Izaya 46
46
1Lino ngaaya mamanino aamituni ya Babuloni!
Beli a Nebo bakali kukombwa,
pele ono mbaamba bayumwidwa ambongolo,
babikkwa amisana yabanyama bakotede.
2Balakotama akufugama antoomwe,
tabakonzyi kulivuna nikuba kuti batolwa mubuzike.
3Amundiswiilile nywebo noluzubo lwa Jakobo,
nywebo nomwakasyaala nolunyungu lwa Isilayeli,
nywebo mbendijisilizi kuzwa ciindi nimwakamitwa,
mbendinyamwide kuzwa ciindi nimwakazyalwa.
4Mwaakucembaala akutuba mvwi,
ndinoociliwo, ndicinooyoomuyumwide.
Ndime ndakamulenga ndinoomubwezede,
ndinoomuyumwide alimwi ndime ndiyoomuvuna.
5Nguni ngomunga mwandeezyanya aawe naa ngomunga mwandeelanya aawe?
Nguni ngomunga mwandikozyanya aawe kutegwa tweezyanyizigwe?
6Bamwi basukumuna ngolida kuzwa mumasaka aabo
bamana beeleka nsiliva azipimyo,
baletela mufuzi wangolida kutegwa abapangile leza,
balamukotamina akumukomba.
7Balamubweza akumukulika,
bamutola, balamubikka abusena bwakwe,
nkabela unooimvwi mpoonya aawo.
Aawo mpoonya mpaabikkwa takonzyi kuzwa pe.
Nikuba kuti muntu wamulilaukila,
tavuwi, takonzyi kuvuna muntu mumapenzi aakwe.
8Amwaayeeye makani aaya,
akkalilile mumyoyo yanu nywebo nobazangi.
9Amuziyeeye zintu zyakaindi eezyo zyakale-kale,
ndime Leza taakwe uumbi pe,
ndime Leza taakwe uuli mbuli ndime.
10Ndime ndikonzya kulungulula mbuli zintu mboziyooba kumamanino
kuzwa kumatalikilo aazyo kuzwa kuciindi cakaindi-kaindi.
Ndati makanze aangu ayoocitika,
ndiyoocita zyoonse eezyo zindibotela.
11Ndaita muyuni wakujwe lubanze,
muntu wakulaale kuti azoozuzikizye makanze aangu.
Eeco ncindaamba ndiyoocicita ncobeni,
eeco ncekanzide ciyooba.
12Amundiswiilile nywebo nobasicinguni,
nywebo nomutaciti ziluleme.
13Ndamuletela bululami bwangu aafwiifwi,
tabuli kulaale, nsikoomuka kumufutula.
Njoofutula Ziyoni, njootondezya bulemu kuli Isilayeli.
Currently Selected:
Izaya 46: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
