Babetesi 11
11
1Lino Jefuta waku Giliyadi wakali silumamba singuzu. Wisi wakali Giliyadi, banyina bakali baamu. 2Giliyadi wakalijisi abamwi bana balombe kunze lya Jefuta mbaakazyala amukaintu wakwe wini. Lino aaba balombe nibakakomena, bakatanda Jefuta akuti, “Taakwe ancotikakone kuli taata, uli wamusokwe.” 3Aawo Jefuta wakatija akusiya bana bokwabo, waakukkala munyika ya Tobu. Wakamvwana abamwi baalumi batakali kabotu watalika kweenda ambabo.
4Nicakaba ciindi, Baamoni bakalwana Baisilayeli. 5Nkaako basololi baku Giliyadi bakakwiita Jefuta kuzwa ku Tobu. 6Bakati, “Koboola uzootusolwede mukulwana a Baamoni.”
7Walo wakati, “Tee mulindisulide, mwakanditanda kuŋanda ya taata. Ani inga mwaboola buti kulindime mwabona mapenzi?”
8Balo bakati, “Pe, kaka mbubo, twaboola kulinduwe lino nkaambo tuyanda kuti usolwede basilumamba boonse kukulwana Baamoni baku Giliyadi.”
9Jefuta wakati kulimbabo, “Atwaambe mwanditola kukulwana Baamoni, wamana Mwami Leza wabaaba kulindime sena inga ndiyooba muleli wanu ncobeni?”
10Balo bakati, “Mwami Leza ngokamboni wesu. Tuyoocita mbubonya oobo.” 11Aboobo Jefuta wakainka abasololi aaba baku Giliyadi, mpoonya bantu bakamupa bweendelezi. Jefuta wakainduluka makani oonse aaya ku Mizipa kumbele lya Mwami Leza.
12Kumane wakatumya nkombe ku mwami wa Baamoni kuyoomubuzya kuti, “Ino ncotuzwanganina ncinzi? Nkaambo nzi ncoonjila munyika yesu?”
13Walo mwami wa Baamoni wakaingula kuti, “Nkaambo Baisilayeli nibakazwa ku Ijipiti bakatola nyika yangu kuzwa kumulonga wa Anoni kuyoosika ku Jaboki, mane ku Jolodani. Mwiijokezye nyika yangu muluumuno.”
14Jefuta alimwi wakabatuma bantu akwiingula mwami wa Baamoni 15kuti, “Baisilayeli tiibakatola nyika ya Mowabu niiba ya Amoni. 16Baisilayeli nibakazwa ku Ijipiti, bakainda munkanda kuyoosika ku Lwizi Lusalala akuyoosikila ku Kedesyi. 17Mpoonya bakatumya nkombe kumwami wa Edomu kuti bakamukumbile kuti abazumizye kwiinda munyika yakwe. Pele wakabakasya. Mbubonya oobo a mwami waku Mowabu bakamukumbila, pele awalo wakabakasya. Aboobo Baisilayeli bakakkala mu Kedesyi.
18“Kuzwa kooko bakanyamuka baandulula nkanda. Bakazinguluka nyika ya Edomu kubikkilizya aya Mowabu baakusika kujwe mutala limwi lya mulonga wa Anoni. Bakayaka zivuka ooko, pele taakwe nibakazubuka mulonga wa Anoni nkaambo ngowakali munyinza wa Mowabu. 19Mpoonya Baisilayeli bakatumya mulomo kuli Sihoni Muamoli mwami wa Hesyiboni, kuti abazumizye kwiinda munyika yakwe. 20Pele awalo Sihoni wakabakasya, wakaleta mpi yakwe yoonse ku Jahazi kuzoolwana Baisilayeli. 21Pele Mwami Leza, Leza wa Baisilayeli wakaaba Sihoni abantu bakwe boonse kulimbabo. Mbombuboobu Baisilayeli mbubakatola nyika yoonse ya Baamoli. 22Bakatola nyika eeyi ya Baamoli kutalikila kumulonga wa Anoni kumusanza kuyoosikila ku Jaboki kunyika akuzwida kunkanda iili kujwe kuyoosikila ku Jolodani kumbo.
