Izaya 7
7
Izaya mbwakacenjezya Ahazi
1Lino Ahazi mwanaa Jotamu mwana wa Uziya naakali mwami wacisi ca Juda kwakaba nkondo. Mwami Lezimu waku Alamu a Peka mwanaa Lemaliya mwami wa Isilayeli bakaboola kuzoolwana munzi wa Jelusalemu, pele bakakacilwa kuuzunda. 2Lino mwami wacisi ca Juda naakamvwa makani aakuti cisi ca Alamu caswaangana a Baefulemu, Ahazi abantu bakwe bakabwembwa mbubonya mbuli buzungaana masamu lyuunga luuwo.
3Mpoonya Mwami Leza wakaambila Izaya kuti, “Koya yebo amwanaako Syeyajasyubu mukaswaangane a Ahazi kumagolelo aaziba lyakutala, kumugwagwa wamuunda wamuntu uusanzya.” 4Ukamwaambile kuti, “Ucenjele utaduntaanyi moyo, utayoowi pe. Utatyompwi akaambo kabukali bwabo. Bukali bwa Mwami Lezini, bwa Baalamu abwa mwanaa Lemaliya taakwe nkobutola buli buyo mbuli busi busunta-sunta bwazisisi.” 5Baalamu, Baefulemu a Lemaliya bakanza kukunyonyoona balati, 6“Atusaale cisi ca Juda, atucoole kutegwa tucaabane, kwamana tubikke mwanaa Tabeeli kuti abe ngomwami wabo.” 7Pele mboobu mbwaamba Mwami Leza, “Eeci tacikooba, eeci tacikoocitika pe, 8nkaambo kakuti cisi ca Alamu tacijisi nguzu ziinda zyamunzi waco mupati wa Damasikasi, awalo munzi wa Damasikasi tuujisi nguzu ziinda zyamwami wawo Lezini pe. Kwaamba zyacisi ca Isilayeli, nkoiti kamanine myaka iili makumi aali cisambomwe aisanu tabacinooli aacisi pe, cisi cabo cinoomwaidwe akumana.” 9Nkabela cisi ca Isilayeli tacijisi nguzu ziinda zyamunzi waco mupati wa Samaliya, awalo munzi wa Samaliya tuujisi nguzu ziinda mwami wawo Peka. “Nkaako kuti naa kotazuunyene mulusyomo, taakwe nkoyootana pe ayebo.”
Citondezyo ca Imanuweli
10Mwami Leza wakaambila mwami Ahazi alimwi kuti, 11“Kondikumbila mebo nde Mwami Leza wako kuti nkupe citondezyo comwe. Cilakonzya kuba kunsi kwini aanyika nokuba mujulu mwini.” 12Pele Ahazi wakati, “Nsikookumbila nsiyandi kusunka Mwami Leza pe.” 13Mpawo Izaya wakati, “Lino amuswiilile nywebo nolunyungu lwa Devedi! Sena kwamuceela kupenzya nkomupenzya bantu? Sena ono muyanda kuti mupenzye Leza wangu? 14Nkaako ono Mwami Leza lwakwe mwini ulamupa citondezyo. Musimbi uutazi musankwa uyoomita, uyoozyala mwana mulombe ngwatikaulike zina lya Imanuweli. 15Nkabela mukukomena kwakwe unooyoolya mabisi abuci mane kusikila nayoolisalila cibotu acibi. 16Pele kacitanasika ciindi eeco, zisi zyabami bobilo aaba mboyoowa zinooli matongo buyo zinoonyina bantu.
17“Mwami Leza uyookuletela yebo abantu bako alimwi amukwasyi wabwami bwako woonse, mazuba aamapenzi mapati aatanabwenwe kuzwida kuciindi bulelo bwa Isilayeli nibwakaandaana abwaku Juda. Leza uyooleta mwami wacisi ca Asiliya!
18“Mazuba aayo, Mwami Leza uyoosibila Baijipiti kuti bakayoboloke kuzwida kumagolelo aamulonga wa Nailo mbuli buyoboloka nzinini, a Baasiliya mbuli nzuki. 19Bazookkala mumakkuti, mumimpata mumpangala amuluvuna lwamamvwa amutukalo moonse.
20“Mumazuba aayo Mwami Leza uyoobbadela muntu uuzwa mutala lyamulonga wa Yufuletisi, nguwe mwami waku Asiliya, kuti azoomukulule malezu akunyoola masusu aakumitwe yanu, aboya bwaamibili yanu boonse, uzootolelezya amalezu aanu.
21“Mumazuba aayo, kuli kunga muntu uvubide buyo koombe komwe ampongo zyobilo. 22Kwamana unooyookama mukupa munji kuzwa kulinzizyo akukonzya kumusanina kabotu. Bantu boonse bayoosyaala kabali baumi banooyoolya mabisi abuci.
23“Mumazuba aayo myuunda yamisaansa oomo mwakalikukomena misaansa iili cuulu iikonzya kuulwa masyekeli aansiliva aali cuulu muyoojanwa buyo mamvwa azisonso. 24Bantu bayooinka ooko kuyoovwima kababwezede buta amivwi. Nyika yoonse iyoozula mamvwa azisonso zyalo. 25Moonse muzyuulu oomo mwakali kusyangwa zisyango, muyoomena mamvwa cakuti taakwe muntu uyoosola kunjila oomo. Ayooba buyo macelelo aaŋombe ambelele.”
Currently Selected:
Izaya 7: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
