Babetesi 3
3
Misyobo yakacikkede munyika
1Lino Mwami Leza wakaleka misyobo imwi mukuti asunke Baisilayeli aabo batakalwanide nkondo mu Kenani. 2Mwami Leza wakali kuyanda kuti mazyalani oonse a Baisilayeli azibe kulwana nkondo, kwaambisya aabo batanalwanide. 3Njeeyi misyobo eeyo yakacili munyika, bami bosanwe ba Bafilisiti, a Bakenani boonse, Basidoni a Bahivi aabo bakali kukkala muzilundu zya Lebanoni, kuzwa kucilundu ca Balahemoni kusikila kumumpata wa Hamati. 4Leza wakabasiya kuti asunke Baisilayeli kuti azibe kuti naa Baisilayeli balaswiilila milawo eeyo Mwami Leza njaakapa basikale babo kwiindila muli Mozesi. 5Mbombuboobu Baisilayeli mbubakakkala akati ka Bakenani, Bahiti, Baamoli, Bapelezi, Bahivi, a Bajebusi. 6Baisilayeli aabo bakatalika kukwatana abamisyobo eeyo, alimwi bakali kukomba abaleza babo.
Otiniyeli mbwaakavuna Baisilayeli
7Lino Baisilayeli bakaluba Mwami Leza akumubisizya. 8Nkaako Mwami Leza wakanyemena Baisilayeli, wakabaaba kuli Kusyanilisatayimu, mwami waku Mesopotamiya, eelyo bantu ba Isilayeli bakabelekela Kusyanilisatayimu kwamyaka iili lusele.
9Ciindi Baisilayeli nibakalilila Mwami Leza, wakabapa muvuni uutegwa Otiniyeli mwanaa Kenani musyoonto wa Kalebi. 10Muuya wa Leza wakamusikila, nkaako Otiniyeli wakakonzya kweendelezya Baisilayeli. Wakabatola kunkondo, ooko Mwami Leza nkwaakaaba Kusyanilisatayimu mwami waku Mesopotamiya kulinguwe wamuzunda. 11Kwakanyina nkondo kwamyaka iili makumi one. Kumane Otiniyeli wakafwa.
Ehudi mbwaakavuna Baisilayeli
12Lino Baisilayeli bakabisizya Mwami Leza alimwi. Nkabela wakalekela Egiloni mwami waku Mowabu kuti abalwane. 13Wakayobolola Baamoni a Baameleki walwana Baisilayeli akubazunda wakatola munzi watukunka. 14Baisilayeli bakalelwa a Egiloni kwamyaka iili kkumi alusele.
15Pele Baisilayeli nibakalilila Mwami Leza, wakabapa muvuni uutegwa Ehudi mwanaa Gela wamusyobo wa Benjamini, sicimwensi. Baisilayeli bakatumina cipego kuli Egiloni mwami waku Mowabu bapa Ehudi. 16Ehudi wakafulide panga lyakali kubosya koonse koonse, lyakali kulampa kakokola komwe, wakalisekka kunsi aazyakusama zyakwe akasolo kalulyo. 17Wakainka kutola cipego eeco kumwami Egiloni. Mwami Egiloni wakalineneede. 18Naakamana kupa cipego eeco wakaambila baabo bakaciyumwide kuti bapilukile. 19Walo mwini wakaakupilukila kumabwe aaconcomene ku Giligali, waza kumwami wazooti, “Ndijisi maseseke aakukwaambila o mwami.” Mpoonya mwami wakati kubabelesi bakwe, “Amutusiye aasyoonto.” Bakazwida aanze.
20Lino mwami kakkede alikke mukaanda kakwe katontola kali mujulu, Ehudi wakaboola kulinguwe akuti, “Ndilaa mulumbe wakazwa kuli Leza wakwaambila nduwe, o mwami.” Mwami naakamvwa boobo wakanyamuka. 21Mpawo Ehudi ajanza lyakwe lyalumwensi wakasomona panga lyakali kukasolo wamubbwabula mwida, 22panga lyakabbila acijatizyo calyo lyakupolela kusule, nkabela mafuta akavumba acijatizyo. Taakalisomona pe cifusi cakazwa. 23Mpoonyaawo Ehudi wakazwida aanze akujala milyango yoonse, wasiya waipinga. 24Azwe buyo babelesi bamwami bakaboola bazoojana kuti milyango ilipingidwe, eelyo balo bakayeeya kuti mwami uciligwasya. 25Bakalindila mane limwi bakazingwa, pele taakwe naakajalula kumulyango. Nkaako bakapingulula bajana mwami wabo uliwide ansi wafwa.
26Ciindi ciya ncibakacili kulindila Ehudi mbwaakabonena wakatija wakwiinda kumabwe aaconcomene, watijila ku Siila. 27Asike buyo munyika yatulundu-lundu ya Efulemu wakasiba mweembo, eelyo Baisilayeli bakazwa mumalundu ngooyo wabasolweda. 28Wakabaambila kuti, “Amunditobele, nkaambo Mwami Leza wabaaba kale basinkondoma Bamowabu kulindiswe. Aboobo bakamutobela bakasaala zito zya Jolodani, basinkilizya Bamowabu cakuti taakwe muntu wakali kukonzya kuzubuka. 29Ciindi eeco nciconya bakajaya Bamowabu bakatisike kuzyuulu zili kkumi. Boonse bakajaigwa bakali basinguzu, nikuba boobo taakwe muntu naba omwe wakatija. 30Mbombuboobu Bamowabu mbubakazundwa a Baisilayeli. Eelyo kwakanyina nkondo kwamyaka iili makumi aali lusele.”
Syamugaa mbwaakavuna Baisilayeli
31Lino musule lya Ehudi kwakaza uumbi musololi zina lyakwe Syamugaa mwana wa Anati. Ooyo wakajaya Bafilisiti bali myaanda iili cisambomwe acidunsyo cabasune. Mbombuboobu awalo ooyu mbwaakavuna Baisilayeli.
Currently Selected:
Babetesi 3: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
