Babetesi 18
18
Mika amusyobo wa Dani
1Mumazuba aayo kwakanyina mwami Muisilayeli. Musyobo wa Dani wakali kuyanda busena bwakukkala nkaambo balo tiibakana tola cisi cabo akati ka Baisilayeli. 2Nkaako Badani bakasala baalumi bosanwe basicamba kuzwida ku Zola aku Asyitoweli kuti bakatwele nyika akwiibona mbwiibede. Bakabaambila kuti, “Kamuya mukatwele nyika.” Eelyo nibakasika kunyika yatulundu-lundu ya Efulemu bakasikila kuŋanda ya Mika. 3Kabali ooko bakaziba mwaambo wa Mulevi uulya, nkabela bakamutola kumbali akumubuzya kuti, “Ino wakaboola buti kuno? Alimwi ncocita ncinzi? Ino mulimo nzi wini ngocita?”
4Wakabaambila kuti, “Twakazuminana a Mika, ndimubelesi wakwe, ndendime mupaizi wakwe.”
5Badani bakati ku Mulevi ooyo, “Twakukumbila tubuzizye kuli Leza kuti naa tweenda lubotu.”
6Mupaizi ooyo wakabaambila kuti, “Kamuya muluumuno. Mwami Leza ulilubwene lweendo lwanu oolu.”
7Baalumi aabo bosanwe bakainka, baakusika ku Laisyi akubona kuti bantu bakooko bakali kukkala cakuliiba mbuli Basidoni. Bakali muluumuno, tiibakali kubula cintu niciba buti, bakalivubide. Bakali kukkala kulaale a Basidoni, bakalikkalilide buyo, kabataswayani. 8Baalumi bosanwe aabo nibakapiluka ku Zola a Esyitawoli, babunyina bakababuzya kuti, “Mwaleta aali buti?” 9Bakaingula kuti, “Amunyamuke atukalwane munzi wa Laisyi nkaambo twakiibona nyika alimwi nimbotu. Mutaide kukkala, atweende! Tukiisaale! 10Tuyoojana bantu baliibide buyo. Nyika nimpati, alimwi Leza wiiaba kale kuli ndiswe, ninyika iitabuli cintu niciba buti.”
11Lino bali myaanda iili cisambomwe bamusyobo wa Dani, kabajisi zilwanyo bakanyamuka kuzwa ku Zola aku Esyitawoli, 12bakainka akuyooyaka zivuka ku Kiliyatijeyalimu mucisi ca Juda. Nkankakaako busena oobo ncobwiitwa kuti Mahenedani, nkokuti zivuka zya Dani. Busena oobu buli kumbo lya Kiliyatijeyalimu.
13Kuzwa kooko bakaya kumbele eelyo bakasika kucisi catulundu-lundu ca Efulemu, bakasikila kuŋanda ya Mika.
14Mpoonya baalumi bosanwe baya bakali kuyootwela nyika ya Laisyi bakaambila mbubakali aabo kuti, “Sena mulizi kuti mumaanda aaya kuli kabaki kabupaizi kaefodi, mutuni uubezedwe, mutuni uufulidwe amutuni umwi? Kayi mulizi cakucita.” 15Baalumi aabo bakaleela nkuko akusika ku ŋanda ya Mulevi uulya kumunzi wa Mika, nkabela bakamubuzya mbuli mbwaakali kupona. 16Baalumi aabo bakali myaanda iili cisambomwe azilwanyo zyabo bakaima kumbali aamanjililo aamulyango mupati. 17Eelyo basikutwela bosanwe baya bakanjila batola mutuni wansiliva amituni imwi akabaki kabupaizi. Ciindi eeco mupaizi ooyo wakaliimvwi kumbali aamanjililo aamunzi abaalumi myaanda iili cisambomwe bakajisi zilwanyo.
18Bantu aaba nibakanjila muŋanda ya Mika akugwisya mutuni uufulidwe amituni imwi akabaki kabupaizi, mupaizi ooyo wakababuzya kuti, “Ncinzi ncimwacita?”
19Balo bakamwiingula kuti, “Otusabila, umuna buyo, ulaba mulailili amupaizi wesu. Sena ncibotu kuti koli mupaizi wamuntu omwe buyo mucilawo camusyobo woonse umwi wa Isilayeli?” 20Naakamvwa boobo mupaizi ooyo wakakondwa kapati wakabweza kabaki kabupaizi amituni iilya, wakainka ambabo.
21Mbubakazwa oobo bainka, basolozya bana a ŋombe alubono lumwi kumbele lyabo. 22Nibakeenda musinzo uuli mbuubede, kuzwa kumunzi wa Mika, Mika abasinkondo bamwi bakabungana kuti baccilile bamusyobo wa Dani. 23Bababone buyo bakoompolola, Badani nibakacebuka bakati kuli Mika, “Ino mwanjilwa nzi kuti muboole kamuli mpi iili boobu?”
24Mika wakati, “Mwatola baleza bangu, amupaizi antoomwe, ino mebo ndasyaalilwa nzi? Ani mwandibuzizya nzi kuti, ‘Wanjilwa nzi?’”
25Eelyo Badani bakamwaambila kuti, “Watusabila, ccita koyanda kuti aaba bakuvumpe. Yebo amukwasyi wako mulajaigwa uupu.” 26Badani bakeenda, Mika naakabona kuti mbayumu wakapiluka buyo kumunzi.
27Kabajisi amituni yakapangide Mika amupaizi wakwe, Badani bakaakusika ku Laisyi, ooko kwakali bantu baya bakaliibide, bakabasaala akutenta munzi wabo. 28Taakwe wakali kukonzya kubavuna nkaambo kwakali kule aku Sidoni alimwi tiibakali kweendelana amisyobo imwi. Bakali kukkala mukkuti lyaku Betelehobi. Bamane kubakoma Badani bakayakulula munzi akukkala muli nguwo. 29Eelyo bakuuita kuti Dani zina lyasikale wabo, mwana wa Isilayeli, munzi ooyo kusaanguna wakali kwiitwa kuti Laisyi. 30Badani bakalibikkila mutuni wansiliva uufulidwe. Bana ba Jonatani mwanaa Gesyomu, mwanaa Mozesi, mbibakali bapaizi bamusyobo wa Dani kusikila bantu nibakatolwa mubuzike. 31Mbombuboobu Badani mbubakali kukomba mutuni wakafulidwe a Mika mumazuba oonse ŋanda ya Leza niyakali ku Syailo.
Currently Selected:
Babetesi 18: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
