Babetesi 20

Baisilayeli mbubakalibambila Nkondo

1Mpoonya bantu boonse ba Isilayeli bakayoboloka, bakazwa muzisi zyoonse kuzwa ku Dani kusikila ku Biiyasyeiba, kubikkilizya acisi ca Giliyadi, bakabungana antoomwe kumbele lya Mwami Leza ku Mizipa. 2Nkabela basololi bamisyobo yoonse ya Isilayeli bakaliko ooko kwakabungene bantu ba Leza. Kwakali bantu basika kuzyuulu zili myaanda yone balwana nkondo yaansi amapanga. 3Ciindi eeco bamusyobo wa Benjamini bakamvwa kuti Baisilayeli bamwi bali ku Mizipa. Lino Baisilayeli bakabuzya Mulevi uulya kuti, “Twaambile, ino cakacitika buti?” 4Mpoonya Mulevi ooyo wakaingula kuti, “Ndakasika ku Gibeya mucisi ca Benjamini, mebo amwanakasuwa wangu kuti toone nkuko. 5Mpawo bantu baku Gibeya bakaboola kuti bandijate, bakazingulukide ŋanda ciindi camasiku, bakali kuyanda kundijaya, nibakakacilwa bakajata mwanakasuwa wangu, bamucita zitaambiki, nkabela wakafwa. 6Mpoonya ndakamubweza akumukosoola muzibeela akuzitumizya kumisyobo yoonse ya Isilayeli, nkaambo bantu aaba ncintu cisesemya munyika ya Isilayeli. 7Nywebo nobantu ba Isilayeli nomuli waano, amukosole makani aaya naa tweelede kwaacita buti.”

8Mpawo bantu boonse bakanyamuka antoomwe bakati, “Taakwe naba omwe wesu uutibweede kutente lyakwe nikuba kuŋanda yakwe pe. 9Pele mbotuticite mboobu. Tulauma cisolo, kuti tubone naa mbaani batikalwane munzi wa Gibeya. 10Tulasala bantu bamanya kkumi kuzwa kumisyobo yoonse ya Baisilayeli kuti babambile basilumamba zyakulya. Basilumamba bayooinka kuyoobweedezezya baku Gibeya cibi cabo.” 11Aboobo bantu boonse bakabungana antoomwe kuti balwane munzi ooyo.

12Mbombuboobu misyobo yoonse ya Isilayeli mbuyakatuma basilumamba mucisi coonse ca Benjamini bakati, “Ino ncinzi eeci ncimwakacita? 13Lino amutupe babi aabo bali mu Gibeya, kuti tubajaye akugwisya bubi oobu munyika ya Isilayeli.” Pele bamusyobo wa Benjamini tiibakaswiilila Baisilayelinyina pe. 14Lino Babenjamini bakaboola ku Gibeya kuzwa muminzi yoonse ya Benjamini kuti bazoolwane Baisilayelinyina. 15Mubuzuba oobo bakabunganya basilumamba bakali zyuulu zili makumi obilo acisambomwe balwanya mapanga. Kunze lyabaaba, kwakali abamwi basilumamba bakasalidwe kuzwa ku Gibeya, aaba bakali myaanda iili ciloba. 16Boonse bakali basicimwensi, bakali kukonzya kufusa bbwe kuuma nikaba kasusu kakunyina akwiinzya pe. 17Eelyo Baisilayeli kuleka Babenjamini, bakabunganya basilumamba bakali zyuulu zili myaanda yone balwanya mapanga.

Babenjamini mbubakalwana

18Lino Baisilayeli bakaya ku Beteli kuyoobuzya kuli Leza kuti, “Ino mbabali besu batisaangune kuyoolwana Babenjamini?” Mpawo Mwami Leza wakati, “Bajuda mbabeelede kusaanguna kuunka.”

19Nibwakaca Baisilayeli bakabuka akuyooyaka zivuka kumbali aa Gibeya. 20Bamane bakaya kuyoolwana Babenjamini, eelyo Baisilayeli bakaima mumindando ku Gibeya. 21Abalo Babenjamini bakazwa mumunzi wa Gibeya bazoolwana, mubuzuba oobo kwakajaigwa Baisilayeli bali zyuulu zili makumi obilo azibili. 22Pele Baisilayeli bakayumizyanya, bakaima mumindando alimwi mubusena oobo mbubakaimvwi kusaanguna. 23Baisilayeli bakainka kuyoolilila Mwami Leza mane kusikila kumazuba, eelyo bakabuzya Mwami Leza kuti, “Sena tuleelede kuyoolwana bakwesu Babenjamini alimwi?” Mwami Leza wakati, “Kamuya mukabalwane.”

