Lute 1
1
Elimeleki amukwasyi wakwe mbubakalonga
1Lino mumazuba aalya Baisilayeli nibakali kweendelezegwa ababetesi, kwakaba nzala munyika ya Isilayeli. Nkabela umwi mwaalumi waku Betelehemu, mucisi ca Juda wakatija nzala eeyo wainka kuyookkala munyika ya Mowabu. Wakatolelezya mukaintu wakwe abana balombe bobilo. 2Mwaalumi ooyo wakali Elimeleki, mukaintu wakwe wakali Naomi, bana bakwe bakali Maloni, a Kiliyoni. Bakali Baefulati bazwa ku Betelehemu mucisi ca Juda. Nibakaakusika kunyika ya Mowabu bakaakukkala. 3Eelyo Elimeleki mulumi wa Naomi wakafwa, aboobo mukaintu wakasyaala alikke abana bakwe bobilo baya. 4Lino bana aabo bakakwata bakaintu bakucisi ca Mowabu. Izina lyamukaintu umwi ngu Olipa, umwi ngu Lute. Bakakkala ooko myaka yakatisike kukkumi. 5Nkabela Maloni amwanookwabo Kiliyoni bakafwa, eelyo Naomi wakajana penzi lyakufwidwa mulumi abana bakwe bobilo.
Naomi a Lute mbubakapiluka ku Betelehemu
6Naomi wakanyamuka abamukabana bakwe kuti apiluke kwabo kuzwa mucisi ca Mowabu, nkaambo wakamvwa kuti Mwami Leza wakaleleka bantu bakwe mukubapa zilyo. 7Aboobo wakati azwe oomo mucisi mwaakabede, wakanyamuka abamukabana bakwe bobilo, bakali kuyabweenda munzila kuti bapiluke kucisi ca Juda. 8Naomi wakaambila bamukabana bakwe kuti, “Amubweede kwanu. Leza amufwide luzyalo, mbubonya mbumwakacitila bafu ambumwandicitila mebo. 9Leza amugwasye kuti mukakwatwe, alimwi mukakkale muluumuno.”
Aawo Naomi wakabalaya kwiinda mukubamyonta, nkabela bakatalika kulila. 10Bakamwaambila kuti, “Peepe! Katuya buyo toonse kulindinywe.”
11Lino Naomi wakati, “Peepe, bana bangu, amubweede. Ani inga mwainka buti andime, neentacizyali, ino inga ndabajana kuli bana bakumukwata? 12Amubweede kulindinywe bana bangu nkaambo mebo ndacembaala, nsikonzyi kukwatwa alimwi. Nikuba kuti kacikonzeka kuti nkwatwe sunu akuba aabana balombe, 13sena nimwakonzya kulindila mane bakakomene? Sena nimwakonzya kulikasya kukwatwa kumbi akaambo kambabo? Peepe, nobana bangu! Moyo wangu uluuside kapati akaambo kanu, Mwami Leza wandiletela mapenzi.”
14Bamvwe boobo bakalilisya. Lino Olipa wakamyonta banyinazyala walaya, wapiluka, pele Lute wakabakakatila. 15Lino Naomi wakati, “Bona! Mukwatwanyoko wapilukila kulimbabo akuli baleza bokwabo, piluka ayebo.”
16Lute wakaingula kuti, “Mutandisungilizyi kumusiya nikuba kutamutobela, nkaambo kufumbwa nkomuya ndaya ambebo, nkomuyookkala ambebo njookkala. Bantu banu bayooba bantu bangu, Leza wanu uyooba Leza wangu. 17Kufumbwa nkomuyoofwida ambebo nkweyoofwida akuyoozikkilwa. Mwami Leza andisubule akwiindilila kuti naa cintu cimwi cikandaandaanye andinywe kuleka buyo lufu.”
18Naomi naakabona kuti Lute ulisinizizye kuunka aawe, wakaleka kumusungilizya.
19Aboobo bakeenda boonse bobilo mane limwi baakusika ku Betelehemu. Basike buyo bantu boonse bamumunzi bakagambwa akaambo kabo, bamakaintu bakati, “Ma! Sena tali Naomi ooyu?”
20Naomi wakabaingula kuti, “Mutandiiti limbi kuti Naomi kwaamba kuti, uusangalede pe, amundiite kuti Mala nkokuti uuuside, nkaambo Singuzuzyoonse wandiletela mapenzi aataambiki! 21Nindakainka ndakalizulizizye, pele Leza wandiboozya acinkwamaanza. Ani inga mwandiita buti kuti Naomi? Mwami Leza wakandipenzya kapati wakandoombya!”
22Mbombuboobu mbwaakapiluka Naomi. Wakaza a Lute Mumowabu mukamwanaakwe. Bakasika ku Betelehemu ciindi cakutebula maila.
Currently Selected:
Lute 1: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.