Babetesi 19
19
Mulevi amwanakasuwa wakwe wakumbali
1Mumazuba aayo nikwakanyina mwami mu Isilayeli, kwakali Mulevi umwi wakali kukkala kulaale kucisi catulundu-lundu ca Efulemu. Wakayanda musimbi waku Betelehemu mucisi ca Juda. Musimbi ooyo wakaba mwanakasuwa wakwe. 2Lino bakanyemezyenya amwanakasuwa wakwe, mukaintu ooyo wakatija wainka kuli wisi ku Betelehemu mucisi ca Juda, wakakkala kwamyezi yone. 3Mpoonya Mulevi wakanyamuka wamutobela kuti akamukombelezye akumuboozya. Wakainka ooko amubelesi wakwe ambongolo zyobilo. Eelyo naakasika kuliwisizyala, musimbi ooyo wakamunjizya muŋanda. Wisizyala awalo wakamutambula amaanza obilo. 4Wakamukumbila kuti akkale-kkale mazuba otatwe, wakacita oobo. 5Nibwakaca cifumo-fumo mubuzuba bwane bakafuma kulibambila lweendo lwabo, pele wisizyala wakaambila mukwaakwe kuti, “Saanguna kulya kuti ujane nguzu, noteende kabotu.”
6Lino baalumi bobilo aabo bakakkala balya. Alimwi wisizyala wakaambila mukwaakwe kuti, “Ndakukumbila woone abwasunu, utangale.”
7Lino buce mwaalumi ooyu naakanyamuka kuti aende wisizyala wakamukasya alimwi, woona abwalo oobo. 8Mubuzuba bwasanu, nibwakaca, wakafuma kuti aende, pele wisizyala wakamukasya wakati, “Peepe, akaka ulainka kwabakumazuba.” Aboobo bakalya boonse bobilo.
9Lino muntu ooyu amwanakasuwa wakwe amubelesi wakwe nibakalibambila kuti beende, wisizyala wakati kulinguwe, “Bona, lyaunka kale, ino kuti oona buyo kuno. Woona utangale, juunza inga wafuma kulibambila, muunke kulindunywe.”
10Pele mwaalumi taakwe nakoona, wakanyamuka, wakeenda mane waakusika kufwiifwi aku Jebusi nkokuti Jelusalemu. Wakalijisi ambongolo zyobilo zyakajisi zikkalilo, amwanakasuwa wakwe. 11Basike buyo afwiifwi a Jebusi zuba lyakalomba moombe, mubelesi ooyo wakaambila simalelo aakwe kuti, “Atuleye mumunzi wa Bajebusi toone.”
12Pele walo wakamwaambila kuti, “Tatweelede kuleya mumunzi wabamasi, batali Baisilayeli. Atwiindilile tuye ku Gibeya. 13Tukoonene nkuko nikuba ku Lama. 14Mpoonya bakaindilila munzi wa Jebusi, baakusika ku Gibeya mucisi ca Benjamini zuba nolibbila. 15Bakaleela nkuko kuti bakoone, Mulevi wakainka akuyookkala mubbuwa lyakulyookezela lyamunzi ooyo, pele taakwe muntu naba omwe wakabatola kuŋanda kuti bakoonene nkuko pe.”
16Kumane kwakasika umwi mudaala wakazwida kumuunda kumangolezya. Muntu ooyu wakali kukkala munyika yatulungu-lundu ya Efulemu, wakali mweenzu mu Gibeya. Banyinzi bakali bamusyobo wa Benjamini. 17Mudaala ooyo naakabona silweendo mubbuwa lyamunzi wakamubuzya kuti, “Ino wazwida kuli? Alimwi uya kuli?” 18Walo wakaingula kuti, “Twazwa ku Betelehemu mucisi ca Juda, tuya kule kucisi catulundu-lundu ca Efulemu nkwezwa. Ndakainkide ku Betelehemu, lino ndimunzila kupiluka kumunzi wangu. Pele taakwe wanditambula pe. 19Tulijisi bwizu bwambongolo zyesu abulilu bwesu, mebo a musimbi ayooyo ngotulaawe, tobatwanga bako.”
20Mpawo mudaala wakati, “Mbubo inga moona kwangu, inga ndamucitila zyoonse nzyomuyanda, kuti mutabi nomoona mubbuwa.” 21Nkaako wakabaleta kuŋanda yakwe, ooko wakasanina mbongolo zyabo, alimwi nibakamana kusamba kumaulu bakalya.
22Lino kabacikondedwe, baalumi babi bamumunzi bakazinguluka ŋanda akukonkoola acitendele, nkabela bakaambila mwiniŋanda kuti, “Mugwisye anze mweenzu wako kuti tumucite mbotuyanda.”
23Mpoonya mwiniŋanda ooyo wakazwa anze, wabaambila kuti, “Peepe, nobakwesu, mutaciti boobo pe. Mulibwene kuti mmweenzu wangu. 24Ino mbuti mwanaangu musimbi ooyu amwanakasuwa wakwe, ambweni ndilete mbabo anze. Inga mwacita kufumbwa ncomuyanda, pele kutali kulinguwe.” 25Pele bantu aabo taakwe nibakamuswiilila. Abone boobo Mulevi wakatonka mwanakasuwa wakwe anze nkabela bakacita mbobayanda masiku oonse do nibwakaca. Nibwakangwengwemuka, bakamuleka.
26Lino mukaintu ooyo wakaboola wazoowida amulyango waŋanda mwakali mwaalumi wakwe kusikila zuba nilyakapasula. 27Mpawo mulumaakwe wakabuka, eelyo naakajalula ŋanda kuti atalike lweendo lwakwe, wakabona mwanakasuwa wakwe kalede amulyango maanza kali acikunguzyo. 28Mpoonya wakamwaambila kuti, “Buka tweende.” Pele walo taakwe naakaingula pe. Eelyo wakamutansika ambongolo yakwe, mpawo wakatalika lweendo lwakuya kumunzi wakwe. 29Nkabela naakaakusika, wakaakunjila muŋanda akugwisya panga. Wakatalika kukosoola mwanakasuwa wakwe ooyo muzibeela zili kkumi azibili. Kumane wakazitumizya muzisi zyoonse zyanyika ya Isilayeli. 30Lino boonse bakacibona bakati, “Cintu cili boobu tacinacitikide alili. Ino tulacita buti amakani aaya?”
Currently Selected:
Babetesi 19: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
