Babetesi 21
21
Musyobo wa Benjamini mbuwakakwata
1Lino Baisilayeli bakakonkezezye ku Mwami Leza ku Mizipa kuti, “Taakwe naba omwe wesu uuti kakwasye mwanaakwe ku Mubenjamini pe.” 2Lino bantu bakaboola ku Beteli akukkala ooko kumbele lya Leza mane kumangolezya, kabalila akweema kapati 3kabati, “Mwami Leza wa Isilayeli, ino caba buti kuti umwi wamisyobo ya Isilayeli ube afwiifwi kumaninina?”
4Mubuzuba bwakatobela bantu bakainka kakucili kooko, baakuyaka cipaililo, akupa zipaizyo zyakutenta azyalumvwano. 5Kumane Baisilayeli bakati, “Sena kuli ciinga cimwi akati kamisyobo ya Isilayeli yoonse catakasika kumbungano iilya ya Mwami Leza?” 6Bakakonkezezye kuti kufumbwa watakasika ku Mwami Leza ku Mizipa uyoojaigwa bakati, “Musyobo umwi wazwa mu Baisilayeli sunu. 7Ino tulacita buti kuti tubajanine bakaintu aaba baalumi basyaala, kayi twakakonkezya ku Mwami Leza kuti tatukooyookwasya bana besu kulimbabo?”
8Bakabuzya kuti, “Ino ncicili ciinga mu Baisilayeli catakasika ku Mwami Leza ku Mizipa?” Bakajana taakwe naba omwe wakasikide kumbungano kuzwa ku Jabesyi Giliyadi. 9Bantu nibakali kulwana, taakwe muntu naba omwe waku Jabesyi Giliyadi wakajaigwa. 10Aboobo mbungano yakatuma basicamba bakali zyuulu zili kkumi azibili, akubalailila kuti, “Kamuya mukajaye bantu boonse baku Jabesyi Giliyadi, bakaintu abana boonse. 11Mukacite boobu, mukajaye baalumi boonse abakaintu bazi kale baalumi.” 12Munzila eeyi bakaakujana basimbi bali myaanda yone, bakabeeta kuzivuka ku Syailo, uuli munyika ya Kenani.
13Lino mbungano yakatumya nkombe ku Babenjamini bakakkede kumwaala waku Limoni kuti tutacilwani limbi. 14Nkaako Babenjamini bakaboola, bakabapa basimbi aabo batakajaigwa baku Jabesyi Giliyadi. Nikuba boobo tiibakazulila pe.
15Lino bantu bakababeda aankumbu Babenjamini, nkaambo Mwami Leza wakabulizya musyobo umwi mu Baisilayeli. 16Aawo bapati bambungano bakati, “Mukuti bakaintu Bababenjamini banyonyoonwa, ino baalumi basyaala inga tulabajanina kuli bakaintu? 17Babenjamini basyaala beelede kuba aabasikukona, kutegwa kutabi musyobo umwi wa Isilayeli uuloba. 18Tatukonzyi kubapa bana besu basimbi kuti bakwate, nkaambo swebo Tobaisilayeli twakakonkezya kuti, ‘Asinganyizigwe woonse upa mukaintu kuba Benjamini.’ 19Lino amubone kulipobwe lya Mwami Leza licitika mwaka amwaka ku Syilo, kunyika lya Beteli, ajwe aanzila iizwa ku Beteli kuya ku Syekemu, kumusanza lya Lebana.”
20Bakalailila Babenjamini kuti, “Kamuya mukayube mumyuunda yansaansa, 21kamulangilila. Ciindi basimbi baku Syilo baakuzwa kuti bazoosangane mukuzyana, mukazwe cakufwambaana mumyuunda yansaansa kuti umwi aumwi wanu akalijatile mukaintu kuzwa kubasimbi baku Syilo mwaakumana mukabatole kucisi ca Benjamini. 22Ciindi bamawisi naa banyinandumi baakututongookela, tuyoobaambila kuti, ‘Amutubede aalubomba kwiindila mukubagwasya nkaambo taakwe nitwakabajanina bakaintu ciindi cankondo, nywebo tamukwe mulandu nkaambo tiimwakakwasya bana banu kuli mbabo.’”
23Lino mbombuboobu Babenjamini mbubakacita. Ciindi basimbi nibakali kuzyana, umwi aumwi mulombwana wakajata umwi musimbi akutola kuti akabe mukaintu wakwe. Aawo bakapiluka kulukono lwabo akuyakununa minzi akukkala muli njiyo.
24Ciindi eeci Baisilayeli bakasiya busena oobo akupilukila kuminzi yabo, kumisyobo aziinga zyabo. Umwi aumwi kulukono lwakwe.
25Mumazuba aayo Baisilayeli bakanyina mwami. Bakalikwiide kulicitila umwi aumwi kufumbwa cimubotela.
Currently Selected:
Babetesi 21: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
