Babetesi 5
5
Lwiimbo lwa Debola a Balaki
1Lino mubuzuba bwakuzunda Debola a Balaki mwana wa Abinoyamu bakaimba lwiimbo oolu,
2“Mukuti basololi bakasolweda Baisilayeli
mukuti bantu bakalyaaba cakulisanga, aalumbwe Mwami Leza!
3Amuswiilile nywebo nomami, muteelele nywebo nobeendelezi,
mebo ndilaimbila Mwami Leza, ndilatembaula Mwami Leza wa Isilayeli.
4O Mwami Leza liya nookazwa ku Siiya,
liya nookeenda kuzwa munyika ya Edomu,
nyika yakazungaana, mvula yakawa,
Iiyi, maanzi akapoomoka kuzwa mumakumbi.
5Malundu akayuuntana kumbele lya Mwami Leza ku Sinayi.
ooyo ngo Leza wa Isilayeli.
6Mumazuba aa Syamugaa, mwana wa Anati,
mumazuba aa Jaeli, mumigwagwa mwakali zii,
basinyendo bakali kweendela tuzilambali.
7Bantu bakiisiya minzi mu Isilayeli,
mane mebo nde Debola nindakasika, nde muzyali mu Isilayeli.
8Bantu nibakasala baleza bambi ankondo yakasika.
Mwati kwakacili kubonwa ntobo niliba sumo
akati kabantu bali zyuulu zili makumi one mu Isilayeli.
9Moyo wangu usukamine bapati babasilumamba ba Isilayeli,
bakalyaaba amoyo oonse kuzwa kubeenzinyina.
Aalumbwe Mwami Leza!
10Amukaluule, nywebo nomutanta mbongolo zituba,
anywebo nomukkala azikkalilo ziyandisi,
anywebo nomweenda aamaulu.
11Amuswiilile majwi aabaimbi kumikalo,
baluula Mwami Leza mbwaakazunda,
mbwaakazundya basilumamba bakwe mu Isilayeli.
Bantu ba Mwami Leza bakabungana kuzwa muminzi yabo bati,
12Katuya, Debola! Katuya, Katuya koimba lwiimbo.
Katuya ayebo Balaki, usolwede baange bako o mwana wa Abinoyamu.
13Lino basyomeka bakaza kubasololi babo,
bantu ba Mwami Leza bakaza kuyoolwana basinguzu.
14Bakaza kukkuti kuzwa mu Efulemu
kabatobela Babenjamini abana bokwabo,
basilutwe bakazwida ku Makee,
ku Zebuluni nkukwakazwida aabo bakeenzya musako wabwami.
15Basololi ba Isakaa bakaza a Debola,
iiyi Isakaa wakaboola a Balaki,
bakamutobela akuyoonjila mukkuti.
Pele Balubeni bakaandaana,
tiibakazumina kuboola.
16Nkaambo nzi ncookakkede kuzimpati zyambelele,
koide kuswiilila mpeta yakwiita mbelele?
Ncobeni musyobo wa Lubeni wakaandaana,
tibakazumina kuboola pe.
17Bagiliyadi bakakkala kujwe lya Jolodani,
Badani bakasyaala kumato.
Baasya bakakkala muzito kumbali lya lwizi.
18Pele bantu Bazebuluni a Nafutali bakalisanga kunkondo,
tiibakayoowa pe.
19Bami bakaboola kuzoolwana,
bami baku Kenani bakalwana ku Taanaki kumaanzi aku Megido,
pele tiibakasaala nsiliva niciba cimwi pe.
20Niziba nyenyezi zyakalwana,
kazili munzila yazyo zyakalwana Sisela.
21Ifwimpi fwimpi lyamaanzi a Kisyoni mulonga waciindi lyakabatola,
yuma omoyo wangu, yenda anguzu.
22Eelyo nsumba zyamabbiza aatijaana zyakamvwigwa kazilakamya.
23Mungelo wa Mwami Leza wakati,
‘Amusinganye Melozi, abantu bamumo,
nkaambo taakwe nibakaboola kuzoogwasya Mwami Leza
mukulwana basinkondonyina basinguzu.’
24Jaeli alelekwe kwiinda bakaintunyina,
muka Hiba Mukeni,
alelekwe kwiinda bakaintunyina boonse bamumatente.
25Mwaalumi uulya naakakumbila maanzi
wakamupa mukupa wakamutolela mabisi mumutiba wabwami.
26Wakabweza nembe yatente,
ajanza lyalulyo wakabweza nsando yasimilimo
ansando eeyo wakaumputa mutwe.
wakamupwaya canguzu, kutulula mpobe.
27Wakatifuka, walala kumaulu aamukaintu,
waduumana duu aawo.
28Kuzwa kumpulungwido banyina Sisela bakasondela.
Bakati, ‘Ino sunu nkalaki yamuka buti?’
Ino mabbiza aakwe amuka buti kupiluka sunu?
29Bakaintu basongo bamwiingula awalo walivwiila kuti,
30‘Sena mwati tabaabani nzibasaala.
Kupa sinkondo omwe-omwe musimbi naa bobilo?’
Zisani zyeebesi nzizya Sisela,
zisani zicekaulidwe kabotu zyansingo yangu?
Zyasaalwa zyoonse eezi?
31O Mwami Leza, basinkondonyoko boonse balobe!
Pele bakuyanda babe mbuli zuba ciindi nilipasula anguzu.
Lino kwakanyina nkondo kwamyaka iili makumi one.”
Currently Selected:
Babetesi 5: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.