Babetesi 4
4
Debola a Balaki
1Lino naakafwa Ehudi Baisilayeli bakabisizya Mwami Leza alimwi. 2Nkaako Mwami Leza wakabaaba kuli Jabini mwami wa Bakenani wakali kweendelezya mu Hazoo. Mupati wabasilumamba bakwe wakali Sisela wakali kukkala mumunzi wa Halosyele wabamasi. 3Jabini wakalijisi nkalaki zyalubulo zili myaanda iili fuka, alimwi wakadyaminina calunya Baisilayeli kwamyaka iili makumi obilo. Nkaako Baisilayeli bakalilila Mwami Leza kuti abagwasye.
4Ciindi eeco Debola musinsimi muka Lapidoti nguwakali kubeteka Baisilayeli. 5Wakali kubeteka milandu munsi aakakunka ka Debola akati ka Lama a Beteli mutulundu-lundu twa Efulemu. Baisilayeli nkubakali kuunka ooko kuti abakoswede twaambo. 6Debola wakatumya kuyooita Balaki mwana wa Abinoyamu wakali kukkala ku Kedesyi mucisi ca Nafutali. Naakasika wakamwaambila kuti, Mwami Leza wa Isilayeli walailila kuti, “Ubunganye bantu bako kucilundu ca Taboo, bantu bali zyuulu zili kkumi bazwa kumisyobo ya Nafutali a Zebuluni. 7Njooleta Sisela mupati wabasilumamba ba Jabini kuti azookulwane kumulonga wa Kisyoni. Unoojisi nkalaki abasilumamba pele mebo njookuzundya.”
8Balaki wakaambila Debola kuti, “Ccita yebo uzooinke nenjooinka ambebo, kuti toinki ambebo peepe!”
9Walo wakati, “Mbubo, pele waakuzunda tokalumbaizigwi, nkaambo Mwami Leza uyooaba Sisela kumukaintu.” Mpoonya Debola wakainka antoomwe a Balaki ku Kedesyi. 10Balaki wakaita misyobo ya Zebuluni a Nafutali kuti imutobele ku Kedesyi bakamutobela bakali baalumi bali zyuulu zili kkumi. Debola wakainka aabo.
11Hiba Mukeni wakasiide Bakeninyina balunyungu lwa Hababu mulamwe wa Mozesi. Wakayakide katungu kumusamu wa Telebinti ku Zaanamimu kubambana a Kedesyi.
12Ciindi Sisela naakaambilwa kuti Balaki uli kucilundu ca Taboo, 13wakaita basinkalaki zyakwe zyalubulo zyakali makumi aali fuka, abasilumamba bakwe boonse kuti bainke kuzwa ku Halosyete kuya kumulonga wa Kisyoni.
14Mpoonya Debola wakati kuli Balaki, “Koya! Nkaambo sunu mbobuzuba Mwami Leza mbwaaba Sisela kulinduwe. Sena taakwe naakakusolweda kale?” Aboobo Balaki wakainka kuzwa kucilundu ca Taboo abasinkondo bali zyuulu zili kkumi. 15Aawo Mwami Leza wakapyopyonganya akuzunda Sisela, basinkalaki abasilumamba bakwe boonse. Sisela wakadwantuka munkalaki yakwe akutija. 16Balaki abasilumamba bakwe bakali kubatandaanya akubajaya kusikila ku Helosyete wabamasi. Taakwe naba omwe wakasyaala pe.
17Lino Sisela wakatijila kutente lya Jaeli muka Hiba Mukeni, nkaambo Jabini mwami waku Hazoo amukwasyi wa Hiba bakali kumvwana lyoonse. 18Jaeli wakainka kuyoocingauzya Sisela akumwaambila kuti, “Konjila, mwami utayoowi pe.” Mpoonya aawo wakanjila mutente walo wakamuvumba. 19Sisela wakati kumukaintu ooyo, “Ndipa maanzi aakunywa ndafwa nyota.” Mukaintu ooyo wakajalula nsuwa yamukupa, wamupa kuti anywe, wamuvumba alimwi. 20Alimwi wakaambila mukaintu ooyo kuti, “Imina amulyango watente kutegwa kufumbwa uuti kubuzye kuti, ‘Sena kuli muntu oomu?’ Yebo umwaambile kuti, ‘Peepe.’”
21Walo Jaeli muka Hiba Mukeni wakabweza nembe yatente ansando, wakaza kasobelela Sisela kaona, wakamukankamina nembe mumpobe yaakupolela ansi, mpoonya wakafwa.
22Lino Balaki kacitobela Sisela, Jaeli wakazwa kuyoomucingauzya kunzila akumwaambila kuti, “Koza kuno! Ndikutondezye muntu ngoyabuyandaula.” Mpoonya wakanjila anguwe eelyo wakajana Sisela uliduumene, wafwa nembe kiidonkwede.
23Mbombuboobu Mwami Leza mbwaakazunda Jabini mwami waku Kenani Baisilayeli kabalibwenene. 24Baisilayeli bakali kuyoosyanikizya Jabini mwami waku Kenani mane kusikila bamunyonyoona.
Currently Selected:
Babetesi 4: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.