Izaya 47
47
Kubetekwa kwa Babuloni
1Mwami Leza ulati, “Kozwa acuuno, kkala ansi,
kkala ansi mulusuko kutali acuuno cabwami,
yebo omwana musimbi wa Babuloni
tociyooitwi limbi kuti uli mutete uubombede.
2Bweza maziyo uziye busu,
gwisya sani lyako lyakulivumbilila kumeso,
sunsila cifunga cako,
cifunke wiinde mumaanzi aatulonga.
3Eelyo ulavumbuka kuti bantu bakubonene cinswe,
kutegwa bakweenene uuse.
Ndakubweedezezya bubi,
taakwe uunga wandikasya pe.”
4Munununi wesu zina lyakwe ngu Mwami Leza Singuzuzyoonse,
ngo Usalala wa Isilayeli.
5Lino Mwami Leza ulati kumunzi wa Babuloni,
“Kkala lizingamike, njila mumudima,
yebo omwana musimbi wa Babuloni,
tociyooitwi limbi kuti uuli mwami wamalelo oonse.
6“Ndakali banyemenede bantu bangu,
ndakasampwide lukono lwangu.
Ndakabaaba kulinduwe,
nkabela tookabeengelela pe.
Nobaba bacembeede wakabaminya citaambiki.
7Wakati, ‘Mebo ndinooli mwami mukaintu lyoonse!’
Pele taakwe nookatelaika zintu eezi,
tookayeeya mamanino aazyo.
8“Lino koswiilila makani aaya yebo osimeempeempu,
ooyeeya kuti lyoonse unooliibide akulikkalila,
yebo oolyaambila kuti,
‘Ndime endikke, taakwe uumbi kunze lyandime.
Nsikabi mukamufu, alimwi nsikooyoofwidwa bana pe.’
9Pele zintu zyoonse eezi ziyookusikila mukaindi kaniini buyo.
Mubuzuba bomwe, uyoofwidwa bana alimwi uyooba mukamufu.
Ziyookuboolela bubyaabi nikuba kuti ulicibwene kusonda,
alimwi ulijisi nsengo zyoonse.
10“Usyomede bubi bwako, waamba kuti, ‘Taakwe uundibwene.’
Busongo aluzibo lwako nzizyakakusowa,
noti, ‘Ndendime endikke, taakwe uumbi kunze lyandime.’
11Mapenzi ayookuboolela, nkabela tokazibi nzila yakuyooaleya.
Uyoosikilwa makatazyo aayo ngotakooyookonzya kumana,
lunyonyooko ndotazi nkoluyoozwida luyookusikila cakufwambaana.
12Kocili sibwaanga utaleki busondi bwako bupati mbookajana kuzwa kubwana.
Ambweni ziyookukongela basinkondonyoko.
13Zyoonse nzyookalaililwa zyakumana mubili!
Aabo bazi zyakujulu ababoole,
aabo baiide zyanyenyezi baambe ziyoocitika mwezi amwezi tubone.
Abakuvune kuzwa kuli zeezyo ziyookuboolela.
14“Kasimpe bali mbuli bungu,
mulilo uyoobatenta. Tabakonzyi kulifutula,
kuzwa kumabanga-banga aamulilo uuvwilima.
Ooyo tuuli mulilo wamakala wakulikasaazya,
tuuli mulilo wakuyota pe.
15Mbobubotu bulikke oobo mboyoojana kuzwa kuli bazi zyakujulu
aabo mbookali kubuzya-buzya mubuumi bwako boonse.
Boonse bayookusiya, bayoogama zyabo,
taakwe uuyoosyaala kuti akufutule.”
Currently Selected:
Izaya 47: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
