Izaya 6

Leza mbwaakaita Izaya kuba musinsimi

1Mumwaka mwami Uziya naakafwa, ndakabona Mwami Leza kakkede acuuno cakwe cabwami, nkabela jansi lyakwe lyabwami lyakazuzya ŋanda ya Leza. 2Atala lyakwe kwakali baselafu, omwe-omwe wabo wakajisi mababa aali cisambomwe. Mababa obilo akavumbide busyu bwakwe, amwi obilo akavumbilide zituta zyabo, obilo umwi aumwi ngaakali kuulusya. 3Nkabela baselafu bakali kuti, “Uusalala, Uusalala, Uusalala! ngo Mwami Leza Singuzuzyoonse, nyika yoonse izwide bulemu bwakwe.” 4Lino akaambo kamunzunzumina wamajwi aabo milyango antalisyo zyazyuumino zyamaila zyakazungaana, ayalo ŋanda ya Leza yakazula busi. 5Mpoonya mebo ndakalila, “Maawe, ndamana sunu! Kayi ndimuntu eentaambi zisalala, ndikkala akati kabantu bataambi zisalala, pele ono ndabona Mwami, Mwami Leza wamakamu Singuzuzyoonse.” 6Mpoonya umwi wabaselafu aabo wakaulukila kulindime kayumwide akkala lyamulilo ndyaakabweza alumano kuzwa acipaililo. 7Kkala eelyo wakaligumika kumulomo wangu akwaamba kuti, “Wabona, eeci caguma mulomo wako, mulandu wako wamana, cinyonyoono cako calekelelwa.” 8Mpawo ndakamvwa jwi lya Mwami Leza kaliti, “Ino nguni ngwentitume? Nguni uutibe mutumwa wesu?” Eelyo mebo ndakati, “Ndime ndituma!” 9Mpoonya wakati, Koya ukaambile bantu aaba kuti, “Kumvwa mulamvwa, pele tamumvwisisyi, kubona mulabona, pele tamubonesyi. 10Cita maanu aabantu aaba kuti abe mafwiifwi, sinka matwi aabo, cita kuti bafunye meso. Ambweni inga baba nobabona akumvwa akuba aamaanu kuti beempe mbaponye.” 11Mpoonya ndakati, “Ino cilaba ciindi cilamfu buti kuti kakuli boobu, O Mwami Leza?” Walo wakandiingula kuti, “Mane kusikila minzi inyonyoonwe ibe matongo. Mane kusikila maanda asyaale buyo. Mane kusikila myuunda inyonyoonwe ilobe. 12Mane kusikila mebo nde Mwami Leza ndigwisye boonse, nyika ibe luundu. 13Nikuba kuti kusyaale bantu bace buyo munyika, iyoonyonyoonwa alimwi. Pele mbuli mutelebinti amubanga mbuusyaala cisiko nuutemwa mbubonya oobo mbuto iisalala iyooba cisiko munyika.”

Currently Selected:

Izaya 6: Tonga96

Highlight

Copy