Izaya 40
40
Majwi aaletela lulangilo
1“Amubaumbulizye bantu bangu, amubaumbulizye, mbwaamba Leza wanu.
2Amubayumye-yumye bamu Jelusalemu kuti amwaambilile kuti bapenga ciindi mbubo lino cabonwa.
Zibi zyabo zyalekelelwa. Ndakabapa cisubulo cizwide akaambo kazibi zyabo boonse.”
3Kuli uuambilizya ulati,
“Amumubambile mugwagwa Mwami Leza munkanda,
amululamike mugwagwa wa Leza wesu munkanda!
4Makkuti oonse ayoolundumikwa,
zilundu atulundu zyoonse ziyoobambasikwa,
nyika yazilindi-lindi iyoocincimikwa,
nyika yamagata iyooba mbuli cibanda.
5Nkabela bulemu bwa Mwami Leza buyooyubununwa,
bantu boonse baansi bayoobubona.
Mwami Leza lwakwe mwini nguwaamba.”
6Ijwi lilati, “Ambilizya.”
Mpawo ndakabuzya kuti,
“Ino ndaambilizye zyakuti nzi?”
Lyakati, “Ambilizya kuti,
‘Bantu boonse bali mbuli bwizu,
bulemu bwabo buli mbuli maluba.
7Bwizu bulayuma aalo maluba alakunkumuka,
akaambo kaluuwo lwa Mwami Leza lwaaungila.
Kasimpe bantu bali mbuli bwizu.
8Bwizu bulayuma aalo maluba alakunkumuka,
pele majwi aa Leza wesu alikkalilide lyoonse!’”
9Nywebo nomuleta makani mabotu ku Ziyoni,
kamuya mutante acilundu cilamfu.
Nywebo nomuleta makani mabotu ku Jelusalemu
amupozomokesye mutayoowi pe,
amwaambile bamuminzi yacisi ca Juda kuti, “Ngooyu Leza wanu!”
10Amubone, Mwami Leza ulaza anguzu,
kuboko kwakwe nkokumweendelezya.
Amubone ulijisi bulumbu mbwapa,
ulijisi zyakubbadelela bantu.
11Uleembela butanga bwakwe mbuli mweembezi,
ulafukatila tubelele mumaanza aakwe,
ulatubikka acamba cakwe ulasolweda kabotu eezyo zijisi bana.
Leza wa Isilayeli takwe ngweelene aawe
12Nguni wakeeleka maanzi aakkede mujanza lyakwe,
naa kupima julu aceelesyo?
Nguni uukonzya kubikka bulongo bwanyika mucinzuma
naa wakeeleka zilundu azipimyo notuba tulundu-lundu mukutweelanya?
13Nguni wakamvwisya Muuya wa Mwami Leza
naa nguni uukonzya kumulailila akumwiisya?
14Nguni ooyo Mwami Leza ngwaakabuzya kuti amwaambile makani?
Alimwi nguni wakamwiisya nzila mbotu?
Nguni ooyo wakamwiisya zyaluzibo
akumutondezya nzila yakumvwisya zintu?
15Kasimpe bamisyobo imwi bali mbuli dosi lyamaanzi munongo,
bali mbuli kasuko aazipimyo, nsumbu zili mbuli tulongo buyo.
16Lebanoni yaceya mukuyaka zipaililo zyakutentela,
abalo banyama bazipaizyo zyakutenta mmbace.
17Bantu bamasi oonse mbabuyo kulinguwe,
taakwe ambwabalanganya, taakwe ambobabede pe.
18Ino ono Leza mulamweezyanya aani?
Ino ncikozyanyo nzi ncomunga mwamweezyanya aaco?
19Tali mbuli mutuni mubezi ngwabeza,
mufuzi wangolida ngwazilulula angolida akuubambila tuwenge twansiliva.
20Muntu mucete kapati uutakonzyi kupa cituuzyo ulabweza cisamu citaboli.
Ulayandaula mubezi uucibwene kuti amubikkile mutuni ooyo uutakonzyi kuwa.
21Sena tamuzi? Sena tamunamvwa?
Sena tamunaambilidwe kuzwa kumatalikilo?
Sena tamunamvwide kuzwa nyika niyakaimikwa?
22Leza ulikkede acuuno cabwami atala aamweenya uuvungumene waanyika
bantu bamulinjiyo baboneka mbuli mpaso.
Ulalandabula julu mbuli civumbilizyo,
ulalandabula julu mbuli tente lyakukkalila.
23Ulaselusya bana babami azyuuno akubacita bantu buyo.
Baleli bamunyika eeyi ulabagwisya azyuuno zyabo.
24Mbwaababikkila buyo, mbwaabakkazikka buyo,
batiti bakkale ulabafulida aluuwo,
balayuma kwamana kambizi kalabapepaula mbuli bungu.
25“Ino nguni ngomukonzya kundeezyanya aawe?
Naa nguni weelene aandime?” Mbwaamba Uusalala.
26Amulange, muululale kujulu. Nguni wakalenga zyoonse eezi?
Ngooyo uugwisya makamu aakujulu akwaaleta comwe-comwe,
zyoonse ulaziita mazina. Lino mukuti ngusinguzu mpati,
ngusintanze, taakwe nociba comwe cibulika.
27Nkaambo nzi ncoti yebo O Jakobo,
ncotongooka yebo O Isilayeli kuti,
“Mwami Leza tandicebi mumapenzi aangu?
Leza wangu tandicitili bweelede?
28Sena tozi? Sena tonamvwa?
Mwami Leza, ngu Leza Uuliwo lyoonse,
wakalenga nyika yoonse mboizulwa.
Takatali nikuba kuwizuka,
taakwe uukonzya kumvwisya luzibo lwakwe.
29Ulapa nguzu kubantu bawizuka,
ulapa nguzu kubateteete.
30“Nobaba bakubusi balakatala akuwizuka,
balombwana balalifumpula akuwa,
31pele aabo balangila mu Mwami Leza
uyoobabukulusya akubapa nguzu.
Bayoouluka mbuli basikwaze,
bayoozuza pele tabakawizuki,
bayooenda pele tabakakatali.”
Currently Selected:
Izaya 40: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
