo, ndipa citondezyo cakuti ndizibe kuti nduwe Mwami Leza ncobeni. 18Utainki kusikila ndilete cipaizyo kulinduwe.” Walo wakati, “Mbubo.”
19Mpoonya aawo Gidiyoni wakaya kuŋanda akuyoojika kapongo acinkwa citakwe mimena kuzwa kubusu bunante buzula cisuwo. Nyama wakiibikka mucinzuma musinza wakuubika mukabiya, wazileta kumungelo wa Mwami Leza munsi lyamubanga uulya. 20Abone boobo mungelo ooyo wakamwaambila kuti, “Bweza nyama acinkwa, uzibike andomba eeli, wamana uzitilaile musinza.” Gidiyoni wakacita oobo. 21Nkabela mungelo wa Mwami wakatandabika kasako nkaakajisi mujanza, waguma nyama acinkwa, kwakazwa mulilo mundomba eelyo, wakatenta nyama acinkwa. Kumane mungelo ooyo wakazweluka.
22Lino Gidiyoni wakaziba kuti ncobeni wali mungelo wa Mwami Leza, nkaako wakati, “Maawe, O Mwami Leza wangu. Ndabona mungelo wa Mwami Leza ameso.”
23Pele Mwami Leza wakamwaambila kuti, “Koba aaluumuno! Utayoowi, tokoofwa pe.” 24Mpawo Gidiyoni wakayaka cipaililo ca Mwami Leza nkukonya ooko, wakacuulika kuti, “Leza Siluumuno.” Asunu nkocicili ku Ofula ncaciinga ca Abiyeza.
25Ngoonya masiku aayo Mwami Leza wakaambila Gidiyoni kuti, “Tola poho wauso, aumbi wamyaka iili ciloba, umwaye cipaililo causo ncapailila Baali, alimwi ugonke mutuni wa Asyela ooyo uli kumbali aancico. 26Omana uyakile Mwami Leza wako cipaililo cibotu acitantaala eeci. Upaizye poho wabili abe cipaizyo cakutenta. Ubelesye nkuni zyali Asyela ooyo ngoogonkoola.” 27Gidiyoni wakatola babelesi bali kkumi akucita mbubonya mbuli Mwami Leza mbwaakamulailila, pele akaambo kakuti wakali kuyoowa bamukwasyi wakwe abantu bamumunzi, taakwe naakacicita sikati, wakacicita masiku.
28Lino bantu bamumunzi nibakabuka cifumo-fumo, bakajana kuti cipaililo ca leza wabo Baali amutuni zyakamwaigwa, awalo poho wabili wapaizigwa kale acipaililo cakayakilwa waawo. 29Bakabuzyanya-buzyanya akuti, “Ino nguni wacita cintu eeci?” Nibakavuntauzya bakajana kuti ngu Gidiyoni mwanaa Jowasyi wakacita boobo. 30Mpoonya bakaambila Jowasyi kuti, “Leta mwanaako kuti ajaigwe, nkaambo wamwaya cipaililo ca Baali akugonkoola mutuni wali kumbali aancico.”
31Pele Jowasyi wakati kuli baabo, “Sena nywebo muvuninina Baali? Ani inga mwamukwabilila buti? Kufumbwa uuvuninina Baali juunza cifumo-fumo uzoojaigwa. Kuti naa Baali kali leza ncobeni, mumuleke alivune lwakwe mwini. Tee kayi ncipaililo cakwe camwaigwa.” 32Kuzwa buzuba oobo Gidiyoni wakaitwa kuti Jelubali, nkaambo Jowasyi wakaamba kuti, “Mumuleke Baali alivune lwakwe mwini, kayi ncipaililo cakwe camwaigwa.”
33Lino Bamidiyani boonse a Baameleki amisyobo yoonse yakujwe bakalibunga-bunga, bazubuka mulonga wa Jolodani akuyaka zivuka mukkuti lya Jezulilii. 34Mpoonya Muuya wa Mwami Leza wakaselukila Gidiyoni, Gidiyoni wakasiba mweembo kwiita baalumi baciinga ca Abiyeza kuti bamutobele. 35Alimwi wakatumya mulomo mucisi coonse ca Manase, eelyo abalo bakazoobungana kulinguwe. Akwalo kumisyobo ya Asya, Zebuluni a Nafutali wakatumya nkombe, abalo bakaboola boonse kuzoomugwasya.
36Mpoonya Gidiyoni wakati ku Mwami Leza, “Kuti naa ncobeni koyanda kubelesya ndime kuvuna Isilayeli, mbubonya mbuli mbooamba, 37bona, ndabika boya bwambelele acuumino camaila. Kuti naa nzoojane mume aboya kutali ansi nzooziba ncobeni kuti ulavuna Baisilayeli kwiindila mulindime mbubonya mbuli mbooamba?” 38Cakaba boobo, mbubwakaceda buyo wakafuma, wakakanya boya oobo, eelyo mwakasoomoka maanzi manji akuzuzya mutiba. 39Gidiyoni wakati kuli Leza, “Utandinyemeni, ndaambe alimwi. Ndisole aboya alimwi lomwe. Ndilomba kuti aboya alikke ayume, pele ansi oonse abe mume.” 40Masiku ngoonya aayo Leza wakacicita eeci. Boya bwakali buyumu, pele nyika yakavumbide mume.
Currently Selected:
Babetesi 6: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
