Babetesi 12
12
Jefuta a Baefulemu
1Lino Baefulemu bakazubuka mulonga wa Jolodani akuya ku Zafoni, bakwaambila Jefuta kuti, “Ino nkaambo nzi ncookazubuka kuyoolwana Baamoni kotatwaambili swebo kuti tukusindikile? Tulakuumpila muŋanda!” 2Jefuta wakabaingula kuti, “Mebo abantu bangu, twakalikuzwangana a Baamoni. Ndakamwiita, pele mwakakaka kuti mundigwasye kubalwana. 3Mebo nindakabona kuti mwakaka, ndakalisungula buyo kuti ndizubuke nkabalwane Baamoni endikke. Mwami Leza wakandigwasya, ndakabazunda, ino ono ncinzi ncimwaaboolela kundilwana sunu?”
4Mpoonya Jefuta wakabunganya baalumi boonse baku Giliyadi, bakalwana baku Efulemu akubazunda. Baefulemu bakaambide kuti, “Nywebo noba Giliyadi nomuli akati ka Baefulemu a Manase mwakatija kuzwa mulindiswe!”
5Lino mukuti Baefulemu batatiji, Bagiliyadi bakasinkila zito zyoonse zyamulonga wa Jolodani, kufumbwa Muefulemu watitije akumbila kuti, “Andizubuke,” bantu baku Giliyadi bakali kumubuzya kuti, “Sena uli Muefulemu?” Kuti waamba kuti, “Peepe,” 6bakamwaambila kuti, “Amba kuti Syiboleti” walo naa wati “Siboleti” mukuti taakalikukonzya kulyaamba bbala eeli, bakamujata mpoonya aawo akumujaya. Nkabela ciindi eeco Baefulemu bakajaigwa bakasika kuzyuulu zili makumi one azibili.
7Lino Jefuta Mugiliyadi wakabeteka Baisilayeli kwamyaka iili cisambomwe. Kumane wakafwa akuzikkwa mumunzi wakwe uuli ku Giliyadi.
Zya Ibuzani Eloni a Abuloni
8Ciindi Jefuta naakafwa, Ibuzani waku Betelehemu ngowakabeteka Isilayeli. 9Wakalijisi bana balombe bali makumi otatwe abasimbi makumi otatwe. Basimbi wakabakwasya kumikowa iimbi, alimwi wakakwatila bana bakwe balombe bali makumi otatwe kumikowa iimbi. Wakabeteka Baisilayeli kwamyaka iili ciloba. 10Kumane Ibuzani wakafwa akuzikkwa ku Betelehemu. 11Kuzwa waawo, Eloni wamusyobo wa Zebuluni nguwakabeteka Baisilayeli kwamyaka iili kkumi. 12Mpawo Eloni Muzebuluni wakafwa akuzikkwa ku Aijailoni munyika ya Zebuluni.
13Kuzwa waawo Abudoni mwanaa Hilelu Mupilatoni nguwakasolweda Baisilayeli. 14Wakalijisi bana balombe bali makumi one alimwi abazyukulu bali makumi otatwe, aabo bakali kutanta mbongolo zili makumi aali ciloba. Wakabeteka Baisilayeli kwamyaka iili lusele. 15Kumane wakafwa akuzikkwa ku Pilatoni munyika ya Efulemu, kutulundu-lundu twa Baameleki.
Currently Selected:
Babetesi 12: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
