Izaya 50
50
1Mboobu mbwaamba Mwami Leza ulati,
“Ino luli kuli lugwalo lwakulekana ndundakapa banyoko
ciindi nindakabatanda?
Naa nguni wakandikweletela ngwindakauzya?
Pele nywebo mwakauzigwa akaambo kazinyonyoono zyanu,
akaambo kansotoko zyanu banyoko ncibakalekelwa.
2“Ciindi ncindakasika, nkaambonzi nikwakanyina muntu?
Ino nkaambo nzi ncikwatakavuwa muntu nindakaita?
Sena nkuti kuboko kwangu nkufwiifwi cakuti ndimununune?
Sena nsijisi nguzu zyakumufutula? Ndatapata lwizi lulayuminina,
ndaandula milonga kuba nkanda,
nswi zyayo zilafwa zilabola akaambo kakubula maanzi.
3Ndacita kuti kujulu kusiye, kube mbuli kulila mufu.”
Kuswiilila kwamubelesi wa Mwami Leza
4Mwami Leza wandiiisya kuziba kwaamba
kutegwa kandikonzya kuyumya-yumya bateteete.
Cifumo-fumo cili coonse ulandibusya
kuti nditeye matwi aangu kuli nzyaiisya.
5“Mwami Leza wakandipa mutwe muuba uukonzya kumvwisya zintu,
nkabela ambebo tiindakamuzangila pe, ikuba kumufutatila.
6Ndakabadukumanina aabo bakali kunduuma,
ndakabalekela masaya aabo bakali kundijwa cilezu
tiindakavumbilila busyu bwangu kuti batandisabwidi akundiswida mate.
7“Mukuti Mwami Leza nguundigwasya, nsikoousigwa nsoni pe.
Nkaako ndaanga moyo wangu, wayuma mbuli bbwe,
ndilizi kabotu kuti nsikoousigwa bweeme.
8Ooyo uundikosweda twaambo uli afwiifwi.
Ino nguni uukonzya kunditamikizya twaambo?
Atubonane anguwe, nguni uunditamikizya?
Ngooyo aandigame!
9“Mwami Leza nguundigwasya.
Nguni ooyo uunga wandisinganya?
Boonse bayoozakala mbuli cibaki,
mapepya ayoobalya.
10Nguni akati kanu uulemeka Mwami Leza
akuswiilila majwi aamubelesi wakwe?
Ooyo weendela mumudima,
uunyina mumuni asyome muzina lya Mwami Leza,
akuyaamina alinguwe alikke.
11Pele nywebo nyoonse nomukutula mulilo,
nomubweza minzenge,
kamuya mweende mumimuni yamililo yanu,
aminzenge eeyo njomwadomeka.
Nceeci ncomuyootambula kuzwa kulindime,
muyoonjila mumapenzi aataambiki.”
Currently Selected:
Izaya 50: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
