Izaya 52
52
Leza uyoofutula Jelusalemu
1Sinsimuka, sinsimuka,
yebo omunzi wa Ziyoni, kobaanguzu alimwi.
Omunzi wa Jelusalemu uusalala,
tondezya bulemu bwako alimwi.
Batapalwidwe, basofweede tabakanjili mulinduwe alimwi.
2Likunkumune lusuko,
nyamuka ukkale acuuno cabwami
o munzi wa Jelusalemu ookali mubwaange.
Lyaangunune nketani eezyo zyaangidwe munsingo,
yebo omwana musimbi wa Ziyoni ookali mubwaange.
3Mboobu mbwaamba Mwami Leza ulati,
“Mwakauzigwa kakunyina acibbadelwa,
lino nokunyina mali mulanununwa.”
4Mboobu mbwaamba Mwami Leza ulati,
“Kusaanguna bantu bangu bakainka ku Ijipiti kuyookkala,
abalo Baasiliya bakabadyaminina ciindi cimwi.
5Ino ono ndijisi nzi cangu kuno?
Mbwaamba Mwami Leza.
Kayi bantu bangu batolwa kakunyina kaambo,
baleli babo balalila kwamana buzuba abuzuba zina lyangu lilasampaulwa.
6Nkaako bantu bangu bayooziba zina lyangu.
Mubuzuba oobo bayooziba kuti ndime ndakaambide. Iiyi ndime.”
7Ncibotu kapati kubona batumwa
azilundu kabaleta makani mabotu,
aabo baleta makani mabotu,
baambilizya zyalufutuko,
aabo bati kumunzi wa Ziyoni, “Leza wako nguulela.”
8Swiilila majwi aabalindizi bamunzi wako,
boonse baloongolola cakukondwa.
Mwami Leza nazooboola ku Ziyoni boonse bayoolibonena ameso aabo.
9Amupozomoke mukwiimba nyimbo zyakutangala antoomwe,
yebo omatongo aa Jelusalemu,
nkaambo Mwami Leza waumbulizya bantu bako,
wanununa munzi wa Jelusalemu.
10Mwami Leza uyoobelesya janza lyakwe lisalala
bamasi boonse kabalibwenene.
Bakumagolelo aanyika boonse bayoobona,
mbutwafutulwa a Mwami Leza wesu.
11Amuzwe aano amuzwe, kamuya!
Mutagumi cintu cisofweede!
Amuzwe mubusena oobu kuti musalale,
nywebo nomuyumwide zibelesyo zya Mwami Leza.
12Pele tamukooyoozwa cakufwambaana,
nokuba cakubindaana, nkaambo Mwami Leza uyoomusolweda,
Leza wa Isilayeli uyoomukwabilila kumabazu oonse.
Mubelesi uupenga
13Mboobu mbwaamba Mwami Leza ulati,
“Amubone mubelesi wangu uyoozwidilila,
uyoosumpulwa akunyamunwa, uyoolumbaizigwa.
14Mbubonya mbuli banji mbobakamugambwa,
ciwa cakwe cakabisigwa kwiinda ciwa camuntu naba buti.
Bube bwakwe bwakabija cakuti taakali kulizibya abuntu bwini.
15Aboobo misyobo minji iyoomugambwa,
bami bayoojata kumulomo baakumubona.
Nkaambo bayoomvwa eezyo nzibatakaambilidwe,
bayoomvwa eezyo nzibatakanamvwide.”
Currently Selected:
Izaya 52: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
