Izaya 8
8
Zya mwana mulombe wa Izaya
1Lino Mwami Leza wakati kulindime, “Bweza cilembelo cipati, nkabela ulembe majwi aaya mubulembo bupati alincico uti, ‘Mahasyalalihasyibazi nkokuti, fwanzya kunyanzya, fwambaana kusaala.’ 2Kotola baalumi bobilo basyomeka, ba Uliya mupaizi a Zekaliya mwanaa Jebelekiya kuti bakabe bakamboni bako.”
3Musule akooku, mukaintu wangu musinsimi wakamita akuzyala mwana mulombe. Mpoonya Mwami Leza wakandaambila kuti, “Muulike kuti, ‘Fwanzya kunyanzya, fwambaana kusaala.’ 4Nkaambo mwana mulombe ooyu katanakomena akuziba kwaamba kuti, ‘Baama naa Taata,’ lubono loonse lwaku Damasikasi alwaku Samaliya luzoosaalwa, akutolwa amwami waku Asiliya.”
Mwami waku Asiliya ulaboola
5Mwami Leza alimwi wakandaambila kuti, 6“Nkaambo kakuti Baisilayeli bakaka maanzi aabateme aakalonga ka Syilowa bakkomanina Lezini amwanaa Lemaliya, 7mebo nde Mwami Leza njooleta mwami waku Asiliya abasinkondo bakwe boonse kuti bazoolwane cisi ca Juda. Bazoopompa mbubonya mbuli fwipi-fwipi lyamaanzi lifwasukila mulonga wa Yufuletisi.” 8Bazookukula cisi ca Juda coonse akumana bantu mbubonya mbuli bukukula mulonga nuusika mububiya akubbizya zintu zyoonse. Aalo maanzi aawo ayoobaama mbuli mababa aamuyuni akuzuzya nyika yako yoonse. Akaka Imanuweli, yebo O Leza koba aandiswe. 9Amuzyangame, nywebo nomisyobo yabantu, nikuba boobo mulapwaigwa! Amuswiilile anywebo nomuli mumasi aali kulaale. Amulibambilile nkondo, pele mulapwaigwa! Iiyi, amulibambile, pele mulapwaigwa! 10Amuyeeye mbomuticite, pele tamutizwidilile. Amupangane mbomunga mwacita, pele taakwe ncocitigwasye pe, nkaambo Leza ulaaswe.
Mwami Leza mbwaakacenjezya musinsimi
11Munguzu zyakwe mpati Mwami Leza wandicenjezya kuti intabi netobela nzila zyabantu aaba pe. Wati, 12“Yebo utanoonjili muli nzyobapangana, alimwi utanooyoowi zintu eezyo nzyobayoowa balo pe. Utanookankami. 13Koyeeya kuti mebo nde Mwami Leza Singuzuzyoonse ndilasalala, ndime ngoelede kuyoowa ngoelede kulemeka. 14Uyooba busena busalalisya, pele kulibaaba ndiyooba bbwe lileba bantu, mwaala uufumpula. Kubantu baku Jelusalemu ndiyooba cisilazya akakole. 15‘Bunji bwabo bayoolifumpula, bayoowa akutyoka bayooteegwa akucegwa.’”
Bantu mbubakacenjezegwa zyakusonda
16Lino nywebo nobasikwiiya bangu amwaambe kabotu makani aaya Leza ngaandipa. 17Ndalangila Mwami Leza ooyo uulisiside kuli balunyungu lwa Jakobo. Alikke ngwendisyoma.
18Tee kayi mwandibona mebo abana bangu aaba Mwami Leza mbaakandipa? Ndendiswe zigambya azitondezyo mu Isilayeli eezyo zyazwa ku Mwami Leza Singuzuzyoonse, ooyo uukkazikide cuuno cakwe cabwami mucilundu ca Ziyoni.
19Ciindi bantu nobamwaambila kuti amukabuzye zyamapenzi aanu kubasondi abamukabami bapetekezya akuvuta-vuta mukwaamba kwabo, mutakainki. Tee kayi mweelede kabuzya Leza wanu. Ani inga mwaya buti kubafu kubuzya zyabaumi? 20Kuti kabataambi zyanjiisyo abumboni bwa Leza nkokuti kunyina mumuni mulimbabo.
Ciindi camapenzi
21Bantu bayooingaila munyika, kabatyompedwe akufwa nzala. Nkabela muciindi canzala amukunyema kwabo bayoosinganya mwami wabo a Leza wabo. Bayoolungumana mujulu, 22akusinama kutongomwena ansi, nikuba boobo taakwe ancobatikabone pe, pele buyo mapenzi amudima uusiya mbi, uuyoosya mumudima mumonya mobayootonkelwa.
Currently Selected:
Izaya 8: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
