Izaya 9

Mwami mupati uuboola

1Nikuba boobo takuciyoobi limbi mudima kuli baabo bali mupenzi. Ciindi cimwi nyika yamisyobo ya Zebuluni a Nafutali yakali mumapenzi mapati, pele kumamanino uyooleta bulemu kuzwida ku Galilii kukkala bamasi kugama kulwizi kuyoosika kumulonga wa Jolodani.

2Bantu bakali kweendela mumudima, babona mumuni mupati.

Mwami uyooboola

Aabo bakakkede munyika yamudima sunu mumuni wabamunikila.

3Yebo O Mwami Leza, wacita kuti bavule, wacita kuti batangale,

ono mbaaba balasekelela mbuli lisekelela bantu litebulwa

mbuli, ciindi bantu nobasekelela nobaabana zeezyo nzibakasaala.

4Mbuli buzuba lizundwa Bamidiyani watyoloola

joko eelyo lyakali kubaminya,

eelyo ndibakali kukulika, musako wabasikubadyaminina.

5Majombo aabasilumamba oonse akali kubelesegwa munkondo,

zisani zyoonse zibijide bulowa ziyootentwa, nzeziyoovutusya mulilo.

6Twazyalilwa mwana, twapegwa mwana mulombe, bwami boonse buyooba alinguwe.

Uyooitwa kuti, “Mubetesi uugambya,” ngu Leza Singuzu,

Taata Walyoonse alyoonse, “Mwami waluumuno.”

7Nguzu zyabwami bwakwe aluumuno ndwaleta tazikamani,

uyookkala acuuno cabwami bwa Devedi akweendelezya bulelo bwakwe,

uyoobukkazika akubwiimika mubulondo amubululami kuzwa lili alili.

Mwami Leza uyoozicita eezi kwiindila mumakanze aakwe.

Mwami Leza mbwaayosubula Baisilayeli

8Mwami Leza wakatuma makani aakucenjezya balunyungu lwa Jakobo, Baisilayeli. 9Baisilayeli boonse, bakkala mumunzi wa Samaliya bayooziba kuti Leza nguwakacita ceeci. Lino balalitukumuna akulisumpula kabaamba kuti, 10“Maanda aazitina akawa, pele swebo tuyooyaka maanda aamabwe aabezedwe mubusena bwawo. Nikuba kuti ziyako zyamukuyu zyoolwa, pele swebo tuyoobelesya zyamulombe mubusena bwazyo.” 11Pele Mwami Leza wakacita basinkondonyina kuti babalwane. 12Baalamu kulubazu lwakujwe, a Bafilisiti kulubazu lwakumbo, boonse bakajalula milomo yabo kuti bamene Baisilayeli buumbulu. Nikuba boobo bukali bwa Leza tabunamana janza lyakwe licivuumukide.

13Pele Baisilayeli tabanapiluka kuli yooyo wakabauma, tabayandauli Mwami Leza Singuzuzyoonse. 14Mubuzuba bomwe buyo, Mwami Leza uyoosubula basololi ba Baisilayeli abantu babo, uyookosola mutwe amucila wabo, tukunka amatete. 15Bapati abaalumi balemenede ngomutwe, basinsimi baiisya zyakubeja ngomucila. 16Basololi babantu aaba mbababasowa, aabo basolwedwa mbabasweeka. 17Nkaako Mwami Leza takabotelwi abakubusi babo, alimwi takooyoobafwida luse bamukabafu abamusyaala, nkaambo bantu boonse mbaasizibi tabalemeki Leza. Nikuba boobo bukali bwa Mwami Leza tabumani, pele janza lyakwe licivuumukide.

18Bubi bulatenta mbuli mulilo, bulaumpa azisonso. Bulatenta mbuli mulilo uutenta sokwe uusuntumusya busi bunji. 19Lino akaambo kakuti Mwami Leza Singuzuzyoonse ulinyemene citunduluzyo cakwe cilapya mbuli mulilo munyika yoonse akujaya bantu, nkabela muntu umwi aumwi ulalibonena lwakwe mwini. 20Bantu basaantikizyanya nyika yoonse kabayabubwezelela tulyo ntobakonzya kujana, nikuba boobo tabakkuti pe. Batalika akulya bana babo beni! 21Bamanase a Baefulemu batalika kulwana mulicabo, bamane bamvwana akuyoolwana bacisi ca Juda. Nikuba boobo bukali bwa Mwami Leza tabunamana pe, janza lyakwe licivuumukide.

Currently Selected:

Izaya 9: Tonga96

Highlight

Copy