Izaya 64

1Nicakabota noozapula julu akuselukila ansi aano, zilundu kazitenkaana kumbele lyako! 2Mbubonya mbuli mulilo mbuuvumpa tukuni, akucita kuti maanzi abile, boola ansi kuti zina lyako lizibwe kuli basinkondonyoko, kuti bamasi bazoozyangame. 3Langa ciindi ciya nookacita zintu ziyoosya nzitwatakali kuyeeya. Wakaboola eelyo zilundu zyakatenkaana kumbele lyako. 4Kuzwa kuciindi cakale-kale kunyina muntu wakamvwide, kunyina muntu wakateelela kunyina muntu wakabwene Leza uumbi kunze yako, ooyo uucitila zili boobo bamulindila. 5Waboola kuzoogwasya baabo babotelwa mukucita ziluleme, aabo bayeeya nzila zyako. Pele nitwakakakatila kuzinyonyoono zyesu wakanyema. Ino mbubuti mbotunga twafutulwa? 6Toonse tuli mbuli muntu uusofweede, ayalo milimo yesu njotuti ililuleme ili mbuli zisani zisofweede zinunka nsu, toonse tupepululwa mbuli tu, zibi zyesu zilatubbubbulula mbuli luuwo. 7Taakwe muntu naba omwe uuita zina lyako. Walisisa, wacita kuti tulobe muzinyonyoono zyesu. 8Nikuba boobo yebo O Mwami Leza ndonduwe Taata. Swebo tuli bulongo, yebo uli mubumbi, toonse nduwe wakatubumba. 9Utakalalili limwi O Mwami Leza, utayeeyi zinyonyoono zyesu akutamani. Twakomba O Leza kotuceba, toonse tuli bantu bako. 10Minzi yako iisalala yakaba nkanda, nouba Ziyoni sunu ninkanda, Jelusalemu nditongo. 11Ŋanda yako iisalala yabulemu ooko basikale besu nkubakali kukutembawida, yakatentwa amulilo. Zyoonse nzitwakali kuyobola zyoolwa. 12Musule azeezi zyoonse O Mwami Leza, sena unooumwide buyo? Sena unooumwide buyo kuti utusubwide limwi?

Currently Selected:

Izaya 64: Tonga96

Highlight

Copy