Babetesi 2

Mungelo wa Mwami Leza mbwaakasika ku Bokimu

1Lino mungelo wa Mwami wakainka kuzwa ku Giligali kuya ku Bokimu nkwaakaakwaambila Baisilayeli kuti, “Ndakamugwisya mu Ijipiti akumuleta munyika njindakasyomezya kuli basikale banu. Lino ndati, ‘Taakwe nenjootyola cizuminano ncindakapangana andinywe akutamani. 2Anywebo lwanu tamweelede kupangana cizuminano abantu bamomuno. Muleelede kumwaya zipaililo zyabo!’ Nikuba boobo taakwe nimwakandiswiilila pe. Ino mwacitila nzi oobo? 3Lino mebo mwaambila kuti, ‘nsikoobatanda aaba pe, banoomupenzya lyoonse, abalo baleza babo banoomulebya.’” 4Ciindi mungelo wa Mwami Leza naakamana kwaamba majwi aaya oonse ku Baisilayeli, bantu bakalila cakupozomoka. 5Nkaako busena oobo bakabwiita kuti Bokimu, nkokuti balila. Kubusena oobo bakapa zipaizyo ku Mwami Leza.

Lufu lwa Josyuwa

6Lino Josyuwa naakamwaisya bantu, Baisilayeli bakainka umwi aumwi kucaabilo cakwe canyika. 7Bakabelekela Mwami Leza mubuponi bwa Josyuwa boonse. Josyuwa naakafwa, bakacili kubelekela Mwami Leza mubuponi bwabapati aabo bakabona milimo yoonse iigambya eeyo Mwami Leza njaakacitilide Baisilayeli. 8Eelyo Josyuwa mwanaa Nuni mubelesi wa Mwami Leza, wakafwa kali aamyaka iili mwaanda akkumi lyomwe. 9Bakamuzikka munyika yacaabilo cakwe ku Timunatihelesi munyika yatulundu-lundu ya Efulemu cilundu ca Gaasyi nkocili kunyika. 10Lino zyalani lyoonse eelyo nilyakamana kufwa kwakaza zyalani limbi lyatakazi Mwami Leza anzyaakacitilide Baisilayeli.

Baisilayeli mbubakaleka kukomba Mwami Leza

11Lino Baisilayeli bakabisizya Mwami Leza akutalika kukomba ba Baali, 12bakaleka kukomba Mwami Leza wabasikale babo ooyo wakabagwisya ku Ijipiti, batalika kukomba baleza bamisyobo yakabazingulukide. Nkaako bakakalazya Mwami Leza. 13Bakaleka kukomba Mwami Leza, bakabelekela ba Baali a Asitaloti. 14Baisilayeli bakakalazya Mwami Leza, mpawo wakabaaba kuli basikuvumpa bakasaala zintu zyabo. Wakabalekelezya kuli basinkondonyina basinguzu bakabazingulukide cakuti tiibakacili kukonzya kulikwabilila. 15Kwakali kunga nkubaakulwana, Mwami Leza wabalekelezya, mbubonya mbuli mbwaakakonkezya kuti mbwayoocita. Nkaako bakapenzegwa kapati.

16Mwami Leza wakabapa babetesi aabo bakabavuna kuzwa kuli basinkondonyina. 17Nikuba boobo tiibakabaswiilila babetesi aabo pe. Bakacili kukomba baleza bambi akubabelekela. Cakufwambaana bakaleka nzila eeyo basikale babo njibakali kutobela mukuswiilila milawo ya Mwami Leza. Tiibakacita oobo pe. 18Kufumbwa ciindi eeco Mwami Leza naakabapa mubetesi, Mwami Leza lwakwe wakali kumugwasya mubetesi ooyo cakuti wakakonzya kuvuna Baisilayeli kuzwa kuli basinkondonyina, mumazuba oonse aayo mubetesi ooyo ngaakali kupona. Mwami Leza wakabausila nsoni naakamvwa mbubakali kutongela akaambo kabaabo bakali kubapenzya akubadyaminina. 19Pele bakali kunga ciindi mubetesi wabo wafwa, babweedela kukucita nzizyonya nzyobakali kucita akubisya kwiinda basikale babo. Bakali kutobela baleza bambi akubabelekela. Bakakakatila kutobela nzila zyabo zibi mucinguni cabo. 20Alimwi Mwami Leza wakanyemena Baisilayeli wakati, “Bantu aaba batyola cizuminano cangu ncindakapangana abasikale babo mukutaswiilila majwi aangu. 21Nkaako nsikooyoobatandila limbi musyobo nuuba omwe akati kamisyobo njaakasiya Josyuwa naakafwa. 22Munzila eeyi ndilasunka Baisilayeli kuti mbone naa balatobela nzila zyangu bwakacita basikale babo naa pe.” 23Ncenciceeco Mwami Leza ncaakalekela misyobo eeyo, kataitandi nikuba kwiiaba kuli Josyuwa.

Currently Selected:

Babetesi 2: Tonga96

Highlight

Compare

Copy