Izaya 51
51
Majwi aakutontozya Jelusalemu
1Mboobu mbwaamba Mwami Leza ulati, “Amundiswiilile,
nywebo nomutobela bululami, nywebo nomuyandaula Mwami Leza.
Amulange kumwaala ooyo nkumwakazyulwa akumandomba ooko nkumwakasigwa,
2amulange kuli Abulahamu sikale wanu, akuli Sala ooyo wakamuzyala.
Ciindi nindakamwiita Abulahamu wakali alikke buyo,
kumane ndakamuleleka akumupa lunyungu lunji.
3Kasimpe Mwami Leza uyootontozya Ziyoni,
uyooetelela maanda aawo oonse,
uyoocita nkanda zyawo kuba mbuli muunda wa Edeni,
nyika yawo yankanda iyooba muunda wa Mwami Leza.
Mumunzi wawo kuyooba kutangala akukondwa,
bantu bayooleta zipego zyakulumba,
bayoomvwigwa kabaimba.
4“Amundiswiilile nywebo nobantu bangu,
amundimvwe nywebo nobamucisi cangu.
Bamasi ndabapa njiisyo zyangu,
kululama kwangu kulaba ngomumuni kuli bamasi.
5Ndafwambaana kubafutula mubululami bwangu,
lufutuko lwangu luli munzila, bamasi ndabacitila ciluleme.
Bantu bakulaale bayoolanga kulindime,
bayooba alusyomo lwakuti njoobavuna.
6Amulungumane kujulu, amulange anyika aansi,
julu liyooyanguluka mbuli busi,
nyika iyoozakala mbuli cibaki,
bantu bayo bayoofwa mbuli nzinini.
Pele lufutuko lwangu ndwepa ndwalyoonse alyoonse,
bululami bwangu buyookkalilila.
7“Amundiswiilile nywebo nomuzi ziluleme,
nywebo nobantu nomuzi zyamulawo wangu,
mumyoyo yanu. Mutayoowi kusampaula kwabantu,
nokuba kuyoowa nobamuseka.
8Mapempya ayoobalya mbuli mbwaalya cisani,
basyaanyungwa bayoobalya mbuli mbobalya butonje.
Pele bululami bwangu buyookkalilila kwalyoonse alyoonse,
lufutuko lwangu lunooliko mumazyalani oonse.”
9Nyamuka, nyamuka O Mwami Leza munguzu zyako
utugwasye mbuli mbookacita mumazuba aakaindi,
mbuli mumazuba aamazyalani aakale-kale.
Sena toli nduwe ookakosoola Lahabu wakayasa cimpangaliko camumaanzi?
10Sena toli nduwe ookayuminizya lwizi,
maanzi malamfu, ookapanga mugwagwa mumpisi yalwizi,
kutegwa bantu bako mbookanununa bainde?
11Aabo Mwami Leza mbaakanununa bayoopilukila.
Bayoonjila mumunzi wa Ziyoni kabaimba nyimbo,
nkabela bayootangala kapati.
Bayookondwa akutangala kapati,
buumba akulisinsukila ziyoomana.
12Mboobu mbwaamba Mwami Leza ulati,
“Mebo lwangu ndime eekutontozya.
Ino mwabaanzi nkomuyoowa muntu uulya maila.
Muntu buyo uuli mbuli bwizu,
13kuti mulube Mwami Leza mulengi wanu
ooyo wakalandabula julu akubikka ntalisyo yanyika?
Ino nkaambo nzi nomutinookongwa
buzuba abuzuba akaambo kabukali bwasikudyaminina
ooyo uukanza kunyonyoona lyoonse?
Ino bukali bwasikudyaminina buyoomutola aali?
14Aabo bali muntolongo balafwambaana kwaangununwa,
tabakooyoofwida mumadindi mobabede,
alimwi tabakabuli cakulya.
15“Nkaambo mebo ndime Mwami Leza wanu,
uubusya lwizi kuti mayuwe avuume,
Mwami Leza Singuzuzyoonse ndezina lyangu.
16Ndabikka majwi aangu mumulomo wako,
ndakuvumbilila acinziinzimwa cajanza lyangu,
mebo nindakabikka julu mubusena bwalyo,
indakabikka ntalisyo yanyika,
ooyo waambila bamumunzi wa Ziyoni kuti, ‘Muli bantu bangu!’”
Mamanino aakupenga kwa Jelusalemu
17Sinsimuka, sinsimuka, omunzi wa Jelusalemu,
yebo oonywa munkomeki yabukali bwa Mwami Leza
yebo ookaimyankutula nkomeki eeyo iizeelezya bantu.
18Bana boonse mbozyede taakwe naba omwe uukusolweda,
bana boonse mbookalela taakwe naba omwe uukujatilila.
19Mapenzi manji aaya akusikila,
ino nguni uukonzya kukuumbulizya?
Wabona wapwaigwa, wanyonyoonwa, wanjililwa nzala,
uli kundomo yamapanga, nguni uukonzya kukutontozya?
20Bana bako bawizuka, baligwabbeme kumamanino aamigwagwa,
mbuli lweengu uucedwe.
Bakolwa bukali bwa Mwami Leza,
Leza wako wabakalalila.
21Nkaako amuswiilile nywebo nomupenzegwa,
nywebo nomukoledwe, pele kutali waini.
22Mboobu mbwaamba Mwami Leza wanu,
ooyo uukwabilila bantu bakwe ulati,
“Bona ndakunyanga nkomeki eeyo yakupa kuzeeleka,
kuzwa kunkomeki yabukali bwangu, tokooyoonywa limbi pe.
23Nkomeki eeyi ono njooipa kuli baabo bati,
‘Lala ansi kutegwa tukutaaluke!
Wakacita musana wako mbuli kuti ninyika,
mbuli nzila iiindwa.’”
Currently Selected:
Izaya 51: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
