Izaya 63

Mwami Leza mbwaakazunda bamasi

1Ino nguni uuboola uuzwida ku Edomu, uuzwa ku Bozila uusamide zisani zisalala pyu? Nguni ooyu uusamide zisani zyabulemu uunyakaila cakulimvwa manguzu? Ndime neenkanana mubululami, neenkonzya kufutula. 2Nkaambo nzi zisani nozisalala mbuli zyabaabo balyatauka nsaansa mucikandilo? 3Ndakalyatauka mucikandilo endikke, taakwe muntu wakaboola kuzwa kumisyobo kuzoondigwasya. Ndakabalyatauka mukunyema kwangu, ndakabadyabbauka mubukali bwangu, bulowa bwabo bwakatapaukila azisani zyangu, nkabela zisani zyangu zyoonse zyakabija. 4Nkaambo mebo ndakali buyeeyede buzuba bwakubweedezezya bubi, lino casika ciindi cakunununa. 5Ndakalanga, pele kwakanyina muntu uubagwasya, ndakagambwa kuti kunyina naba omwe wakabagwasya, nkaako ndakabalwana canguzu akuboko kwangu kusikila ndazunda, bukali bwangu bwakandigwasya. 6Ndakalyatauka bamisyobo mubukali bwangu, mubukali bwangu ndakacita kuti bakolwe, ndakatila bulowa bwabo ansi.

Mwami Leza mbwali mubotu ku Baisilayeli

7Ndalungulula zyaluzyalo lwa Mwami Leza,

zyamilimo yakwe eeyo njotweelede kumutembawida,

kweendelana azeezyo zyoonse nzyaakatucitila.

Iiyi, zintu zinji nzyaakacitila balunyungu lwa Isilayeli,

kweendelana ankumbu aluzyalo lwakwe lunji.

8Wakati, “Kasimpe mbantu bangu, mbana batakonzyi kundibejela.” Nkaako wakaba Mufutuli wabo. 9Mumapenzi aabo wakapenga ambabo. Mungelo wakwe wakazoobavuna. Muluyando amulweengelelo lwakwe wakabanununa. Wakabanyamuna akubabweza kuzwa lili. 10Nikuba boobo bakamuzangila akuusya muuya wakwe nsoni. Eelyo Leza lwakwe wakababukila akuba sinkondonyina, lwakwe mwini wakaba nguubalwana. 11Aawo bantu bakatalika kwiibaluka mazuba aaciindi, mazuba aa Mozesi. Bakatalika kubuzya kuti, “Ino uli kuli Mwami Leza ooyo wakabaleta akubainzya mulwizi kwiindila mumweembezi wabutanga bwakwe? Ino uli kuli ooyo wabapa Muuya wakwe Uusalala? 12Uli kuli ooyo wakapa Mozesi nguzu zyabulemu kutegwa akonzye kucita zigambya, wakaandaanya maanzi kumbele lyabo kutegwa walo abe aampuwo iitamani? 13Uli kuli ooyo wakabainzya mumpisi yalwizi? Mbubonya mbuli bbiza mbolyeenda musalala, tiibakalifumpula pe. 14Mbubonya mbuli ŋombe ziya mucibanda Muuya wa Mwami Leza wakabapa kulyookezya. Mbombubo oobu O Mwami Leza mbookeenzya bantu bako kuti ube aazina lyabulemu.”

Kukomba kwakuyanda kweengelelwa akugwasigwa

15Yebo O Mwami Leza wesu, langa ansi aano mpotubede kuzwa kujulu, tulange kuzwa kucuuno cako cabwami cisalala cabulemu. Ino buli kuli busungu anguzu zyako mpati? Tocitweeteleli akutubeda aankumbu pe. 16Pele yebo nduwe Taata, nikuba kuti Abulahamu tatuzi naa Isilayeli tatugwasyi. Yebo O Mwami Leza ndonduwe Taata nduwe Munununi wesu kuzwa lili, ndezina lyako. 17O Mwami Leza, nkaambo nzi notucita kuti tupambuke munzila zyako akutupa cinguni kuti tutakulemeki? Boola O Leza akaambo kababelesi bako, misyobo eeyi njookabala kuti ibe lukono lwako. 18Kwakaindi kaniini bantu bako bakakona busena bwako busalala, pele ono bona basinkondoma balyatauka busena bwako busalala. 19Swebo tuli bako kuzwa kaindi-kaindi, pele balo tiimwakabeendelezya pe, taakwe nibakaitidwe azina lyako.

Currently Selected:

Izaya 63: Tonga96

Highlight

Copy