24Nkaako Baisilayeli bakainka lwabili. 25Abalo Babenjamini bakazwa mumunzi wa Gibeya bazoolwana, ciindi eeci kwakajaigwa Baisilayeli basika kuzyuulu zili kkumi alusele balwana amapanga. 26Mpoonya Baisilayeli boonse bakainka ku Beteli kuyoolila ku Mwami Leza, bakaliimya kulya buzuba oobo mane kusikila kumangolezya. Bakapa zipaizyo zyakutenta, azyalumvwano ku Mwami Leza. 27Kumane bakabuzya Mwami Leza ooko nkaambo bbokesi lyacizuminano lya Mwami Leza nkulyakabede kwamazuba aayo. 28Fineyasi mwana wa Eliyazaa, mwana wa Aloni, nguwakali kulilanga ciindi eeco. Bantu bakati, “Sena tuunke alimwi kuyoolwana bakwesu Babenjamini, naa tubaleke buyo?” Mwami Leza wakati, “Kamuya nkaambo juunza njobaaba kulindinywe.”

29Aboobo Baisilayeli bakayubika bamwi bantu kuzinguluka Gibeya. 30Nkabela mubuzuba bwatatu Baisilayeli bakainka kuyoolwana Babenjamini akwiima mumindando ku Gibeya, mbubonya mbuli mbubakacitide kale. 31Babenjamini nibakainka kuyoobalwana, bakasiya munzi akuya kule, lino mbubonya mbuli kuziindi zimwi bakatalika kuuma akujaya Baisilayeli mumigwagwa, yakali kuya ku Beteli, kuya ku Gibeya amusokwe, bakajaigwa bakatisike kumakumi otatwe. 32Mpoonya Babenjamini bakati, “Twabatanda mbubonya mbuli lutaanzi.” Baisilayeli bakati, “Atutije kuti kabaciza kulaale kuzwa mumunzi mane kumigwagwa.” 33Nibakasika ku Balitama Baisilayeli bakali kutija bakaima mumindando, aawo beenzinyina bakayubide bakayubunuka mumasena aabo kumbo lya Geba. 34Bakasalidwe kuyoolwana munzi wa Gibeya bakali zyuulu zili kkumi. Nkondo yakayuma, pele Babenjamini taakwe nibakazi kuti mapenzi akali aafwiifwi ambabo pe. 35Mwami Leza wakazunda Babenjamini kumbele lya Baisilayeli, nkabela mubuzuba oobo, Babenjamini bakajaigwa bakali zyuulu zili makumi obilo azisanu amwaanda. Aaba boonse bakali baabo bakali kulwanya mapanga. 36Babenjamini bakabona kuti bazundwa. Baisilayeli bakacita mbuli kuti batija Babenjamini nkaambo bakali kusyoma beenzinyina bakayubide ku Gibeya. 37Aabo bakayubilide bakazwa akusaala munzi woonse. Bakajaya bantu boonse bakali mumunzi. 38Citondezyo ncibakapangene Baisilayeli ncakuti, babona busi kabuuntumuka mumunzi, 39baya batija baleelede kupiluka mulumamba. Babenjamini bakatalika kuuma akujaya bantu bakali makumi otatwe bakali kuyeeya kuti, “Ncobeni twabazunda mbuuli lyoonse.” 40Citondezyo nicakalibonya kuzwa mumunzi, nkokuti musumpuululu wabusi niwakalibonya, Babenjamini bakaceba musule bakabona munzi woonse wuunta busi. 41Mpoonya Baisilayeli baya bakapiluka mulumamba, aawo Babenjamini bakayoowa mukuti bakabona kuti mapenzi abasikila. 42Nkaako bakatija, batozya kunkanda, pele basinkondonyina bakabeenzya, nkabela aabo bakazwida mumunzi bakabajaya mumigwagwa. 43Baisilayeli bakabbatikizya Babenjamini, akubatandaanya baakubeenzya kujwe lya Gibeya. 44Babenjamini bakajaigwa bakali zyuulu zili kkumi alusele. 45Bamwi bakanyona akutijila kumwaala waku Limoni, pele zyuulu zyosanwe bakajaigwa mumigwagwa. Bakali buyabubatandaanya kuya ku Gidomu, ooko kwalo kwakajaigwa bali zyuulu zyobilo. 46Babenjamini bakajaigwa mubuzuba oobo bakali zyuulu zili makumi obilo azisanu, boonse bakali basimapanga basinguzu.

47Pele bali myaanda iili cisambomwe bakatijila kunkanda kumwaala waku Limoni, bakaakukkala ooko kwamyezi yone. 48Baisilayeli bakapiluka kukulwana Babenjamini bamwi akubajaya boonse, bantu abanyama babo mbibakajana. Aminzi yoonse bakiitenta.

Currently Selected:

Babetesi 20: Tonga96

Highlight

Copy

Compare