23“Mukuti Mwami Leza wa Isilayeli nguwakatanda Baamoli kutegwa bantu bakwe Baisilayeli bakkale mbabo, ani yebo inga wiikakatila buti nyika eeyi? 24Kojisi buyo eeyo leza wako, Kemosi, njaakakupa. Aswebo mbubonya tunoojisi eeco Mwami Leza ncaakatupa. 25Sena yebo ulaanguzu kwiinda Balaki mwanaa Zipoo, mwami wa Mowabu ooyo watakabusya nkondo ku Baisilayeli? Sena kuli naakaboolede kuzootulwana? 26Baisilayeli bakalikkede mu Hesyiboni a Alowe aminzi imwi yakazingulukide kubikkilizya aminzi iili kumbali lya mulonga wa Anoni kwamyaka iili myaanda yotatwe. Ino nootakatunyanga ciindi eeco? 27Wabona, taakwe ncindakubisizya. Nduwe ootibisye ooyanda kundilwana. Mwami Leza mubetesi nguuzi mubi akati ka Baisilayeli a Baamoni.” 28Pele nikuba boobo mwami wa Baamoni taakwe naakaswiilila makani aakaamba Jefuta.
29Mpoonya muuya wa Mwami Leza wakazida Jefuta. Nkaako wakeenda waakwiinda mu Giliyadi amu Manase, amane wakajokela waya ku Mizipa uuli mucisi ca Giliyadi, azwe kooko wakaya ku Amoni. 30Jefuta wakasyomezya Mwami Leza akuti, “Kuti waaba Baamoni, 31kufumbwa uutisaangune kuzwa muŋanda kuzoondicingauzya ndazwa kunkondo, njoomupa abe cipaizyo cakutenta kulinduwe.” 32Amane aawo Jefuta wakazubuka mulonga kuti akalwane Baamoni, eelyo Mwami Leza wakamuzundya. 33Kulwana wakatalikila ku Alowe ngooyo waakusika kumbali aku Miniti aku Abelekelamimu. Minzi eeyi yakali makumi obilo. Wakajaya bantu banji, mbombuboobu Baamoni mbubakazundwa a Baisilayeli.
Mwana musimbi wa Jefuta
34Ciindi Jefuta naakajokela kumunzi ku Mizipa, mwana musimbi wakazwa muŋanda kuzoomucingauzya kazabuzyana akuuma kantimbwa. Ngomwana alikke ngwaakajisi, taakwe uumbi pe. 35Ciindi naakamubona, wakazapula cisani cakwe akaambo kamapenzi ngaakaliletelezya. Wakaamba kuti, “Maawe o mwanaangu, wandipenzya! Nkaambo nzi nooba nduwe oondeetela mapenzi? Ndasyomezya kale ku Mwami Leza, lino nsikonzyi kutacita eeco ncindasyomezya!”
36Walo mwana wakaambila wisi kuti, “Kuti naa wasyomezya kale ku Mwami Leza, kocita eeco ncoosyomezya kuti ulacicita. Mwami Leza wakuzundya Baamoni basinkondonyoko.” 37Amane wakakumbila wisi kuti, “Ndicitila eeci cintu comwe buyo. Ndileke kwamyezi yobilo kuti ngunke abeenzuma nkeende-ende ndemupenzi mumalundu, nkelila kuti ndafwa nketanakwatwa.”
38Wakamuzumizya kuti ainke kwamyezi yobilo. Walo abeenzinyina bakainka kumalundu akuyoolilila nkuko nkaambo wakali kuyanda kujaigwa katanakwatwa. 39Niyakamana myezi yobilo, wakajokela kuli wisi. Eelyo wisi wakacita mbubonya mbwaakasyomezya ku Mwami Leza. Ooyo mwana musimbi wakafwa katanakwatwa katazi mwaalumi. Aawa mpaakatalikila cilengwa ca Baisilayeli, 40cakuti bakaintu kabainka musokwe kwamazuba one mwaka amwaka kuyoolila mwanaa waku Giliyadi.
Currently Selected:
Babetesi 11: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
