Izaya 10

1Maawe kuli baabo babikka milawo iitaluleme, aabo balemba malailile aadyaminina bantu bangu, 2kusinkila bacete kuti kabatali kwayi, balabeteka bantu bangu badyaminidwe cakutalulama. Baabonena kuli bamukabafu, banyanga bamusyaala lubono lwabo. 3Ino muyoocita buti mubuzuba Leza mbwayoomusubula? Muyoocita buti ciindi natikamuletele mapenzi kuzwida kunyika yakulaale? Muyootijila kuli ni kuti mukagwasigwe? Ino muyoosiila ni mbono zyanu? 4Muyoojaigwa munkondo akuyootolwa mubuzike. Nikuba boobo bukali bwa Mwami Leza tabunamana pe, janza lyakwe licivuumukide.

Leza mbwaakabelesya muleli mupati waku Asiliya

5Maawe kulinduwe O Asiliya. Nduwe ngwendibelesya mbuli musako wangu wakutunduluzya aabo bandibisizya. 6Ndakutuma kuti ukalwane musyobo uutalemeki Leza, ndakutuma kuti ukalwane bandinyemya. Ndakutuma kuti ukasaale lubono lwabo akuyoobalyataula mbuli matope munzila. 7Pele walo takanzi boobo alimwi tayeeyi boobo pe, makanze aakwe ngakuti anyonyoone, ncayanda nkunyonyweedalimwi misyobo minji ilobe. 8Waamba kuti, “Basilutwe bangu bankondo mbaamami boonse. 9Ndakazunda minzi ya Kalino a Kaakemisyi, minzi ya Hamati a Aapadi, minzi ya Samaliya a Damasikasi. 10Ndakazunda malelo manji aakomba mituni ajanza lyangu. Ndakaazunda aajisi mituni minji kwiinda yaminzi ya Jelusalemu a Samaliya. 11Mbuli mbundakanyonyoona munzi wa Samaliya antoomwe amituni yawo, mbubona oobo mbwendiyoonyonyoona munzi wa Jelusalemu amituni yawo.”

12Lino Mwami Leza aakumana kucita ceeco ncayanda kucilundu ca Ziyoni amunzi wa Jelusalemu uyooti, “Ono ndiyanda kusubula mwami waku Asiliya akaambo kakulikankaizya akulisumpula kwakwe.” 13Kayi ulati, “Ndakacita eezi akaambo kanguzu zyajanza lyangu akabusongo bwangu, nkaambo ndaamaanu. Asiliya ulati, ‘Ndakamwaya minyinza ndakabanyanga mbono zyabo, ndakalwana anguzu mbuli zyamupoho akuzunda bami babo.’ 14Mbuli bujatwa citeente, mbubonya oobo ambebo ndakabweza mbono zyamisyobo eeyo. Mbubonya mbuli bantu mbobabweza mayi aasiigwa, mbubonya oobo ndakayobolola zisi zyoonse, taakwe cakali kubbubba, nokuba kulila.” 15Eelyo Mwami Leza wakaamba kuti, “Sena keembe kalakonzya kulidunda kuti nkakacita mulimo mupati kwiinda ooyo uukabelesya? Noliba saha, sena ndipati kwiinda ooyo uulibelesya? Musako tuuli nguubweza muntu, pele muntu nguubweza!”

16Lino Mwami Leza Singuzuzyoonse uyootumina bulwazi oobo buzoocisa zinkuntumina zyabasilumamba bakwe. Mumibili yabo kuyooba mulilo uutazimiki. 17Leza, nguwe mumuni wa Isilayeli uyooba ngomulilo. Leza Uusalala wa Isilayeli uyooba mabanga-banga aamulilo aayookonzya kutenta zyoonse mubuzuba bomwe buyo, naaba mamvwa azisonso. 18Zisaka zyakwe zyeebelwa amyuunda yambolezi, yoonse iyoosyukuta amulilo mbuli bumana muntu uuciswa. 19Kuyoosyaala buyo masamu mace cakuti naba mwana ulakonzya kwaabala.

Basyeede Baisilayeli

20Mubuzuba oobo Baisilayeli basyeede, aabo bacili baumi balunyungu lwa Jakobo, tabaciyoomusyomi ooyo wakabakoma. Pele bayoosyoma Mwami Leza Uusalala wa Isilayeli. 21Basyeede ba Jakobo bayoopilukila, bayoopilukila kuli Leza wabo Singuzuzyoonse. 22Nkaambo nikuba kuti bantu bako O Isilayeli kabali banji mbuli musenga wakulwizi, bace buyo mbabayoojoka. Bantu babambilidwe lunyonyooko oolo lubeelede. 23Iiyi ncobeni, Mwami Leza Singuzuzyoonse uyooleta lunyonyooko kunyika yoonse, mbubonya mbuli mbwaakaamba kuti uyookucita ooku.

Mwami Leza mbwayoosubula cisi ca Asiliya

24Mboobu mbwaamba Mwami Leza Singuzuzyoonse ulati, “Nywebo nobantu bangu nomukkala mu Ziyoni, mutayoowi Baasiliya pe, aabo bamuuma amusako, aabo bamukonga ankoli mbuli bwakali kucita Baijipiti. 25Mukaindi kaniini buyo ndilaleka kumunyemena, bukali bwangu bulabukila mbabo kuti banyonyoonwe. 26Imebo lwangu, nde Mwami Leza Singuzuzyoonse, ndiyoobakwabbaula answepu mbuli mbundakauma Bamidiyani kumwaala waku Olebu, ndiyootondezya musako wangu atala amaanzi mbuli mbundakacita ku Ijipiti. 27Mubuzuba oobo ndiyoomwaangununa kuzwa munguzu zya Baasiliya tamuciyoominwi, ajoko lyabo lili munsingo liyootyolwa.”

Mbubakasaalwa

28Basinkondonyoko bali mu Aiyati! Bainda kale Migiloni! Basiya bulilu bwabo ku Mikimasyi. 29Baisotoka kale nzila, bati, “Tuyooonena ku Geba.” Bantu bamumunzi wa Lama bakakankama. Bamumunzi wa Saulu waku Gibeya batija. 30Amulilisye nobantu baku Galimu! Amuswiilile nobantu baku Laisya! Amumvwe nywebo nobantu baku Anatoti! 31Bantu baku Madimena baku Gebimu bayuba. 32Sunu bayooimina ku Nobu, bayoovunga ntuku, kuvungila cilundu ca Ziyoni, kalundu ka Jelusalemu. 33Bona, Mwami Leza Singuzuzyoonse uyoobatyola, uyoobalosya mbuli mitabi yagonkwa kuzwa kuzinyina. Basikulisumpula abaabo balinonomona bayoogonkwa akutolwa aansi. 34Mwami Leza uyoobatema bakawe mbuli butemwa cisaka akeembe, Lebanoni uyooolwa kumbele lya Singuzu.

Currently Selected:

Izaya 10: Tonga96

Highlight

Copy