Izaya 62
62
1“Akaambo ka Ziyoni, nsikooyooumuna buyo pe,
akaambo ka Jelusalemu, nsikoolibatamika pe,
mane kusikila bululami bukacite bbalabala lili mbuli lyakubucedo, lufutuko lwawo lukamweke mbuli munzenge.
2Misyobo iyoobona bululami bwako,
bamami boonse bayoobona bulemu,
bayookwiita zina lipya,
eelyo Mwami Leza lwakwe mwini ndyayookupa.
3Uyooba musini wabulemu mumaanza aa Mwami Leza,
uyooba musini wabwami mumaanza aa Leza wako.
4Tabaciyookwiiti limbi kuti musiye nokuba kwiita nyika yako matongo.
Pele uyooitwa kuti Hefuziba anyika iyooitwa kuti Beula
nkaambo Mwami Leza uyoobotelwa uyookondwa mulinduwe, nyika yako iyookwatwa.
5Mbubonya mbuli mukubusi mbwakwata musimbi,
mbubonya oobo bantu bako bazookkala mulinduwe,
mbubonya mbuli sibwiinga mbwasekelela anabwiinga wakwe,
mbubonya oobo awalo Leza wako uyoosekelela anduwe.”
6Ndabikka balindizi abwaanda bwako omunzi wa Jelusalemu,
tabakooyooumuna pe sikati amasiku.
Nywebo nomwiita Mwami Leza mukukomba, mutalyookezyi,
7kamumwiita lyoonse kusikila akkazikizye Jelusalemu
akuucita kuti ulumbaizigwe munyika yoonse.
8Mwami Leza wakakonkezya ajanza lyakwe lyalulyo, lyanguzu kuti,
taakwe nenjoopa maila aanu alimwi kuli basinkondonyoko kuti bakaalye.
Alimwi taakwe nenjoolekela bazwamasi
kuti bakanywe waini mupya ooyo ngomwakalilimina.
9Pele aabo bayootebula nsaansa mbabayoozilya
akulumbaizya Mwami Leza
aabo bakokola nsaansa mbabayoonywa musinza wazyo
mumabbuwa aaŋanda yangu iisalala.
10Amwiinde, amwiinde mumilyango!
Amubabambile mugwagwa bantu.
Amubambe, amubambe mugwagwa! Amugwisye mabwe.
Amusimpe ndembela kuti misyobo imwi ibone.
11“Mwami Leza wakaambilizya kumagolelo aanyika oonse.”
Ambila mwana musimbi wa Ziyoni kuti,
“Bona nguulya mufutuli wako wasika!
Bona waletelela abulumbu bwakwe,
waletelela azyakubbadelela bantu.”
12Bayooitwa kuti bantu basalala,
bakanununwa a Mwami Leza,
muyootegwa bakayandaulwa,
bamunzi uutakasiigwi limbi pe.
Currently Selected:
Izaya 62: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
