Izaya 61
61
Makani mabotu aalufutuko
1“Muuya wa Mwami Leza uli alindime,
nkaambo wandinanika kuti ndikambauke makani mabotu kubacete.
Wakandituma kuti ngambilizye kubaange kuti balaangununwa,
alimwi akuzoobonya boofu,
akuvuna badyaminidwe.
2Kwaambilizya kuti casika ciindi Mwami Leza natinunune bantu bakwe,
mbobuzuba Leza wesu nayoobweedezezya bubi,
akuti aumbulizye boonse balila.
3Kugwasya baabo balila mu Ziyoni,
babikkwe musini wabweebesi mucilawo catwe,
banane mafuta aakukondwa mucilawo cakulila,
balumbaizye mucilawo cakutyompwa.
Bayooitwa kuti mibanga yabululami eeyo Mwami Leza njaakasyanga
kuti atondezye bulemu bwakwe.”
4Bayooyakulula matongo aakaindi,
akubukulusya minzi yakanyonyweedwe,
bayooyakulula minzi eeyo yakanyonyweedwe kwamazyalani manji.
5Bazwakule bayooembela matanga aambelele zyanu,
bazwamasi bayoolimina myuunda yanu yamisaansa.
6Nywebo muyooitwa kuti bapaizi ba Mwami Leza,
muyooulikwa kuti bakutausi ba Leza wesu.
Muyoolya mbono zyaba misyobo iimbi,
muyoolikankaizizya mbono zyabo.
7Mucilawo cakuti bakausigwe nsoni,
bantu bangu bayootambula kobilo kwazyaabilo,
mucilawo cakuti bakausigwe bweeme,
bayoosekelela mulukono lwabo,
munyika bayootambula zyaabilo zyobilo zyanyika
bayookondwa kukabe kutamani.
8Mebo nde Mwami Leza ndiyanda bululami,
ndasulaika kubba azibi.
Mukusyomeka kwangu ndiyoobapa bulumbu,
akupangana cizuminano ambabo eeco citakamani.
9Balunyungu lwabo bayoozibwa akati kamasi manji,
abana babo akati kamisyobo.
Boonse bayoobabona bayooziba kuti mbantu Mwami Leza mbaakaleleka.
10Ndakondwa kapati mu Mwami Leza,
moyo wangu ulasekelela muli Leza wangu.
Nkaambo wandisamika masani aalufutuko,
akundivumbya jansi lyabululami,
mbubonya mbuli sibwiinga mbwabotya mutwe wakwe mbuli mupaizi,
ambuli nabwiinga mbwalibotya atuwenge.
11Mbubonya mbuli nyika mbwiimeneka zisyango mulinjiyo,
ambuli muunda mbuucita kuti mbuto zikomene,
mbubonya oobo awalo Mwami Leza
uyoocita bululami butikabonwe akulumbaizigwa abamisyobo yoonse.
Currently Selected:
Izaya 61: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
